mardi, novembre 13, 2007

عــودة الــمــدوّن الضــّــال


هيّا سيدي قلنا السلام عليكم وأحلى تحية لأحلى جمهور

كيف ما يرجع الفرططو للنار اللي تحرقو، وكيف ما يرجع الجواب اللي من غير عنوان للبهيم اللي بعثو، رجعت في وسط الأسبوع اللي فات لأرض الوطن الحبيب، ولاّ هي لهالبلاد الحرفة، في صحة جيدة وخير ونعمة والحمد لله. تقولو انتوما إمالا وين كنت غاطس يا سي الشباب؟ ظروف سيدي الرئيس، والله ظروف.

على كل حال لازمني قبل كل شيء نشكر الناس اللي بعثولي إي مايلات يسألو على أحوالي ويطالبو بتدوينات جديدة بما أنو يتعذر عليّ باش نجاوبهم بالواحد بالواحد. وهو كيف تجي تشوف عندهم الحق، خاصة وأني غبت في مدة اللي صارت فيها برشة أحداث وفيها ما تحكي ما شاء الله. على كل حال باهي كيف الواحد يتحكم في المدونة متاعو وما يخليهاش هي تتحكم فيه، على خاطر هالمدونات هاذي كيف تستانس بيها تولي كيف مرتك، يعني تنجم تلهيك على برشة حاجات ما أهم (البنات ما تتغششوش راهو نفدلك وبرة، إنتوما خير برشة من هكة بالطبيعة).

الأسبوعين هاذم
كنت في شبه عطلة واستغليت فرصة أنو الانترنات كان مقصوص عندي باش نكتب أما المرة هاذي موش للمدونة ولكن في إطار عمل "شبه أكاديمي" كنت أهملتو في الفترة السابقة وقلت هاذي فرصة باش نقدم فيه، وكيما يقولو زيادة الخير ما فيها ندامة. وليت عاد خوكم مشيت دفعت هاك الفاتورتين متاع "اتصالات تونس" و "كوكب تونس" كيف الراجل وعدت لبيتي فرحا مسرورا وأنا ندعي باش فلوسي تكون مشومة عليهم. بصراحة ساعات نحس أنها معاليم الأنترنات هاذي نوع من التاكس الزايدة ندفع فيها للحاكم وقاعد نخمم بصفة جدية باش انحي والديه هالأنترنات متاع خمسين دينار في الشهر والكونكسيون الحموم وشطر المواقع مسكرة. عاد نمشي نعطيهم لواحد فقير يشري بيهم شوية قاز يدفي بيه صغارو في هالشتاء موش خير؟

على ما يبدو برشة حاجات صارت في غيابي خلال الفترة هاذي على ساحة المدونات التونسية، وحسب ما فهمت آخرها هي أنو الحاج صالح الحاجة عمل هجوم معاكس على المدونين، وأنا فرحت كيف سمعت، على خاطر في بالي باش يطلع تكلم على مدونتي وإلاّ سبني، على خاطرني ما نخبيش عليكم، وعلى عكس برشة ناس أخلاقهم ما تسمحش، ما عندي حتى مشكل باش نسب راجل كبير، خاصة كيف تبدى صفة الكبر ظاهرة عليه أكثر من صفة الرجولية، أما للأسف كلام الأستاذ صالح الـ-موش-حاجة طلع حسب ما فهمت على مدونة البودورو وما قال شيء على الكشطة اللي كنت وجهتهالو في السابق، وهذا بالنسبة لي نعتبرو قبول ضمني للجائزة اللي مازال ما تسلمهاش، وبالتالي نشكرو على روحو الرياضية العالية. على كل حال ننصح الزملاء المدونين بصفتهم مواطنين محترمين باش ما يدخلوش في جدال مع عصابة الصبّابة باش ما نقولش الصحفيين، على خاطر باش يردونا "مواقع مشبوهة" ويمكن حتى إرهابية المرة الجاية وبرة عاد آش باش يسلكها.

حاسيلو باش نختمو ب"حاجة" باهية المرة هاذي، حبيت نقول نقول برافو للقناة الدولية لإذاعة تونس، يعني بالعربي "آر-تي-سي-إي" اللي قاعدة ترجع في مستواها المتميز متاع أعوام حسبناها مشات وما ترجعش (كيفي أنا والفرططو والجواب اللي حكيت عليهم في أول التدوينة). أنا شخصيا ما نسمع الراديو كان كيف نبدى نسوق وما عنديش ما نسمع، خاصة وأنها ميولاتي الموسيقية خصوصية شوية وماهيش متاع راديو، وزيد من نهار اللي صدمت علينا تفاهات الموزاييك وليت نكره كل ماهو راديو، أما البارح وأنا راجع في الليل من رادس لتونس عملت كيف على حصة
"plein cap"
اللي تقدمها مذيعة إسمها فاطمة. حاسيلو عفسات موسيقية متميزة، هذا بالطبيعة مع رجوع هيكل بالحصة الممتازة
"couleur bleu nuit"
لأحباء السول ميوزيك ومشتقاتها، والله حاجة باهية وما فيها باس الواحد يشجعهم حتى بكليمة حلوة. على الأقل مازال فما ناس عندها شوية ذوق في البلاد. من ناحية أخرى وباش ما ياخذوناش أعداء الوطن بالعين، أهوكا كل سويعة لازمكم تحملو شوية لغة بلنزية في نشرة الأنباء، أما جاب ربي الكفار صنعولنا فلس تسكّت الراديو وترجّعو يخدم وقت اللي يظهرلنا. هيا توة ننزل على فلسة التدوين ونرجع نخدم على نفسي. ا


20 commentaires:

Soapsalesman a dit…

If this is your first night at FIGHT CLUB, you HAVE to fight

Yottil a dit…

Salut BTB! Bon retour et bon courage pour ton travail!! :)

Adnen Mansar a dit…

enfin tu reviens!! bon retour au pays des merveilles, et à la blogosphère tunisienne.

Adel a dit…

bon retour sur la blogosphére l'ami. excellents choix musicaux au passage, maatech tghib barcha alina.

stupeur a dit…

bjeh rabby ech mjayybik?

Half of my Life a dit…

bon retour big trappa!

samsoum a dit…

Wallahi, j'allais ecrire un post ce soir "BTB reviens!". Quelle coincidence que tu reviens ce jour meme. Ayya marhba fi bladek :)

gouverneur de Normalland a dit…

Bienvenu BTB dans le "blogage" tunisien a nouveau.

Big Trap Boy a dit…

@ soapsalesman: bien sur, on ne va quand même pas oublier les règles du club :))

@ yottil, adnen mansar, adel et half life:

Merci, ça fait toujours du bien de voir la blogosphère s'enrichir de nouveaux blogs. ;) Ayya marahbé bikom fel club.

@ stupeur:

elli hazzni jébni :p. Ayya wa9téch tji thézz 3léyya mté3ik? :))

@ samsoum:

ça alors! si je savais j'aurais attendu demain! Comme ça nwalli "back by popular demand" :)) En tout cas merci pour la pensée que t'as eu pour moi.

@ gouverneur:

Merci, marahbé bina el koll fi les blogs mta3 google. :)))

ولد بلاد a dit…

عودة ميمونة....وميمونة تعرف ربي...
عندي سؤال نتصور ولاد حومتك الكل سالوهولك .... علاه روحت...فم شكون يخرج مالحفرة و يعاود يرجع :)))
...
ربي تستر لا تطلع تحب البلاد... وقتها نقلك....مزمرة عليك...
ساريو الحمد الله عالسلامة....

jano a dit…

contente de te lire enfin!! vraiment tgaynit barcha ces dérniers temps , w mal9inéch ech koun yfarahdilnna 3ala 9loubna chwaya avec tous ce qui ce passe ces derniers temps!!
haya barka ektib w na7na M3ak ya BTB!!
inchalah ziyara ma9boula
ya7ya btb !!ya7ya btb!!:))))))

stupeur a dit…

Ya weldi quand tu veux
mo 9olli enti wa9tech dispo
bech nhedd alik hakkeka ?

en plus mani 9otlik lezem nhezzek ngharr9ou chwaya !

YOYO a dit…

Bon retour BTB, rebienvenue dans la blogosphere :), excellents posts comme tu nous as habitué ;)

yes_in a dit…

3andi barcha 3ala tadwina mithkhma kima hakka !
t7iss famma insan 9wii wraha !
Bravo ... wasil ..

النسر الأسود a dit…

لووول مرحبا بيك يا سلعة
:-)

والله توحشّت ضمارك يا ماسط، ياللي ماتحشمش، ياللي ماتقدّرش الصبّابة الكبار
:-P

أمّا باقيها، عندك الحقّ فيما يخصّ اذاعة تونس الدولية، نفضّل مليون مرّة إذاعة تحكي بلغات أجنبية صحيحة وفيها مذيعين محترمين ومتميّزين على إذاعة متخلّفة كيفما موزاريق، فيها منشطّين متخلّفين لا فلحوا لا بالعربي لا بالسوري . خلّي من مستواهم الثقافي الضحل اللي يعدي بالجرب الفكري والقمل الذهني والتسطيكة البقري...

هيّا ماله، عودة ميمونة الى أرض الوطن، وربّي معاكم طيلة العشرين السنة الجاية من الرخاء والإنجازات الباهرة والديمقراطيّة الأصيلة والنظرة الإستشرافية والمقاربة الشاملة لحقوق الإنسان والخ الخ...

وماتنساش تعمل طلّة ساعة ساعة على هاك الحوينتة وتقول لي الباب محلول والاّ سكّروه أولاد..الحلال

;-)

Arabicca a dit…

أهلا أهلا
ومرحبا بيك
خليت بلاصة

El9aroui a dit…

thonytemara7bè bik ,ama rod belek et7ell tounis 7 marra o5ra...
romdhan haw 9rib

El9aroui a dit…

mara7bè bik fi bledek ama rod belek et7ell tounis 7 marra o5ra ...haw romdhan 9rib...

Anonyme a dit…

bon retour BTB, même avec un peu de retard. brabbi a propos d'RTCI, a tu par hasard l'email de haykel bouzouita. kad ma fhemtech les raisons de son départ il y quelques années, kad ma son retour m'a fait énormement plaisir.

Big Trap Boy a dit…

@ anonyme:

non , je n'ai pas son email même si ça me fait vraiment plaisir qu'il soit de retour.