mardi, novembre 18, 2008

فكرة أخرى من أجل الأمّة العربيّة: نضربو القمر الصناعي "نيلسات" بصاروخ.. علاش لا؟؟

هالأيّامات ولّيت نروّح للدار تاعب نتعشّى ونهبط نتفرش كيف الكدس على الفرش، وبالطبيعة كيف يبدى مخّك تاعب أسهل حاجة تعملها هي أنّك تحلّ التلفزة وتتزرع قدّامها كيف المحبس وتقعد حالل كشختك حتى لين يهزّك النوم. بالطبيعة ما ننصحكمش بنسق الحياة هذا على خاطر كيف تواصلوا عليه لمدّة طويلة تضربكم البهامة والشحم في الدم وتقعدوا من بعد تسحسحو فيّا بالدعاء على الدبارة المشومة متاعي.

عاد قلتلكم ولّيت نتفرّج في التلفزة أكثر من العادة، وبالمناسبة هاذي إكتشفت القنوات العربيّة اللي تبثّ على القمر الصناعي "نيلسات" والمختصّة في بث الأفلام الأمريكيّة والعالميّة بصفة عامّة باللغة الأنقليزيّة مع "سوتيتراج" بالعربيّة الفصحى، أهوكة منّو ترجمة ومنّو تهذيب لبعض الألفاظ السوقيّة إلّي تستعملها الشعوب الغربيّة المتخلّفة وعديمة الأخلاق، واللّي تنجّم تجرح مشاعر هاك المشاهد العربي الرقيق والحسّاس.. عندهم الحق، يدوخشي العزا في جرّة كلمة زايدة وترصّي لـ"ستيفن سبيلبرغ" يبحث؟

في الحقيقة فمّا برشة أفلام حلوّة بالنسبة للّي مغروم بالسينما، وبعضها جديد نسبيّا، وعجبتني خاصّة قناة FoxMovies إلّي حسب ما لاحظت تستعمل المقصّ الأخلاقي العربي الأصيل أقلّ برشة من نظيراتها Mbc2 وMbc action وغيرها من القنوات الشبيهة على القمر الصناعي "نيلسات".

على فكرة القمر الصناعي هذا بصفة عامّة كان يعملوا مزيّة على الأمّة العربيّة جمعاء ويضربوه بصاروخ من هاك الصوارخ إلّي فضلت من حرب الخليج، صدّقوني يكون إنجاز حضاري كبير للعريبة على خاطر هالأقمار الصناعيّة الناس تستعمل فيها باش تقدّم وتكتشف الفضاء وتتبادل المعلومات وتتجسّس على الدول الركيكة وتتنبّأ بالكوارث الطبيعيّة، أما نحنا أمّة الجرابع بصفة عامّة فعملنا هالقمر الصناعي التعيس باش زدنا وخّرنا بيه أكثر من 300 عام في ظرف أقل من عشرة سنين. حاسيلو ما تشوف كان الشعوذة والدعوذة، وإلاّ التفاهة والبلاهة، وإلاّ الأربعة مع بعضهم، مع بعض القنوات شبه الإعلاميّة وشبه الإخباريّة، والبرامج شبه الحواريّة، تقول الناس ناقصة بهامة في أمّة العربان باش يزيدوها "ساتيليت" كامل يدعموا بيه عمليّة التبهيم الشامل..




إلّي خلاّني نكتب على الحكاية هاذي هو أنّي البارح قاعد نبدّل في القنوات السينمائيّة المذكورة عساني أعثر على ما يستحقّ الفرجة، فإذا بي نلاحظ تصرف أخرق من طرف قناة كيف الأم بي سي أكشن إلّي تعدّي في ساعة مبكّرة نسبيّا من المساء فيلم من هاك الأفلام إلّي تبدى فيها البونية والمشطة عاملة مسدّ، حاسيلو دمومات شرتلّة وواحد عينو مجبودة تتدلدل من وجهو، حاسيلو مناظر مقزّزة حتى بالنسبة لواحد كيفي أبعد ما يكون عن النقنوق ذي الأحاسيس المرهفة وأقرب منه للجادور ذي الأفعال المقرفة.. قلت عاد مشاهد تدرّع الخواطر وتمجّد العنف الشديد والقتل العمد والقتل على وجه الخطأ، وتنجّم بالحق تأثّر على الصغار تأثير خايب، عاد ولّيت دوّرت القناة ومشيت لفيلم آخر على "الأم-بي-سي-2"... هيّا ما فمّاش ربيّع ساعة وجات في وسط الفيلم لقطة متاع مشهد سخون شويّة، شويّة موش برشة على خاطر بطبيعتها الأفلام الأمريكيّة الموجّهة للجمهور العريض تتسمّى محافظة برشة وما تورّيش مشاهد أسخن من اللازم.. حاسيلو هاك المشهد بدى يعطي على ريحة السخانة وعينك ما تشوف إلاّ النور، الجلم لعب في رمشة عين ونقّزو بالفيلم للمشهد إلّي مبعّد بصفة ما تخلّيكش تتبّع تطوّر الأحداث (على خاطر الحكاية عادة ما تكون تابعة لبعضها في الأفلام إلّي ما يعملوهاش التوانسة).. حاسيلو تكسير الكرايم هذا ذكّرني بهاك العام كيف كانو يحطّولنا في الشاشة الزرقاء على المشاهد الساخنة في القناة الفرنساويّة الثانية (آدو آدو.. باسيونيمون.. هههه يا حسرة).

عاد نرجع لحكايتي قلتلكم شوف كيفاش البهامة متاع بني عربان، توّة فيلم متاع واحد يخرّج في عين صاحبو بصوابعو ما عندهم معاه حتى مشكل كيف يتعدّى وتتفرّج فيه العائلة العربيّة السعيدة بصغارها بكبارها، أما مشهد متاع بوستين و"بوستو" بالطبيعة هذا يتسبّب في كارثة إجتماعيّة زرقاء ولازم يضربو الفيلم يحشّو والديه. بالطبيعة مانيش باش نطلب من قناة سعوديّة باش تعدّيلي أفلام إباحيّة وإلاّ حتى مونيكا بلوتشي عريانة زقط، أما يا خويا إنتي كيف ما سهّلش عليك ربّي باش تقبل بالمشاهد متاع فيلم معيّن لواش عليك تعدّي فيه للعباد باش تجي تقصّ في وسط الحكاية وتكسّر كرايم المتفرّج؟ ياخي هذا ماهوش إعتداء على عمل فنّي بتغيير محتواه دون أخذ إذن أصحابه؟ وزيد علاش الحرص الكبير هذا على حجب كلّ ما ليه علاقة بالجنس والعراء في حين يتم التعامل بليبراليّة متطرّفة مع مشاهد العنف والدم وتقليع العينين؟؟؟ بالطبيعة الأسئلة هاذي تحتوي على إجاباتها في وسطها، وتنجّم تفسّر برشة من التخلّف والرجعيّة متاع المجتمعات اللي يحكموها الجهلوت.


هو الحقيقة متاع ربّ العالمين، وباش ما نظلموش الناس، لازمني نستعرف إلّي هذا بكلّو كوم وإلّي كانوا يعملولنا فيه في تونس في البث الأرضي لقناة antenne2 كوم آخر ! برجوليّة شفت قصّان وشفت رقابة وشفت إيداع وجوبي وشفت حجز وحجب وقرصنة، وهاني اليوم نشوف في المقص متاع الأنترنات بو 404، أما كيفاش نجّموا هاك العام يقصّو على الدور النهائي متاع "رولان غاروس" ما بين أغاسي وسامبراس في عزّ التاي براك متاع السات الخامس باش يحطّو بيشة وفرهود متاع ****... برجوليّة هاذي ما لقيتش كيفها لليوم !!

صحيح نستعرف إلّي الفينال هاذيكة خلّفتلي عقد نفسيّة كبيرة وأمراض عصبيّة وأضرار فادحة في القنفلاش البسيكولوجي متاعي وما إنّجمش ننساها ! هيّا أنّستو..






23 commentaires:

Anonyme a dit…

achbik ya big 9a3ed itwada3 rabi yoster hak itsebet 3la toulek el youm 3la kol dadwena ya krima

sidijmour a dit…

يا بيغ من خلال تدويناتك نعرفك شعلة ومقبل على الحياة وبيناتنا ما تواتيكش الفشلة خليها لأصحابها راهو هاك أش قعدلهم. مداخلتي حول التشبيه إللي إستعملتوا في المقدمة وهو متربع كيف المحبس راهو الوضعية هذية تسمي وضعية القرفصاء وما نتصوركش تتفرج في التلفزة وأنت متربع أو متفطحز وبالتالي من الأصح القول أنك كيف الزير على خاطروا غالبا ما يكون متكي أما ينجم يكون واقف أما راهو في كل الحالات لا يضحك لا يبكي.بقية المقال أنا معاك في خصوص الرقابة وموش معقول بصراحة التصرف في العمل الفني أما الفرق بين فيلم الرعب وفيلم القبلات هو أنو المشاهد العربي كيف يلقى فيلم رعب غالبا ما يبدل القناة في حين في الفيلم الاخر يزيد في الحس متاع التلفزة. ربي يهدي الجميع.

Anonyme a dit…

lol....lol..tout à fait raison ya big....
.mais juste une rectification ya big il n'ya pas de tie break dans le 5eme set mais ils continuent à jouer jusqu'à ce qu'un joueur gagne 2 jeux de plus que son adversaire

عاشور الناجي a dit…

و أهم مرض خطير ما حكيتش عليه يا بيغ

فوق العشرين قناة دعوذة

ليل و نهار تقنبل علينا في التخلف غسلان دماغ

صغار يقعدوهم ولاد وحدهم و بنات وحدهم من تالي و بالحجاب يعيشك

و يعلموهم الشهادة و الارهاب على قاعدة

في عوض العلم الجهل و الخرافة

tikaaa a dit…

wallahi, je trouve que tu as raison dans un truc, le satellite nilesat ma3moul principalement bech ibahhem ...
MAIS borjouleya mbc2 ou mbc action ou fox ma na3refch echnowwa... ya3tehom essa77a parce que sans ca iwalli ma fammech 3lech t7el ettalvza jemla ... surtout que la famma TPS la ghirou...

ti het 7atta bel jlam qui va avec ... a7na lkina ou netcharrtou !!!

Roi a dit…
Ce commentaire a été supprimé par l'auteur.
Roi a dit…

faute de manipulation :) je remets le commentaire !

شخصيا وبسبب عدم توفر الامكانيات التقنية واللوجستية باش انطيح بيها "النيلة"سات لمدى تأثيره على أعصابي و على أدمغة أهل جربوعستان فقد قمت منذ مدة باستعمال الكوموند بحملة تطهيرشعواء استهدفت كل قناة يطل فيها أحد أولئك الحمقى ذوي الذقون الطويلة و الأثواب القصيرة والعقول الفارغة فكانت النتيجة كالآتي : لم يبق سوى قنوات الرياضة والريق البارد كميلودي وروتانا و تونس طبعة ....
لذا بردت دمي وقمت بتخفيف معايير الحذف فاختفت نصف القنوات من القائمة ... وربحت راحة بالي ..
ومع ذلك لا يزال الجهاز في يدي تحسبا لأي سحنة غير مرغوب فيها ..
و لاأنكر أنني تغاضيت عن بعض القنوات الدعوذية فقط بش نعمل عليهم ضحكة ساعات كيف يقين" المتنيل" سات ....
للتذكير فالكوموند المستعمل هو السادس في ظرف سنة و السبب طبعا تلك الفطشاطات من فصيلة عمرو الرهدان وعبد الكافي ( منخارو برك يلزمو كاميرا وحدو) ..
أما الجماعة الجدد متاع كربلاء والنجف الأشرف والنواح الأبدي على حسن وحسين والماريشال عمار هاذوكما لازمهم مدونة وحدهم..

Roi a dit…

على ذكر جماعة كربلاء والنجف الأشرف والنواح على حسن وحسين والماريشالة دوجة .... بفضل اطلالتهم الحديثة علينا و كمية الاحباط الي يزرعوه فيك في ظرف 5 ثوان فقط (ضربة ضربة للانتحار قالو د.د. ت ) .. هالأشكال هاذي هي الي تخليك تترحم على دكتاتور بلابزي كيما صدام بالسيف عليك .. قداش كان لامم .. تقولشي **** ونحاولها غطاها ...
يظرهلي النقطة هاذي تستحق تدوينة يا بيق ...

Stupeur a dit…

يا بيقا وخي, كيف العادة أومورك فالزيقا
أما حبيت نعملك ملاحظة تنجم تكون طريفة, سا ديبون كيفاش تاخوها, أما زوزة بو مقص, المادام الي كانت لاهية بالشاشة الزرقاء متع أفلام أ2 أ2 باسيونيمون هي سيدة ناس ملاح و من طينتنا و نزيدك زيادة, راهي مالقراء متع المدونة متاعك
وكانت زادة مالناس إلي تعديلنا فالموزيكا الي نحبوها

لا علينا صاحبي و نرمال, مشنا من...ين
هي نخليك خلي نعطي حق الأحيرة

Walid a dit…

Ya Big,
el m9ass 3mel fyk .. ou fel dhekra mte3ek ..
sampras n'a jamais été en finale RG. Je suppose que tu parles de Jim Courrier.

lallou a dit…

salut Trapboy. je suis un lecteur fidèle de ton blog et je suis continuellement tes articles. Je trouve très constructive ta manière de traiter les problèmes actuelles pque comme dit Bergson ya pas de plus purifiant et sanitaire pour la société que le rire, qui nous permet de nous rendre compte des fléaux et des maladies sociales et qu'elles doivent disparaître justement pqu'elles font rire, et si elles font rire c'est qu'elles sont étranges et en qque sorte n'ont pas de vocation à durer.
Sauf que je trouve qu'avec le temps tu préf`res le rire et le sarcasme sur les côtés instructifs et intellectuels. Par ex au début de tes articles tu parlait bcp de droit constitutionnel, d'histoire, de politique...je trouvais ça très intéressant et quand surtout tu le fesais avec un sens d'humour, ça donne en même temps au lecteur une information utile et un moment de distraction.
Mais avec le temps on dirait que tu t'es contenté d'écrire sur des choses intéressantes tjrs, mais moins instructives avec un langage souvent profane comme si il n'yavait que le rire qui prévaut ds ton blog.
Finalement comme tu dis, c ton blog et t'en fais ce que tu veux :), mais que tu le veuilles ou pas mon ami, ton blog réussi, et réussi auprès d'internautes qui sont généralement d'un jeune âge, et ça t'implique forcément une certaine responsabilité...et ça c que tu le veuilles ou pas tjrs mon ami...
désolé pour la longueur de mon mesg et bonne continuation dans tous les cas.

Anonyme a dit…

A lallou

Ne t'inquiète pas pour les gens qui veulent se cultiver,ils trouveront certainement des sources.
Mais c'est quoi cette obsession à rendre tout sérieux?? Il écrit ce qu'il veut et il n'a aucune responsabilité..Ce n'est qu'un blog personnel censé plaire à personne.

Big Trap Boy a dit…

@ Lallou:

والله كلامك بكلّو صحيح وأنا بيدي عملت لنفسي نفس الملاحظة الفترة هاذي، ما نعرفش إذا كان الحكاية فقط مسألة وقت بما أنّ الكتابة في مواضيع عندها أكثر عمق تتطلّب مني وقت وتركيز أكثر، او أنّي ما عادش عندي وسع البال أو ربّما زادة نتحاشى في بعض المواضيع باش ما نعرّضش المدونة للجلم

الحقيقة ما عنديش جواب واضح ولكن يمكن جملة العوامل هاذي لعبت دور، ويمكن زادة القراء والمعلقين وجّهوني بصفة غير مباشرة لنوع من التدوينات، ما نعرفش كيفاش نجاوبك

على كل حال كيما قلت راني الحكاية هاذي لاحظتها وناوي بقديرة المولى نرجع إلى ما كنت بديت فيه قبل، وخليها مفاجأة خير

:)

شكرا على التعليق اللطيف واللي في محلّه

Amir a dit…

سلام،

خويا العزيز، آني عامل مقاطعة لبضائع وسلع و إسلع المشرق المكرب، خاطرني مشيت للطبيب و قالي إلي ولات عندي حساسية ذهنية و تورم ثقافي من القنوات العربية.

لذا خوك اللعب لا، صحتي أبجل ولا حرقان الدم و الأعصاب.

وبالمناسبة فإني باش نستغل القمر الصناعي النيل سات باش نعبر عن رغبتي في التبرع و إهداء الشئ وكذاه لأصحاب السمو و السعادة و القائمين على قنوات البهامة الشاملة و الرجعية و ماننساش زادة القائمين على مصلحة الأخبار في جل قنوات البهامة المشرقية و إلي ما يدخروش جهد باش يتجاهلو تونس و المغرب العربي عامة، و ما يعرفونا كان ك ينورو الوجه بحاجة تصلح،


لذلك و نيابة عن روحي و بتفويض من شخصي أتوجه بإهداء شخصي لشئ و كذاه لكل من ذكرت
وإنشاء الله من كون نسيت حد باش مايتغششه.

TKY a dit…

Je partage l'avis de Lallou,
Je suis moi aussi un lecteur assidu de Trapboy. Je trouve que c'est l'un des rares espaces en Tunisie ou on peut avoir une analyse drôle et objective (du moins désintéressée) de ce qui se passe dans notre société (et il s'en passe des choses ).
Néanmoins, je trouve que BTB est de plus en plus prudent. Certains sujets sensibles sont soigneusement évités. Je comprend que 404 khaddem et je n'ai pas envi de voir cette page censurée (comme tout les lecteurs de BTB et ils sont nombreux), mais je sais aussi que BTB est rusé et qu'il sait rester à la limite de ce que si ammar peut tolérer d'une manière subtile.
Je suis certain que ce site est suivi de prêt par si 3ammar, car les responsables de la censure disposent surement des statistiques sur les pages les plus visitées par les Tunisiens et BTB est surement en haut du tableau. Il a donc réussi jusqu’a présent à éviter 404 avec des articles parfois très audacieux. Pourquoi alors cette prudence ??
Je tiens aussi à préciser que même si l'audace a diminuée l'humour est toujours au rendez-vous. C’est toujours un plaisir de lire vos articles alors bravo monsieur.

tikaaa a dit…

borjouleya... il faut supprimer les chaines de chants et danses, les chaines de tgeza (y compris les chaines qui font l'eloge de ca comme ANN)... et les chaines de religion.... akahaw

et on obtient une bonne television ..

violence, sexe ou ghirou ... khalli el kazi bech el 3bed tet3allem chwaya 7weyej tanfa3.

ZABANDI a dit…

wa7dek ya BIG fi ha enna9cha!!!!

Anonyme a dit…

- Jamais la finale de Roland-Garros n'a opposé Agassi à Sampras :)

- Il n'y a pas de tie-break au 5ème set à Roland Garros.

Taïeb

Nouha a dit…

Hello Big !

ça fait un moment que je n'ai pas visité ton blog mais je dois avouer que c'est toujours un plaisir de revenir et de lire les quelques lignes que tu poste :)

U're really Impressive !!

ne t'arrête surtout pas à nous faire partager tes idées et tes impressions sur ce qui se passe fi tounes ....et surtt bon courage :)

bea a dit…

fech ta3mel bech trawa7 te3eb koll youm w teteghress kif el ma7bess????!!!!

Anonyme a dit…

t7eb 3al bouss ya big w aflam ma i9ossou minha chey tfarij 3ala les chaines mte3 showmovie w rabi ikhalilna el piratage

baz2x1 a dit…

Le 04 Juin 1996; quart de finale de ROLAND-GARROS :
SAMPRAS contre COURIER

vainqueur : SAMPRAS
score : 6-7 (4-7), 4-6, 6-4, 6-4, 6-4.
durée du match : 3 h 38.
Résumé du match :
Pendant les deux premiers sets, Courier a retrouvé son niveau de jeu des années de ses victoires.
Sampras, se retrouve mené deux sets a zero en une heure trente. Commence alors pour lui une fantastique remontée.
Après avoir remporté la troisième manche, il réussit un ace sur seconde balle et sauve ainsi le match dans la quatrième.
La cinquième manche est dominé par Sampras, malgré la fatigue et un Courier toujours vaillant.


La cinquième manche en Tunisie c'était Bicha et Farhoud.

Quel traumatisme! Depuis je regarde plus ROLAND-GARROS

Big Trap Boy a dit…

@ Baz2x1:

يرحم والديييييك، هاذيكا هي إلّي نلوّج عليها وغابت عليا

il faut dire que le jeu de Courrier et de Agassi se ressemblent beaucoup :)))