mercredi, novembre 14, 2007

الحوارات التلفزية على قناة 7: بين الإتجاه المعاكس والريح المعكوس



أستغفر الله العظيم، هاو الشيء اللي ما يخليكش تخدم على روحك. توة مانيش عارف آش لزني نحل في التلفزة حتى نشوف هالمناظر المقلبة؟ بالزهر متاعي طحت على قناتنا الوطنية تونس سبعة وسبعين (ماهو انزادتلهم سبعة جديدة على اليسار) جايــبة ملف مستدعية فيه وزير العدل وينشط فيه زنس ما نعرفش منين جابوه، حاسيلو واحد منظرو متاع أعز حاجة ينجم يكونها هي حوّات في المارشي سونترال، دايور في وجهو يتشبه لسمكة الفقمة أو الفوك، وعلى ما يبدو يحب يجيب نفس الأسلوب متاع فيصل القاسم متاع الإتجاه المعاكس.على فكرة الفقمة أو الفوك ماهوش سمكة أما حيوان من الثدييات البحرية، أما نتصور كان جاء لحمو يتباع في تونس راهو موجود عند الحواتة وموش عند الجزارة، أما هذا ماهوش موضوعنا.


الحقيقة أنا فيسع ما هربت نجري من قدام التلفزة على خاطرني حصلت الأسبوع اللي فات وقعدت درجين قدام نفس البرنامج ياخي شوية لا رميت روحي من الشباك. حاسيلو وقتها جابو الوزير المكلف بالوظيفة العمومية، وجابو معاه بوشيحة الأمين العام لـ"حزب أقصى اليمين الإشتراكي المعتدل المعارض الله أعلم لشكون"، وبوطار مدير "راديو عطريّة" المعروفة أكثر بموزاييك (اللي هو في نفس الوقت، وهاذي معلومة ما كنتش نعرفها، عضو في المجلس الأعلى للإتصال، وهاذي حاجة استغربتها على خاطر زوز وظايف ما يتماشاوش مع بعضهم، علاش ما نزيدوش نحطو معز إدريس متاع ليتوال رئيس لجامعة كرة القدم كيف هي هكة؟) ومعاهم درا آش من زوز رهوط من المجتمع المدني متاع كوستا-ريكا، وبالطبيعة هاك المنشط اللي وجهو درا كيفاش.

حاسيلو ما نحكيلكمش على هاك الحوار الهايل، الوزير من هنا، وبجنبو بوطار ومقابلو بوشيحة وفي وسطهم بوكشخة يطرح في الأسئلة و"ينشّط" في الحصّة، أما برجولية عجبني فيه كيفاش يبدى زعمة زعمة يقاطع في الوزير باش يسألو هاك الأسئلة من نوع تقولش عليه قالّو "وإنتي ما تقولليش آشبيك هكّا باهي ياسر؟ تي هام الناس يقولو إلّي إنتي تحفون برشة؟ بجاه ربي علاش ما تفسرلناش كيفاش إنتي هكة باهي أكثر من اللازم؟" حاسيلو كان سيّب الراجل قال الكلمتين الخفاف النظاف متاعو ومشى على روحو كان خير من هالشبه حوار متاع البلادة.

توة أنا ما عنديش مشكل كان يكون المذيع قفاف وما يسئلش أسئلة محرجة لأعضاء الحكومة، ينجم حتى يكون موافقهم على طول الخط، ما يقلقنيش، ينجم حتى يوافقهم أكثر حتى ملي هوما موافقين رواحهم، أما يا خويا يكون واحد متثقف عندو مستوى، واحد كيما برهان بسيس مثلا، بالرغم من أنو قفاف وبلعوط كبير أما ياخويا ماهوش خايب ياسر في منظرو وعندو شوية مستوى متاع حوار(ونأكد لهنا على كلمة شوية)، أما هاذي وزير بقدرو جايـبــين حوّات يقاطع فيه باش ما يقول حتى شيء يصلح، والله عيب.

وزيد على هذا، توة يا رسول الله جايـبـين 6 من ناس باش الناس الكل تعطي نفس وجهة النظر وتتفق على نفس الفكرة موش ريق بارد؟ يا خويا كيف نحنا مازلنا ماناش متاع حوار علاش هالتمنييك وخساير الفلوس؟ ماهو يجي الوزير يلقي الكلمة متاعو أو يعملو حوار راسو راس المذيع يحضّرو فيه الأسئلة من الأول وسيب صالح، وإلاّ ياخويا فاش قام علينا، يحطولنا حتى ماتش كورة في حومة عربي والله يبدى سخون أكثر من هالحوارات الفارغة

بالمناسبة هالقناة متاع التلفزة إلّي نخلّصو في فاتورتها مع الفاتورة متاع الضو سمعت بيها توة عندي عشرة سنين باش تنقل من لافايات وتمشي للبنية الجديدة اللي بجنب وزارة الخارجية. هالمقر الجديد أكيد راكم شفتوه على خاطر قريب يحضر وهو مبنى عملاق وفاخر وبالتأكيد ما يليقش ببرامج متواضعة جدا جدا من النوع هذا، وكان يسمعو كلامي يمشيو يعطيو البنية الجديدة لكلينيك توفيق خلّي يرقد فيها بزايد مرضى ليبية يدخلولنا الدوفيز، ويمشيو يشوفو سطح متاع دار في السمران ولاّ في الكبارية يكريوه لقناة سبعة وسبعين هاذي يكون أحسنلهم.

بالمناسبة هاذي زادة تذكرت أني شفت الجمعة اللي فاتت حوار لوزير العدل على قناة "المستقلة" الفضائية اللي تبث من لندن، الحوار هذا أجراه صاحب القناة هاذي وهو الهاشمي الحامدي الخوانجي اللي لا فهمتو "لا معانا ولا مع الأخرين"، مرّة يعارض ومرّة يرجع يقفف، يعني حوّس تفهم آش عندو في راسو بخلاف هاك القصّة متاع الجبورة اللي مهبطها على جبينو. الحوار زادة ما كانش أحسن برشة من الملف متاع المذيع الفقمة، باستثناء بعض الأسئلة تتعلق بالأساس بإهتمامات الهاشمي الحامدي، يعني الحجاب والخوانجية، وفي الحالتين ما جابو شي جديد، ومن بعدها رجع الحامدي جبد البندير اللي مخبّيه تحت الطاولة وبدى يضرب ويصلّي عالنبي.

هو راهو ظهور أعضاء الحكومة في التلفزة وفي منابر الحوار عموما كي تجي تشوف حاجة باهية، أما الهدف من منابر الحوار إذا كان باش نجيبولها وزراء وراهم برشة خدمة لازمو يكون أنو يتيحلهم الفرصة باش يناقشو آراء مختلفة ويسمعو الناس اللي باش تحكي حكايات أخرى بخلاف الحكايات اللي هوما جايين باش يقولوها، أما هاذي تجيبلي وزير باش يقعد يسمع في "فوك" مكلوب درا فاش يرغي ومعاه بوطار يغني وبوشيحة يرد عليه، بصراحة هذا في عوض يعمل كيف الإتجاه المعاكس يعمل لبنادم ريح معكوس ويدورلو خواطرو، وفي عوض يعملّو متنفّس متاع حوار يولّي يزيد "يبوشيلو" المنافس متاع الهواء في الدخول والخروج والعياذ بالله.

الله يصبّرنا وبرّة




21 commentaires:

Anonyme a dit…

هذاك المقرّص هذاك المعجون،...الحاصيلو مرحبا بعودتك من فرنسا

Werewolf a dit…

هو لا محالة حاشا خليقة ربي لكن إلى متى و التلفزة متاعنا تفرض علينا في ها الوجوه؟
و ما غير ما نفكرك بلطيفة مقطوف متاع الأخبار ياخي ما يعرفوش اللي التلفزة ماهياش كي الراديو و الوجه الحسن ماهوش أوبسيون...و ما غير مايحكيولي على كفاءتو على خاطر البرنامج كان مهزلة

Houssine Choyakh a dit…

PS: rectif, le nom du proprio de la chaine est hémchi méd7i en arabe الهامشي المادحي :)

Yottil a dit…

MDR :))L'expression du phoque avec le commentaire est hilarante!! :)) A ta place je ferai attention lors de ma prochaine baignade!! ;)
Sinon edheka il m9arres ou edheka il ma3joun... vaut mieux rire que pleurer!!

Anonyme a dit…

C’est vrai que rabbi ysabarna!!
Mais ce n’est pas nouveau de la part de notre chère chaine télévisé tv7 ou tv77 ou je ne sais quoi! Le nom changera mais elle restera toujours merdique, fidèle à ses débilités qu'elle nous diffuse!
La plupart de ses animateurs, pour ne pas dire tous, sont des gnioles, mais dommage car ces derniers arrivent bien à imiter des personnages, à nous passer des messages. Alors que les notre ils sont loin de nous faire rire, ni à passer une information véridique. On a pitié de les voire toujours dans leur médiocre jeu. Mais des fois on a la rage en voyant ce genre de programme, ils se foutent de la gueule de tous les tunisiens sans exception. Je ne sais pas, je n’ai jamais vu autant de manque de respect dans une chaine télévisé !
7asilou tellement 9albi m3abbi sur cette chaine j’ai beaucoup à dire, te demande BTB de nous poster encore sur ce contexte.
Mais j’ai déjà appris (en passant par RTCI) que la chaine 77 a déjà déménagé depuis quelques mois dans le nouveau bâtiment. Alors que la chaine qui mérite plus d’attention et de récompense, à mon avis, vu les lucides efforts et les riches programme qu’elle nous pressante ces derniers temps, réside toujours dans des conditions lamentables.

Anonyme a dit…

ena ma na3rafch alech Canal 7 ma temchich 3andi feddar!

se3a se3a terja3 tekhdem kif femma match koura walla a7ad riadhi!
sinon wa7adha tefhem rou77a!
se3a se3a kif net3adda 3liha bel ghalta, yokhrojli message y9olli: sama7na 3al ez3aj!

bjeh rabby hedha 7add 3a9lik ettaba3 fihom?
ti le9yem 3issa hedhika hia tounes!

rak tama3 fel 3sall men zokk el phoque!


j'y ai deja fait allusion : http://blog.kochlef.com/?p=306

BoZtMan a dit…

Welcome back BTP (kima y9oulou ikhwénna fil 3ira9) ...
J'ai suivi avec beaucoup d'intérêt le débat (wou yessir fihom hal kilma), mis à part sa gueule le fuck (hic !), il avait une drôle de manière à introduire le ministre présent ce jour là, je cite "tfaddhal ma3ali alwazir, wou jéwoub bi koll issara7a illi 3awwadtna biha" !! yékhi kharej mnin hassa7afi hédha ??? min lajnat talsi9 ? walla kolliyyet ettbandir bi zarzouna ?
Sinon, pour moi le truc ces jours ci sur Kanalou 77 c'est l'espèce de faza walla hiyya truc 3amlouha bimounasabat 20 sné ajwé : au départ ils te montrent un paysage désertique en noir et blanc avec un commentaire "9abl attaghyir" ... suivi d'un 7 qui survient de nulle part - que j'appellerai Super 7 - qui vient mettre la couleur à la télé ! des ponts ! les étangs d'eaux etc avec le commentaire qui va bien bien sûr: "ba3d attaghyyr"... pas prévisible du tout le gars !!
Ya3tihom la9ya 7acilou ...

Hic !

Anonyme a dit…

مرحبا بعودة المديون الضالّ خاطرنا نسالوك برشة تدوينات وهكه لازمك تقاضي تدويناتك الفائته كيف ما تقاضي الصلوات الفائته
أمّا بخصوص التلفزة متاعنا فالنكتة المعروفة كفيلة بتلخيص حالتها : يحكيو على يوم غدوة و جماعة الجنّة شادّين الصفّ تلفّت واحد لجماعة النار لقاهم يتفرّجوا في قناة تونس سبعة (وسبعين) يا خي صاح :تيهاي جهنّم فيها التلفزة ؟ تلفتلو واحد من جهنّم و قالوا: راهي وسيلة تعذيب ماهيش وسيلة تفرهيد
و الحديث قياس

Takkou a dit…

Bonne nouvelle. BTB a rechargé les batteries et il est revenu en super forme.
يا سيدي مرحبا بيك فى دارك

Anonyme a dit…

9allek bed3ou douche écossaise jedida.
etzappi men LCP el Tv7, varba varba lel marmotismou (rhumatisme)

Anonyme a dit…

Ya sidi 3aouda maymouna, ya baba rana nhebbouk, ou nkaddrouk, ou netwahchouk, (merde, effet TV7), ou rana mwafkine 3ala kararatek, ou nenchdou ala ahwalek, (merde langue de bois de TV7).
Bref, nous somme d'accord a mon nom et au non de ceux qui sont dacc ou pas dacc.
;)
ciao

Anonyme a dit…

عدت والعود أحمدي يا بيغ تراب بوي، يا خويا نستناو فيك عنا برشة

Anonyme a dit…

مرحبا بيك في مدونتك سي ب.ت.ب, لا عاد ماعادش تعاودها ها العملة و تفصع علينا و تخلينا من غير تنبير, و الله أنا كيفك ها البرنامج هذا لا يقول شيء بلاش بيه خير ماشي في بالهم يغموا في الناس و هوما يغمو في رواحهم و عارفين اللي ماهو مصدقهم حد آمه زعمة زعمة شوية ديمقراطية قطرة قطرة , يا خويا بالسماح فيها و ما بيناتناش أحنا نستنو فيها من عام 65 ميسالش نزيدو نستنو 5 سنين أخرين ع الأقل, بالطبيعة بعد2009. من جهة أخرى وقت ندور في الشارع نلقاه معبي بالبنات المزيانين و الاولاد البوقيسين آمه في التلفزة ما نشوفو كان وجوه اللوح ! علاش زعمة؟ ماو على خاطر تونس77 عمرها في حياتها عملت كاستينق كل شيء بالأكتاف , نتصورو مدير البرمجة و قت يفد من النوم و الفصعان من الخدمة كيما 80% من المسهولين, يعيط للحاجب و يقلو : بربي شوفلنا وليد عاقل و ياخو الراي باش يعمللنا برنامج جديد آوكه من حينو يشوف ولد عمو وإلا حماص الحومه سي نون يعمل دورة في مرشي الحوت و يلوج على فقمة وإلا كلب بحر ينشطو بيه الحصة , توه يا رسول الله في تونس كامله مالقوش وجوه باهية تزهي الشاشة الصغيرة و نكحلو على ربة الوجه الصبوح كيما في لبنان , ياولدي أكبر مصيبة هاذيكة الجلغة اللي " تنشط" تي قولو إترقد في برنامج رياضي في وسط الجمعة يضهرلي الثلثاء أو الإربعاء الرياضي , وهي أسمن من السبوعي و أحناكها تقولش مؤخرة حاشاكم , وباش ما إنطولشي عليكم بالله ما فديتوش من البرّاق الي ملي إخترعو الصلاة و هو الوحيد الي يؤذن مكتسح الساحة الآذانية في تونس7 يا ولدي ماثماش واحد غيرو في تونس تي نوعولنا شوية باش الناس ما إتفدش على ماهي فادّة ، آيا آنستم

Anonyme a dit…

@ batta: ma femma ken wjouh ellou7 bech tmares el lissan el khachabi!

elli fih el hwan el koll mché yendeb fel 9anawat al khalijia!

Anonyme a dit…

Bonne chronique. TT est vrai. J'aurai aimé le signer moi même, qui suis à la télé. Bravo.
La presse tunisienne - principalement "al-çarih" où pige cette geule qui anime ce faux témoignage télévisé- qui se vante d'être le miroir du peuple devrait le publier (en vs assurant les droits d'auteur = 7 DNT par exemple), elle gagnerait en lecteur... Chapô encore et bonne continuation.
PS: l'animateur du "débat" n'est pas et n'a jamais été journaliste. Si le métier ronfle, ce serait l'apnée que de lui adjoindre de flagorneur... Nous n'en manquons pas.

الكاتب a dit…

لول زايد معاك ياولد. والله العظيم ولّيت "خايف" عليك يا كازي...

بالله قل لي، الأخ الفقمة، يطلعشي هاك الكبّول اللي كان شادد نفس القلم على قناة "حنّبعل"؟ (سكّرت والاّ مازالت بالله هاك القناة العظيمة؟)

حاصلُه يعطيك الصحّة على هالتدوينة البنينة..وبرّه ليلتك زينة

Anonyme a dit…

Maw el kollha dekhla bel akteff.

ena surtout elli kle 3la qalbi we chrabb howwa : "Sami el Fehri" , ya7ki tqoul bandy !

ama 3la position 1 of my Blacklist : "NIZAR CHAARI"
yekhouya mamstou , tawwa behy we7id y3ich fel kharej we yqoum 3assbe7 y7ib yesma3 kilma tounsiya , yelqa edhmar mte3ou elly yrakkbek essokkorr,we hak el mawadhi3 el merga !
TROP C TROP.

Anonyme a dit…

fetek ma9et akber cette premiere quansaine du mois, kriss, kils sont cns pour nous prendre pour des cons
j'ai aimée le bout de BD ;)
bon retour si flen

Anonyme a dit…

mar7ba bil trap el kabir !!
ettadwinat hadhouma matal9ach minhom barcha !
koll kilma fi blasetha ... w ma tkassarech errass ki ta9raha ...
LUXE !
khfifa ndhima ..
7asan wasil
...

Anonyme a dit…

wallahi 5sara ki netdhakkér elli ana ma 3andich telfza w nratti fi les emissions kima hakka nakol swab3i w ana nesma3 fel 3bed te7ki 3liha men ghodwa.. d'ailleurs ken bech nkammel chwaya a5or bech nwalli ntapi b5achmi wala meme b7aja o5ra (****)...
fel inché2 ken el profett dima yektbouli HS, 7atta lin fhemt'ha nhar w ana fi taxiphone..

roy mustang a dit…

salut BTB (comme tous le monde t'appelle ici apparement) ton blog est vraiement bien faits profond respect à tes idées... tu sais vraiment ta raison j'ai fais gaffe la dernière fois à la télé.. il ressemble vraiment à un phoque... j'aimera bien si c'est possible que tu visite mon blog...
http://20ansapreschangementdu7november.blogspot.com/