mercredi, juillet 23, 2008

نشرة أنباء جربوعستان : دار "البيجو" تسطو على مدوّن أعزل وبلديّة تونس وكيّاساتها ...الزفت

كنت جبدتلكم في التدوينة السابقة على كرهبتي إلّي شويّة لا حرقوها الهوكش في الستاد (لمعرفة آشكون المقصود بكلمة الهوكش يمكن الرجوع إلى تعليقاتي على التدوينة السابقة)، وهذا باش يخلّيني ننتقل بيكم بسهولة إلى موضوع التدوينة الموالية ألا وهو ما صارلي مع الكرهبة خلال الأسبوعين إلّي تعدّاو.

خوكم مشيت كيف الناس الملاح هزّيت "التراب-موبيل" الجديدة متاعي نصلّح فيها، أو بالأحرى "نروشك" فيها، عند دار البيجو أو ما يعرف بشركة "ستافيم" للسفدة الموصوفة، قلت لواش نقعد نكسّر في كرايمي مع الميكانيسيانات والخدمة العربي متاع "البريكولاج"، خلّي نعطيها للدار يخدموهالي على قاعدة ويخلف ربّي كان تكلّفت أكثر شويّة.

أنا على فكرة هكّة في طبيعتي إنسان نحبّ الخدمة المخدومة على قواعدها ونقدّس "البروفيسيوناليزم" ونشيخ كيف نتعامل مع ناس محترفين (ولو هذا ما يصيرش بكثرة في ربوع جربوعستان) ونبدى عامل عليهم بون كيف ونقول بقلة ليها، الفلوس تمشي و"البروفيسيوناليزم" يجيبها.. أما يا خويا ما كنتش نستنّى في لطخة كيما إلّي صارتلي المرّة هاذي!

حاسيلو آش باش نحكيلكم؟ لا الخدمة خدموها كاملة ولا الآجال إلّي تفاهمنا عليها إحترموها، ولا شاوروني كيف باش يبدّلو قطعة ما كانتش داخلة في الحسبة، وزيد على هذا يجيبولي فاتورة تقولش عليها فاتورة إعادة إعمار العراق، بعد ما الكرهبة ضربت أسبوع مطيّشة عندهم... حاسيلو شربتها المرّة هاذي كيف الناس الملاح وما بقالي كان الدعاء على دار "البيجو" يرّاها مخليّة على راس أمّاليها والرهوط إلّي فيها، الله يعرّيهم كيما عرّاوني ويسلبهم كيما سلبوني، قولو آمين، آشبيكم ساكتين؟

باهي أخطانا من البكاء على هاك الزوز صوردي (قاعد نطلّع لروحي في المورال)، خلّيني نتعدّى لموضوع آخر داخل في صلب الموضوع هذا وحبّيت نحكي عليه بالمناسبة هاذي متاع الإعتداء على القنفلاش متاعي في وضح النهار وعلى مقربة من مركز نهج بارتو أو ما يسمّى ببورجل.

الموضوع الثاني هو الحالة المزرية أو المحزنة أو المقوّدة أو التعيسة أو أيّ وصف مرهّز آخر تنجّموا تلقاوه، واللي بالتأكيد ينطبق على حالة الشوارع والكيّاسات في وسط العاصمة وبالتحديد في المناطق التابعة لبلديّة تونس. بلديّة تونس عندي معاها برشة حكايات وروايات ماهوش هذا الفضاء باش نحكيها، وزيد نعرف مليح أنّها ماهيش مفوّلة عليها برشة في الفترة هاذي، أما يا رسول الله راهو شيء ولاّ يعمل العار، الريف مع كلّ إحترامي ليه ما عادش فيه كيّاسات محفّرة وخايبة كيما إلّي عندنا في وسط البلاد، يا ناس إحشموا على أرواحكم (كيما يقول الكابتن خالد حسني)، راهي العاصمة يا دين الربّ، توّة معقول في شارع الجمهوريّة قناطر بالمليارات ومشاريع عظمى متاع وزارة التجهيز و"سما دبي" في راس النهج، وبجنبها كيّاس كي تسوق فيه تقولش عليك راكب على كرّيطة من كثرة الحفر؟ ياخي الكيّاسات هاذي مركّبينها "جوتابل" كيف موس الحجامة، تخدم عويّمين ومن بعد تتكمّش كيف وجه العزوزة؟

الأدهى من ذلك يا جماعة أنّو ما يكفيش الكيّاسات بكلّها حفر وتضاريس تقول جبال تورا بورا صبّوا عليها الأسفلت، وزيد يجيبولك هاك المطبّات متاع التقليص من السرعة أو ما يسمّى بالفرنسيّة بظهر البهيم، يعني "دو دان" كيما تقول إنتي، وتلقاه لا بلاكة قبلو، ولا دهن ينبّهك لوجوده ولا هم يحزنون، وقدّاش من ألف مرّة تصير أنّو واحد يشدّ فرينو على "دو دان" من النوع هذا وشويّة لا يعمل حادث، وهذا كلّو باش البلديّة ما تخسرش حكّة دهن أصفر وإلاّ بلاكة واضحة. تي هو فمّا "دو دان" منهم في "ميتيال فيل" قدّام مركز شرطة ومقرّ الدائرة البلديّة بيدها، بالله العظيم على قدّ ما نحاول ولا نجّمت نراه وكلّ ما نتعدّى نحصل فيه بالرغم أنّي نعرفو مليح ونبدى نلوّج عليه بالفتّاشة وباقي النافع ربّي! خلّي عاد من هاك المطبّات إلّي كيف يعملوها، في عوض يركّبولها "دو دان" يجيبولك "آن" كامل ويفرشوه على الكيّاس، يعني في عوض ظهر البهيم يجيبلك البهيم بيدو ومعاه بردعتو، ويحطّلك هاك الجبل في وسط الكيّاس تقولش باش تتسلّق دين أمّو موش باش تنقّص من السرعة!

بصراحة ولّيت نحير كيفاش الإنسان إلّي يسوق في تونس العاصمة ينجّم يستحفظ على كرهبتو (بخلاف الحالة إلّي يستحفظ عليها بتركها في "القاراج" بالطبيعة)، على خاطر بالنسبة للّي ما عندوش "هامر" أو أي كرهبة أخرى متاع رالي، فإنّو من المفروض أنّها الكراهب تصنعت باش تمشي على كيّاس معبّد ومستوي كيف الزربيّة، كيما مثلا الكيّاسات الكبار إلّي ينجّموا يعرضوك وإنتي تسوق في شيرة المرسى، سيدي بوسعيد، قرطاج، الحمّامات، يعني، هاك البلايص إلّي يتعدّاو منها الناس إلّي بيهم الفايدة موش الرعاع إلّي يسوقو في كراهب ماهيش متاع رالي. وبالتالي فإنّك كيف تشدّ كرهبة عاديّة متاع مواطن عادي وتبدى تخضّ في دين أمّها كيف باكو اللبن على كيّاس مخشلف تقول تحوّس في أدغال تانزانيا وإنتي في قلب عاصمة الجمهوريّة التونسيّة وما أدراك، فإنّه من العادي برشة باش هاك الكرهبة المسكينة سعدها يتكبّ وترصّي لمولاها (مكبوب السعد هو الآخر) يصلّح فيها عند "ستافيم" وأخواتها الله لا تخلّصلهم وحلة (أعطيني هاك الضريبة "آمين" على رحمة الوالدين).

كيما تشوفوا، خوكم ضحيّة لمؤامرة كيديّة تحالفت فيها قوى التكربيل ورزق البيليك في القطاع العام مع قوى الغورة والنطرة في القطاع الخاص، بحيث الناس هاذوما خايفين منّي لا نلمّ طرف فلوس ونمشي نعرّس ونجيب صغار يمكن يطلعوا كيفي عناصر مشاغبة في المجتمع، وبالتالي فإنّ الهدف متاعهم على المدى المتوسّط والبعيد هو الإبادة الجماعيّة للفصيلة متاعي من وجه الأرض بإستنزاف مواردي الماليّة وإستباحة قنفلاشي للّي يسوى واللّي ما يسواشي، ولكن هيهات هيهات، فأنا لكم بالمرصاد يا أوغاد، يا تصلّحوا الكيّاسات يا باللازمة نعمل حملة تدوينيّة باش الناس تطلع تسوق على التروتوار، وخلّي المترجّلين يهبطوا يفحّجوا على الحفر.. وإلاّ يا خويا كيف إنتوما عاجزين على التصليح سيّبو علينا من الكراهب والكيّاسات وخلّينا نحفروا في بلاصتها وديان ونولّيو كيما في "البندقيّة" نسركلوا بالفلايك وبأقلّ هرجة وحوادث مرور.

بجاه ربّي يا مسهولين كان فمّا منكم آشكون يقرى راني مانيش نفدلك المرّة هاذي، أعطيو شويّة فلوس لبلديّة تونس خلّي تصلّح الكيّاسات راهو الشيء فات المعقول ببرشة مراحل والفلوس إلّي باش نربحوها بالتقرنيط الزايد ما تعوّضش الخسائر متاع توريد القطايع لآلاف الكراهب إلّي قاعدة تتخضّ كيف الشكوة كلّ يوم، وخاصّة ماهيش باش تعوّضنا على الصورة المتخلّفة إلّي يظهر عليها وجه البلاد قدّام الناس، راهي حاجة تعمل العار.





جربوعستان تتمنّى لكم طريق السلامة

28 commentaires:

Stupeur a dit…

bellezma ya biga 7ali ki 7alik!
mouch el marra lokhra mchit n3addi fel visite technique 9alouli 3andik suspension arrière mouch lak el koll, mchit nsalla7 fiha 3and si peugeot houa bidou, nadhrbilha w7ayda fatoura ennama ih! 9rib el 600 dinar fi jard suspension arrière ou durite mta3 mé!

ou hakl suspension bech tethlik brabby?
bel zrabi elli nchoufou fihom?
ti mo bel kayasset el 7moum elli nsarklou 3lihom, ti wa7ed walla yrawa7 dhahrou youja3 tellement el karhba tvibri!

Ignescence a dit…

Si je suis renvoyé de mon boulot, je te tiendrais pour responsable BTB, 20 minute de fou rire :D je ne pouvais me retenir :D
Mais pour revenir au sujet, t'as rien vu de l'état des route ailleurs que la capitale, une catastrophe du genre Hiroshima! Par exemple à Mahdia, la route qui passe devant le gouvernorat et la cour de justice est dans un tels état que je propose une étape spéciale du futur Paris Dakar qui devra passer par là!
C'est la honte pour un pays qui se félicite de l'organisation des JM, coupe d'Afrique, du SMSI, ...etc. alors que le peuple roule sur un faux semblant de routes!

Walid ben omrane a dit…

hahhahha, Ras malaha ndawruha bssakel w kraret fmach ma naqsu m CO2. Inchallah maysirech lil 3asma ma sar l Midoun. 10 snins w hiya fi 7ala kayassat m7afra w dos d'âne fi kul blasa w tawa ki riglu elkayassat nssaw l'Onas w el 5edma sagadi mta3ha w ili 5alat Midoun tfidh fi sa3a...

Ouss a dit…

T'as tout dis.
Merci Trap pour tout ce que tu écris... C'est toujours un vrai régal lire tes posts...

Anonyme a dit…

hahahaha ya 3attay :)

Fontomas a dit…

Sujet énorme mon cher BTB!!
Toi tu parles des rues de la CAPITALE, eh bien regardes l'état de disons la moitié de l'autoroute Tunis-Sousse, on dirait des montagnes russes (la vitesse donne cette sensation). Moi ce que j'en dis c'est que les gens qui décident pour ces projets ne sortent pas de leurs bureaux et je dirais même qu'ils n'ont même pas de voitures, ah non j'ai oublié ils conduisent une voiture de fonction, si elle tombe en panne on (L'état) la répare GRATOS, c'est pour ça, quel con j'étais en oubliant ça!!!!

Anonyme a dit…

je suis le premier a commenter hehhe

khalij a dit…

Ena mafhemtech hal vignette elli n5allas fi bouha kol 3am lechnou tesla7 normalement kif ma eddawla te5eth fi ma3loum jawalen a7na zeda ne5thou ma3loum tesli7 el carhba men jrayer el kayeset ezzebla

foufou08 a dit…

اعمل طلة على صفاقس وكياساتها سامحوني تقصد البيست الي فوقها شوية زفت. انتم في تونس تسماوا في رحمة قدام صفاقس مثلا شوف طريق قرمدة تو ما قفل حتى العام بعد ترافوا متاع عامين وكياس محفر وداخل بعضوا.
أما عندك الحق يلزم في جربوعستان نعملو كياسات على قاعدة تليق بجربوعستان خترنا كيما يقولو قاعدين نعملوا في مشاريع كبرى وزيد نحبوا نخلطوا على البلدان المتقدمة

Afrah a dit…

Salem

Sar hia esmha do dan?????????

ena 3ala ma t9alla9ni fi sié9a ( fi barcha kayasset nchahed ki net3ada w mankalich el karhba )mechi fi béli elli esmha deux anes ;)

Merci big dha7aktni barcha

Tulkas a dit…

Bizarre que ce sujet devient à l'actualité tout d'un coup, je viens de recevoir sur un des sites tres intelligents et dont j'arrive pas a me désabonner (hi5 ou facebook je ne sais plus) une invitation pour un groupe dit de "reflexion" et qui essaierait de trouver une solution au manque de civisme des tunisiens.
L'idée en soit est interessante mais sans vouloir être pessimiste hal yanfa3ou adahrou...

Tulkas a dit…

Tiens ca fait un bail que je n'ai pas posté, désormais tu filtres tous les commentaires BTB ?

Anonyme a dit…

bsara7a ana faddit mil 7for, wil 3wejj,wil boulis il mot5obbi wra chojra fi stop ma ye9if fih 7add, wil professionalisme illi ma femmech, ou dar il renault, ou dar il peaugeot, ou dar il ford yirraha tay7a, ou tunisie telecom, wil 9alba, ou sawwitchi wadh3itik, wil wajib il watani, ou boulis m7allaf, ou chkouni hadhi illi m3ak (chihimmik fi z**k ommha, wil jboura, wil l7i, willi srewilhom 9sar,will mit7ajjbet attahirat, willi ysou9ou fil ISUZU, wil na9l irrifi,
yekhi hajjit ou tawa irta7t.

Ya7asra a dit…

ilcha3b m3ak ya BTB!
ken tracha7 rou7ik ra2is baladiyyet tounis ninta5bouk bnisbet 99.99%

Hichem a dit…

5ouya big mezelt ki sala7t el peugeot mta3i we déja sarli m3aha 7kayat we farhadtni yar7em waldik ki jbedt hal mawdou3 5ater tsafedli marra m3a stafim and 5ouk 5ebra kan t7eb 3andi vaseline marka peugeot kan teb enajem na3tik chwaya darba darba lel tasfid ama rod ablek testa3mel marka o5ra 5ater tanjem ta3melek el 3odr ellotf 3lik

tbib_3arbi a dit…

hhaahahahahahahahahahahahahahahahahahahahahahahahahahahahahahahah
ahahahahahahaahahahahahahahahah
hhhhhhaa
O7o777

oueld megrine a dit…

famma kayess en parallele m3a les rails entre megrine ryadh et sidi rezig, devant l'institut sup de magistrature; el hassilou je ne comprend pas kifesh fel hala hedhika depuis plus 10 ans quoique zone hedhika fiha les hamrouni wel mzabi weddenia lkoll

charismatic a dit…

Ta3rif Trappa...kéyesét tounis dima "rahma" quand on les compare il kéyasét de la majorité des pays de l'Afrique.
Apparemment tu rêves de kéyasét à l'Européenne. Oui pourquoi pas..on peut rêver comme on peut rêver de beaucouuuuuuup d'autres choses à "Jarbou3isten".

Mais en fin de compte on revient toujours au même problème...le MANQUE DE PROFESSIONALISME...un manque qui s'explique par une multitude de raisons que tu as pas mal évoquées dans tes posts .

Anonyme a dit…

و الله ربي يهديك حيرتلي المواجع اما الحاجة الي تفرح الي ظهر فما شكون تحشالو كيفي اما انا حشاوهالي جماعت دار النقل لصاحبها,,,,,,
انت "او موان" بالعربي "على الاقل" تخدم انا خوك بطال منين جاني
حسيلو يخلي "دار امهم" الديار الكل قول
امين

Anonyme a dit…

Tout ça est beau, sauf que c'est pas spécifique à Tunis. Au contraire, si on fait une comparaison entre les villes, les rues et axes de Tunis sont les meilleures. Je ne voix pas pkoi tu répètes rahi el 3assma, c'est pas pasque c'est la capitale qu'on doit subventionner la Mairie de Tunis au dépend des autres.

On a souffert des années avec une politique pareille avec la municipalité de Monastir qui reçoit des subventions men 7aythou lé ta3lam, on le vit aujourd'hui avec Sousse et Hammam Sousse, devenue Beverly hills, donc SVP qu'on fasse une politique équitable entre les régions, gallou c'est la capitale ya din errab.

Zaraf a dit…

pff...samahni fik ya big
qu'est-ce que tu foutais fi jarbou3-city sans H2??
jibtha il rouhek!
chi nous fil beau-lieue, on refait les kayesset tous les 3 mois au moins
manquerait plus que tu me dises que tu prends le métro tawa...c'est dangereux: hier, 1 ouvrier, conducteur d'engin de travaux publics est décédé (sans parler des nombreux blessés) car sa pelleteuse a heurté et fait exploser une conduite de gaz au chantier d'extension du métro d'el mourouj

pff..t'exagères

ARTticuler a dit…

بصراحة عندك أسلوب في الكتابة بنين برشة..إلى درجة كوني وليت نتمايل فوق الكرسي تقولش علي نسوق في كرهبة في شوارع تونس :-))
كنت اقترحت عليك في مناسبة فارطة الكتابة للاطفال ونعاود إقتراحي من أجل محاربة غياب البروفيسيوناليزم في ها البلاد والوقوف في وجه الإبادة الجماعيّة للفصيل متاعك ..هههة

Anonyme a dit…

شعار بلدية تونس:

مقلقتكم الحفر يا رجالة

إمالا أهايا الشنقالة

Anonyme a dit…

Ti winek ya BTB, aujourd'hui 3id eljoumhourya. Nestannaw fi post men naw3 eljoumhourya elbanania ....

Anonyme a dit…

kanikk rajil ya big trap boy
et la3ebha wa3i et methakiff
3allik 3al video hetheya:
http://www.dailymotion.com/relevance/search/tataouine/video/x5nl3x_martyre-des-emeutes-de-redeyef_news

Anonyme a dit…

bara ya trap yarham weldik fi hal hkeyet éli twa3i bihom fi l3bed elli malheureusement 95% mihom hayawanet grace au system etahfoun mta3 hata rab jarbou3estén barcha fi rabha. bref 3andi ham kbir enver ttt c qui se passe lezemni n5araj ktoba bich nfarhed. vive la laicite vive la liberte vive la bella vita

Anonyme a dit…

ya ta5alof arretez thantilkom et vos commentaires d atteinte a trap kelmet ha9 walla ray 3and l3riba mta3 smé eli mehom fehmin chay ne plai merde lel jahl

eagleeyez a dit…

ena ma 3andich karhba we zid moch fi tounes, ama 7ass bik ya BTB, netfaker ki kont na5ou fel kar kifah tebda tmouj bina, t9oul flouka fi be7ar hayej ...

el jem3a hadhi win ana saken, badlou el kayass meta3 el nahej, ach bech na7kilek 3al professionalisme meta3 les nords americains, besara7a 7aja tefaded, el kayass fi la7dha 3amlouh, makina 9ad mahi te3adat, ferchetou we mechat, we ba3ed 9adah men couche de je ne sais quoi, ... wel kol mm pas 5 jours, 7aja ta3mel sab3a we setine kif, bon ena ma ya3nili chay, ama netmana lawkan fe tounes newaliw nehar fi rbo3 el professionalisme wel e5lass meta3 el nass eli lena :(