العرب واليهود

حبّيت نشوف معاكم العلاقة ما بين العرب واليهود من خلال اللغة اللّي في رأيي تنجم تكون أحسن مراية نشوفو فيها اللاّوعي الجماعي للشعوب و الحضارات المختلفة

وما دمت مازلت ما تعلمتش اللغة العبرية، باش نحكي بالأساس على اللغة العربية القحّة، و زادة الموش قحّة يعني الدّارجة

توّا نحنا من جهة نقولو "شماتة يهود" و"سياسة يهود" و "ملاّ يهودي" كدلالة على الخبث والدهاء والمكر والتكمبين وسوء النيّة

ومن جهة أخرى نقولو "عظم عربي" و زبدة عربي" و "زين عربي" للتعبير على الجمال الطبيعي والطعم الأصيل

أما زادة نقولو " خدمة عربي" و "سيدي عربي" و "الكرب" و "عربت خربت" للدلالة على المستوى المنحط و النذالة والتخلّف والتبلفيط و الرجعيّة

آش ينجّم يفهم الإنسان مالحكاية هاذي؟

أنا نفهم أنّهم العرب ، وأنا واحد منهم،عندهم مشكلة هويّة، يعني لا عارفين رواحهم باهين كيف العظم العربي ولا مشومين كي الخدمة العربي

و ظاهري حتّى أنهم يعرفو اليهود أكثر مالّي يعرفو رواحهم، ويمكن حتّى يعرّفو رواحهم كعرب باش ما يطلعوش يهود، بحيث كان نفرضو نهار نقومو في الصباح و نلقاو الدنيا فرغت ماليهود، ما يقعدلنا حتّى سبب باش نقعدو عرب. يولّي كل واحد يدبّر ملّة جديدة يلحم روحو معاها وتوفى حكاية العروبة إلى الأبد

أنا ما نحبّش نتدخّل في أمور ما تعنينيش، أما ظاهرلي كان نبداو نعرفو أرواحنا ومشاكلنا ، ومنين جينا، ولفين ماشين، أحسن ملّي نسبّو في الناس بالفارغ