mardi, janvier 06, 2009

إجابة على تدوينة أرتيكيلي حول حرب الطوابير في البلوغوسفير

هذه التدوينة هي عبارة عن ردّ على ردّ المدوّن أرتيكيليي هنا على تعليق نشرته في مدوّنته هنا ورأيت من الصالح إعادة نشره في مدوّنتي تفاعلا مع ما تشهده البلوغوسفير من "حرب الطوابير" في مواجهة العدوان الإسرائيلي على غزّة :

شكرا أرتيكيلي على الإجابة الهادئة وخلّينا نحاولوا نجاوبوا مع بعضنا على بعض الأسئلة..

أوّلا ومن الناحية المنهجيّة ما إنّجمش نجاوبك على سؤالك التالي: "كيف ليس لي واجب أخلاقي للدفاع عن الفلسطينين؟" على خاطر الواجب الأخلاقي والأخلاق عموما هي حاجة نسبيّة وما يكون أخلاقيا بالنسبة لي أو لك ربّما يكون عملا مشينا بالنسبة لغيرنا والعكس بالعكس. كيما تعرف القيم ماهيش هي بيدها عند الناس الكل ويبقى الأمر راجع لكلّ شخص باش يقيّم ماهو أخلاقي من منظوره ولكن حسب أخلاقي أنا الخاصّة إنجّم نقوللك أنّه من غير الأخلاقي أن يفرض الإنسان منظومته الأخلاقيّة على غيره.

باش نرجع للموضوع توّة وباش نتجاوز الإشكال المنهجي ونفترض أنّ الأخلاق تفرض علينا الدفاع على موقف معيّن في الوقت الراهن، لهنا نرجع لتعليقي السابق ونؤكّدلك أنّ هذا ولو كان ممكنا فإنّه لا يمكن أن نتصوّر أنّ "الدفاع" على فلسطين يكون "بالهجوم" على عاشور الناجي أو غيره من المدوّنين وإصدار أحكام أخلاقيّة على موقفهم، كلّ واحد حرّ فيما يفعله أو لا يفعله طالما أنّه لا يرتكب جريمة في حق غيره وتعبير عاشور أو غيره على رأيهم لا يمكن أن يكون جريمة بأيّة حال من الأحوال ومهما إختلفت معاه.

إذا كان نحبّو نبحثوا على مجرمين أو على مذنبين فيما يرتكب حاليّا من مجازر فهؤلاء موجودون في أماكن أخرى وعناوينهم معروفة، ولعلّ توجيه أصابع الإتهام إلى غير المجرمين الحقيقيين هو في حدّ ذاته جريمة نرتكبها في حقّ الضحايا..

فيما يخصّ سؤالك التالي: "ألا تشاركانني الرأي أن وصف الهجوم البري والجوي والبحري لاقوى قوة عسكرية في المنطقة على شعب أعزل بانه مجرد هجوم هو في حد ذاته تبرير للعدوان؟؟" نحب نقول فقط أنّ العدوان هذا ما ستنّاش عاشور الناجي باش يعطيه ضوء أخضر وماهوش في حاجة للتبرير والدليل إعلان إسرائيل أنها لن تستجيب لأية قرارات يتخذها مجلس الأمن فما بالك بما يكتبه مدوّن لا حول له ولا قوّة. العدوان هذا هو لغة القوّة ولا تبرّره إلاّ القوّة بما فيها العسكريّة والإقتصاديّة والتقنيّة والإعلاميّة.

أمّا عن قولك "فلماذا علينا أن نصمت؟ في حين يستغلون هم يوتوب والمدونات و غير ذلك لنشر أفكارهم المغلوطة؟؟" فإنه حسب ماني نشوف حتى حدّ ما سكّت حدّ على الأقل على المدونات، ما نصمتوش إذا نحبّوا ولكن زادة إلّي يحب يصمت هو حرّ، أما إذا كان باش نتكلّمو فقط باش نقوموا نوجهوا لبعضنا في الإتهامات أو نصدروا على بعضنا في أحكام أخلاقيّة فهذا يولّي الصمت خير منّو.

وفي خصوص قولك "اسمح لي أن اختار الى اي الفريقين انضم" فهذا أمر مفروغ منه، لازمني نسمحلك والناس الكل تسمحلك تختار لأي الفريقين تنضم، ولكن زادة لازمني نسمح لعاشور وأزواو وأيّ شخص آخر ينضمّ وين هو يحبّ ينضمّ ويدافع على رأيه.

هاك تشوف في بعض الناس كيفاش وصلت عملت مدوّنة خاصة بالتصدّي لما أسموه بالطابور الخامس وهو حسب قائمة المدونات المستهدفة والمذكورة طابور كلّ من يخالفها في الرؤى الرجعيّة متاعها، هذا آش يتسمّى إذا كان ماهوش فاشيّة وبهامة وتخلّف؟

أما بالنسبة لما يلي: "ثم رأيت بعض الأصوات تلحق الاذى باليسار الذي يشرفني أن انتمي إليه أليس لي حق الرد و فضح مواقفهم؟" حبيت فقط نشير إلى أنّك لمّا كتبت حطيت العلمانيين في عنوان التدوينة وهذا ماهوش فقط اليسار، أنا مثلا علماني أما يمين مانيش يسار، وعلى كلّ حال يبقى دفاعك على موقف معيّن حاجة مشرّفة مادمت ما تجاوزتش هذا إلى التهم بالعمالة والتخوين كيما البعض عملو.

يبقى فقط أني أختلف معاك لمـّا تقول "وإختار البعض الكلام وهو أيضا حرّ طالما إرتقى بمستوى كلامه" على خاطر آشكون يقول إلي أنا إرتقيت ولاّ إنتي إرتقيت بمستوى كلامنا ولاّ لا؟ هذا تقييم ينجم يكون منطلقه الذوق متاع القارئ أو منظومته الأخلاقيّة وفي كلّ حال بيننا وبين كلّ المدوّنين زرّ نضغط عليه ويحمينا من كلّ الشرور.

17 commentaires:

Anonyme a dit…

Ti winek mel owel :)

kosksi diary a dit…

هاك قلتها وحدك : الزر

:D

Gouverneur de Normalland a dit…

أنا يضهرلي النقطة البناءة و الي قاعدة ترجع في كل المواضيع و التدوينات هي علاقة اللائكية باليسار

أنا يضهرلي كلمة "يمين" أو "يسار" يلزم نحكيو فيهم بالقدى لأنه فما خلط كبير في المفاهيم

MOmo a dit…

Je suis d'accord avec se que vous dites ,discuter c'est le bon sens à suivre pour les humains (et les tunisiens aussi).
(winek trapboy 3andna modda 3la makatibek?)

Anonyme a dit…

Oui, il est claire que certaines notions méritent d'être éclaircies à propos de la laïcité qui n'est pas l'apanage d'une famille politique bien que la droite a été toujours connue partout ailleurs par son conservatisme, donc son attachement au religieux!

ART.ticuler a dit…

اشارك نورمال لاند وخنوف ضرورة تحديد بعض المفاهيم أما سياسة الزر فهي سياسة لا تجدي نفعا وهذا حسب رأي طبعا

ART.ticuler a dit…

نقاش أرجو أن يتوسع : ردي إلى وليس على بيغ
شكرا بيق للرد وما يسعدني فعلا واتمنى أن يكون هذا حال كل المدونين فيما بينهم هو هذا النقاش الرصين والحضاري.
أحاول الاجابة على بعض ما ورد في ردك:
اتفق معك تماما أن الأخلاق ليست مطلقة وأنها تختلف من ثقافة إلى أخرى ولم لا من شخص إلى آخر غير أنه و كما في الرياضيات هنالك ما يسمى بالبديهيات و التي نؤسس عليها هنالك أيضا في حقل العلاقات الانسانية ما اسميه الحد الاخلاقي الأدنى أو البديهي الأخلاقي ومن ضمنه الوقوف إلى جانب المحتل أرضه وإلى جانب الأبرياء من الأطفال والنساء والشيوخ ..هاته الأشياء هي بالنسبة لي أشياء بديهية قامت عليها كل المنظومات الاخلاقية التي أعرفها و إن كان لديك مثال مناقض فلتفدني به فالافكار عندي ليست جامدة أو غير قابلة للنقاش
بخصوص الهجوم على بعض المدونين فأنا لم و لن استعمل أي كلمات تمس من كرامة أي شخص بل أدعوك إلى قراءة ردي على عاشور وأزواز عندما اتهمني الأول بالأنحطاط والثاني بالجبن..لكن أقول وهذا قلته لاكثر من معلق في مدونتي علينا أن نتجنب الاشخاص والتركيز بالنقد على المواقف التي تترجم رؤى خاطئة، حسب رأي بطبيعة الحال ،وبينت لماذا في أكثر من مناسبة..
ذكرت في معرض ردك:
"إذا كان نحبّو نبحثوا على مجرمين أو على مذنبين فيما يرتكب حاليّا من مجازر فهؤلاء موجودون في أماكن أخرى وعناوينهم معروفة"
هذا كلام صحيح لكن ماذا عن الذين يعطوننا عناوين خاطئة في الزمن الخاطىء؟؟ لا أعتقد أن العناوين ثابتة وصالحة لكل زمان ومكان وهنا أعيد ما قلته أن أي فكرة ليست صحيحة في المطلق وليست خاطئة في المطلق بل تستمد معقوليتها وصوابها من الزمان والمكان التي قيلت فيهما ..وهنالك العديد من الافكار الصحيحة قيلت في الزمن الخطأ ولذا حسب رأي أصبحت خاطئة
فيما يخص إدانة العدوان،أقول أن البعض لم يستعمل هذه الكلمة أساسا بل إستعمل كلمة هجوم أو بالاحرى مجرد هجوم.. تقول لي هذا رأيه ..فليكن ! وليقبل الرأي المخالف ولا يصفه بالانحطاط إلى الدرك الاسفل! أو بالجبن كما ورد في بعض الردود.
أما عن ضرورة الصمت فأحيلك إلى التعليق الذي أتى مصاحبا لتعليقك "الشمقمق" الذي يطلب مني الصمت لان القضية الفلسطينية (القضية؟ كم أصبحت أمقت هاته التعابير) هي قضية عادلة وكل الناس يعرفون ذلك فلماذا الحديث؟
بالنسبة للذين فتحوا مدونات خاصة بالطابور الخامس عشر (وهذه أيضا من التعابير التي أمقتها) فقد خصصت فقرة للرد عليهم وهم إن صادف إن اتفقنا على الوقوف إلى جانب المقاومة فهذا لا يعني أنني مسؤول عما يقومون به
أخيرا ،واسمح لي أن أصفك بالصديق، أن الفيصل بين الرقي في المستوى من عدمه يمكن أن يتفق عليه كل المدونين .وأعطي تعريفا بسيطا(يمثل بطبيعة الحال وجهة نظري) :يجب عدم إستعمال الكلمات النابية في وصف الأشخاص بل التركيز على الأفكار والرؤى والتوجهات ..
الأكيد أن أمام البلوغسفر العديد من التحديات التي يمكن رفعها والارتقاء بالمدونات إلى الحد الادنى المضمون وكان حبيت سميه سميق SMIG التدوين
شكرا مرة أخرى

kacem a dit…

عجبتني ...: علماني يميـــــــــــن !!!!

1- أنا زي ألي شفت و إلا قريت ، إنك تجبد على اليســــــــــار !!! زعمة مثّبت في روحك تجبد على الأيمين ؟ زيد شوف تره على أنا شيرة تجبد ؟
2- إشبيك إدور و إدّور ...و ما نجمتش تخرج بحاجة و إلا بموقف من حكاية الأخلاقيات::::: وقوفك و إلا جلوسك مع المقاومة ...ما شلقتش بروحك إلا إنت يا سي الشّباب ...تتمنّع بشّوية بشّوية ..و قاعد إتسّل فيها و ما نجمتّش روحك !!!
3- إنحب إنقول حاجة ...صغيرة ياسر ...و بسيطة ياسر ...و أنسى جملة الحكاية !! إن شرعية المقاومة للمحتّل ...كانت إسلامية و إلا يسارية ..أمر طبيعيّ جدا ، و لا جدال فيها ....إلا لمن لا يفقه معنى الأرض....المشكل ألي قاعد إدور ...و إلي طحت فيه إنت كيف كيف ...هو تحجيم المقاومة ألي حدود مستوى مشروعها السياسي ..فقط ...و هنا صار الخلط في المدّونات ...

Big Trap Boy a dit…

يا سي قاسم

إي نعم، علماني على اليمين أما من حيث المبادئ موش من حيث الإنتماء لمجموعات حزبيّة معيّنة من النوع المشلّك الموجود على الساحة الجربوعستانيّة

إذا كان تحبّ نزيد نفسّرلك بالضبط كيفاش أنا علماني نجبد على اليمين لازمك تنقّص شويّة من الجبدان اللوطة راهو ما يليقش بيك في هالعمر

وعلى كل ما يهمّش اليمين ولاّ اليسار إذا كان باش نحكي معاك في حكاية حولة بطبيعتها

kacem a dit…

بيق : إي نعم، علماني على اليمين أما من حيث المبادئ موش من حيث الإنتماء لمجموعات حزبيّة معيّنة من النوع المشلّك الموجود على الساحة الجربوعستانيّة.

قاسم : بره ، إنقول فهمت علماني على اليمين من حيث المبادئ !!! من ناحية الأنتماء ! ما شوفتش حاليا مدّونين منتمين لأحزاب إلا البعض القليل ...و رغم ذلك ما إنشوفش في الحكاية حتى مشكلة ....


بيق : إذا كان تحبّ نزيد نفسّرلك بالضبط كيفاش أنا علماني نجبد على اليمين لازمك تنقّص شويّة من الجبدان اللوطة راهو ما يليقش بيك في هالعمر..

قاسم : الّلوطة متاعك ...فهمها أنا مليح و أش تقصد بيها ...اللّوطة متاعي ..تعني الأرض ..ألتيتود زيــــــــــرو...يعني الواقعيّة ...و لو هبط الناس الكل ...و خاصّة من أبراجها العاجية ..لإتصّلحت برشة حاجات و إتوّضحت الرّؤى أمام الناس الكل !!! وقت ألي كل واحد ينده على شيرة ..بالطبيعة باش تتخلبص كالكبّة ...و هذا ألي إنشوفو فيه ..

بيق : من ناحية العمر ...أنا ما إنفوتك ، كان بالأربعيــــــــــن ...و مازال عندي غرام ما يكفي لعشرين سنة ...

قاسم : علماني يجبد على اليمين ، يعني الكونسرفتار ...في أصلها و فصلها ...و هو تصّور إمثلّو ...بوش في أمريكا ...و هاربر في كندا ...و ساركوزي في فرانسا ..في تونس ! يا بيق تراب بوي ...الشيئ هذا ما ثماش ...بالعربي الخارطة السياسية ألي إنت متواجد عليها اليــــــــــــــوم راهي ما هيش في تونس ..في بلاصة أخرى جملة !!! هذاك علاش يا سي المدير ...لازمك تنزل الي الـــــــــــلّوطة متع قاسم و هي الأرض ...باش تخلق شكل هندسي سياسي جديد ...خاص بينـــــــــــا ...نستمدوه من تجربة 3000 سنة على وجه الأرض.

بيق : وعلى كل ما يهمّش اليمين ولاّ اليسار إذا كان باش نحكي معاك في حكاية حولة بطبيعتها.

قاسم : الحكاية ما هيش حولة ...إنت مازال ما إتوّضحتش عندك الرّؤية ...بدّل المرايات مثلا ! علاش لا .....شوف يا بيق .....بسّط الأشياء ....تلقى الحل ...عقّد الأشياء ..إتضيع!!! قانون ...سهلّها ..تسهـــــــــــــــــال ...صّعبها تصعاب ...ما زال ما طاحش.

و لكم سديد النظر ..في المراجعة ...

Anonyme a dit…

يميني و تجبد على اليسار ؟؟؟
مقواك يا بيق
تبارك الله عليك

اعملت تحليل نص (بالمفهوم المدرسي) للبوست متاع اتيكولي أما للاسف ما جاوبتش ,
لا جاوبت ارتيكولي و لا جاوبت قاسم

Anonyme a dit…

Je Souscrit totalement à cette précision:

"لمّا كتبت حطيت العلمانيين في عنوان التدوينة وهذا ماهوش فقط اليسار، أنا مثلا علماني أما يمين مانيش يسار"،

beaucoup ne font pas la différence.
@Kacem change de lunettes avant de juger

Anonyme a dit…

Quand le père des 5 enfants tués crie : " حسبي اللّه و نعم الوكيل ", on ne peut que compatir sincèrement à sa douleur, et c'est tout à fait légitime et compréhensible qu'il appelle à la justice divine, même à mes yeux d'athée. Le problème c'est qu'espérer une telle justice de la part de Dieu est complètement désespéré. Je ne dis pas cela seulement parce que je ne partage pas la foi de ces gens, mais c'est parce qu'il m'est difficile d'y croire quand je vois que la seule manifestation qu'on puisse qualifier de divine depuis le début du massacre à Gaza, c'est le séisme de 7,2 degrés en Indonésie enregistré dimanche dernier et l'alerte au Tsunami depuis. Certains auront même le culot de trouver une "sagesse divine" dans cette manifestation.
Tout cela pour dire que, oui je partage la douleur et la souffrance du peuple palestinien, mais dire à ces gens que leur cause est perdue d'avance s'ils comptent sur Hamas(qui n'est pas moins pourrie qu'Israel) pour la servir ou Dieu pour les sauver, leur dire que la résistance peut être plus intelligente et moins suicidaire que celle où ils sont poussés, leur dire tout cela serait déplacé et insensible. Donc oui je choisis le silence, et c'est tout à fait légitime.

Big Trap Boy a dit…

يا قاسم البكّاي نصّك تنشر، راني مانيش نهار الكل شادد وجه الكمبيروتر باش دوب ما سيادتك تحط تعليق ننشرهولك

تماسك نفسك وما تنفعلش بسرعة راك رئيس جمهوريّة

وبصفتك رئيس جمهورية زادة من واجبك تفهم أنه العلماني ينجم يكون يميني وإن كره الكارهون، موش لازم نفسّرهالك أنا على خاطر عندي شوية خدمة اليوم، تنجم تعمل بعض البحوث وحدك وإلاّ تحكي مع مستشاريك في جمهوريّة قاسم أتو تفهم آش معناها

وسّع بالك ونقّص من البكاء يعيّش خويا، راهو منصبك ما يسمحش بالخفّة

:p

Big Trap Boy a dit…

يا عمّي قاسم هاني رجعت وعاودت قريت التعليق متاعك الأول وحاولت باش نقراه ونفهمك آش قصدت

بصراحة ما فهمتش وين سيادتك شفتني جبدت على المقاومة من أصلو باش تتهمني بـ"تحجيم المقاومة إلى حدود مستوى مشروعها السياسي فقط"... الحكاية بيني وبين الراجل على موضوع آخر جملة وإنتي جيت تحب تفرض عليا إتخاذ موقف من حكاية اللي أنا ما حكيتش فيها

بالسيف ياخي؟؟؟؟؟

Big Trap Boy a dit…

@ التونسي الراسيست:

ما قلتش "يميني ونجبد على اليسار"، قلت علماني ويميني، يعني علماني ليبرالي، ما فهمتش علاش ظهرت صعيبة على فهم برشة ناس

على كلّ حال فمّا راهو ناس يمينيين ويجبدو على اليسار، ما لازمهاش تظهرلك غريبة إذا كان تصادفك نهار من النهارات، واللي فاتك أغرب راهو فمّا ناس في الوسط جملة، شفت مقواهم هاذم؟؟؟؟

على كلّ حال يا خويا التونسي مرحبا بيك وماذا بيا نفهم أشنوة السؤال إلّي كان من المفترض أنّي نجاوب عليه أرتيكيليي ومن بعده قاسم

أعطيني السؤال وأنا نلوّح إلّي في يدّي ونجي نجاوب خويا

Ghoul a dit…

Big,

ya des gens qui comprennent pas ce que veut dire droite ou gauche, ni ce que veut dire laïque ou séculariste

te casses pas la tête à trop leur expliquer, c'est une perte de temps à mon avis.

sinon bravo pour le post, tu as très bien résumé ce que je pensais de cette guéguerre ridicule au vu de la dangerosité des événements. la blogosphère devient nombriliste enfin de compte, et s'il y a quelque conclusion à tirer de tout ça, c'est notre inaptitude à comprendre que la liberté d'expression c'est avant tout laisser ceux qu'on aime pas entendre parler. C'est de la tentation de l'unanimisme qu'il faut se débarrasser avant même la censure.

bonne continuation.