vendredi, août 25, 2006

مـجـتـمـع الـمـعـرفــة

أكيد أنّكم سمعتو، ولو مرّة وحدة، بكلمة مجتمع المعرفة وبإقتصاد المعرفة أو الإقتصاد اللاّمادّي، والأكيد راهو فمّا شكون قاللكم أنّ المفاهيم هاذي هي مفتاح التقدّم و"المص-تقبل" والسلاح الجديد اللّي البلدان باش تستعملو في "معركة" التنمية، ولو أنا واحد مالنّاس عمري ما حضرت على عركة بسبب التنمية بالرّغم أنّي نسكن في حومة عربي والعرك اللّي نحضر عليه في الأغلبيّة يا على الشراب يا على الفلوس يا على الأناثي


المفيد باش ما نطوّلش عليكم حبّيت اليوم نحكيلكم على المفاهيم الجديدة هاذي باش ما تبداوش ضايعين فيها كيف تسمعو الحكايات هاذي في المستقبل ونبداو بكلّنا نحكيو نفس اللغة


باختصار شديد، مجتمع المعرفة هذا هو المجتمع اللّي المعرفة والمعلومات عندها فيه قيمة كبيرة، وأكبر حتّى من المكاسب والممتلكات الماديّة كيما الديار والكراهب والفلوس والبترول ولحم العلّوش


يحب يقول اللّي باش يكسب المعرفة، مهما كان نوعها، هاذاكا هو اللّي باش يسلّكها، أمّا اللّي ما يوصلش للمعرفة وللمعلومات، هاذاكا سعدو مكبوب وأيّامو تهردت، على خاطرو باش يطيح في الهوّة الرقميّة، وهي عبارة على فوسي أو هفهوف كبير باش يلوّحو فيه الشعوب المتخلّفة الكلّ ويرتاحو من مناظرهم المقلّبة إلى قيام السّاعة


برشة ناس تظن أن حكاية مجتمع المعرفة هي حكاية جديدة وما ظهرت كان مع الأنترنات والتكنولوجيا العصريّة، لكن الناس المختصّين كيفي أنا يعرفو أنّها بلادنا هي من أوّل البلدان اللّي عرفت مجتمع المعرفة، وماهيش صدفة كيف الأمم المتّحدة إختارتنا باش نستقبلو القمّة العالميّة لمجتمع المعلومات في نوفمبر اللّي تعدّى


نحنا في تونس فهمنا قبل الأمريكان والألمان والعالم المتقدّم الكلّ أنّو الإنسان بلاش معرفة ما يسوى شيء، وتلقانا ديما كيف باش نقضيو قضية نلوّجو على معرفة، واللّي ما عندوش معرفة يلوّج على معرفة معارفو. أمّا اللّي ما عندوش المعارف، وحدو وحدو يفهم روحو ويشدّ دارو، على خاطرو واعي اللّي هو يعيش في مجتمع المعرفة، أو بالأحرى مجتمع اللّي عندو المعرفة، وبالتالي زايد باش يحاول يستعمل معانا وسائل أخرى


المعرفة تعاون الإنسان برشة وتسهّلّو حياتو وتقضيلو شؤونو خير من أيّ طريقة أخرى، وهاذاكا علاش أنا نشجّع كل إنسان باش ينخرط في مجتمع المعرفة ويسعى بكل جهدو باش يكون عندو أزيد ما يمكن من المعارف


فمّا بعض الناس من الرّجعيين، الله يهديهم، جايين ضدّ حكاية المعرفة هاذي، ويسمّيو فيها في أسامي خايبة برشة كيما المحسوبيّة والزبونيّة والوساطة والمحاباة والتحيّز والفساد، بالشماتة باش يكرّهو فيها النّاس ويظهّروها حاجة خايبة للعامّة البسطاء، في حين أنّها من عوامل التقدّم والحضارة، وهاني باش نبيّنلكم علاش


توّة نحنا في بلادنا قدّاش من رقبة؟ عشرة ملاين كان طارت؟ يعني تقريب بكلّنا نعرفو بعضنا، وكيما يقولو، كان جينا في الصين رانا بكلّنا نقعدو فرد قهوة،


يعني هذا أنّو لو كان كلّ واحد منّا يقضي لمعارفو، في نهاية المطاف النّاس الكلّ باش تسلّك أمورها وكلّ واحد ما يروّح كان فرحان


يبقى لهنا دور المواطن اللّي لازم يتحمّل مسؤوليّتو ويسعى باش ربّي يباركلو ويلقى المعرفة اللّي باش يسلّكهالو ويقضيلو أمورو، موش يبدى قاعد ويحبّ المعرفة يجيه ليديه، هاذاكا يا حسرة كيف كانت الشيوعيّة عاملة مسدّ قبل ما يفيقو بيها اللّي هي نظام فاشل


تبقى أخيرا حكاية إقتصاد المعرفة، واللّي عندها معنى مختلف في بلادنا على بلدان العالم الخارجي، على خاطر كيما قلتلكم ، نحنا اكتشفنا الحكايات هاذي قبلهم


إقتصاد المعرفة عندنا نحنا يلزم نفهموه على معنى الإقتصاد في المعرفة، يعني كيما الإقتصاد في الماء وفي الكهرباء وفي المازوط، والسبب واضح وبسيط وهو اللّي نحنا إكتشفنا من سنين أنّو "كلمة لا ما تجيب البلاء" وأنّو اللّي يعبّي راسو بالعلم والمعرفة ما يحصّل كان وجيعة الرّاس والميزيريا الكلبة، وأنّو خيارو بنادم لا يشوف لا يعرف ولا يوجع قلبو، على خاطرو على قدّ ما يزيد يفهم ويعرف، على قد ما يزيد تعاسة وهم على قلبو حاشاكم


هاذاكا علاش الطبّ الحديث يشجّعكم على البهامة والجهل والإقتصاد في المعرفة، تعيشو في خير وما تقلّقوش غيركم، وأنا هاني نصحتكم وإنتوما تعرفو ما يصلح بيكم




12 commentaires:

Anonyme a dit…

zayed m3ak fi el nsi7a, twazi3 feeha 7atta 3la ness mouch m3aref hedha ma ya3ni chay ken elli inti ness mle7 o ma t7ebech ti7takir el ma3rfa, emma nsi7a i9tasid feeha chwi 5ater el ifrat mouch behi

emma 3ijbitni nsi7tek me3 elli ma3erfa i3lech ya3mel fi 7ob 3ziz maw i3awen belli inajim o i3aref m3arfou kifech houma bdawrhoum i3arfou bel ma3erfa
o kima i9oulou ma3refet irjel knouz

dsl: j'ai pas de clavier avec des lettres arabes ca aurait facilité la lecture

الكاتب a dit…

يا بيغ يا خويا زايد..بفضل توجيهاتك الحكيمة ونظرتك الإستشرافيّة..ّ فهمت أخيرًا علاش كيف الواحد منّا يقابل انسان جديد ما يعرفوش..يقول له "ان شاء الله معرفة طيّبة"..:-)


* تتكتب "محاباة" موش :محابات"
;-p

Tarek طارق a dit…

Wa yqulu fi Tunis ma 3andnach dhmar... wa famma kan akil masit Awlab Baballh... wa bqiyyit il wujuh il bayta... Il muchkil il kul fil mawadi3 illi il nas tnijjim titkallam 3aliha wa mich fil mawahib... Excellent... just excellent writing... Keep writing ya Big ya khuya

Hayy a dit…

c'est la meilleure definition que j'ai lu pour mojtama3 el ma3rfa :)

Abdou a dit…

نصفّق....بلقــــوييييييييييييييييييي

Brunette a dit…

Bravo pour l'interprétation...tawa wallina na3rfou moujtama3 lma3fa kima yelzem..9allou SMSI :P

Anonyme a dit…

je pense qu'il faudrait organiser des séances de formation pour les adultes qui manques de "ma3rfa"

Anonyme a dit…

illi ta3rfou 5ir milli mé ta3rfouch...
ta3rafchi 3léch....
na3raf w mé in9oulech....

wa7dek yé B_T_B

Anonyme a dit…

اما نسيت حاجة مهمة في التعريف متاعك؛ كان لازم تقول لي البهايم الالمان و الامريكان مازالوا يتحصلو على المعرفة بالدماغ؛ هاك الشقفة البيضة الناتنة في الراس؛ اما احنا قفزنا عليهم و المعرفة نجيبوها بالاكتاف او بالافخاذ؛ سامحوني في الكلمة

Anonyme a dit…

برافو يا بوي
صحيح موش كيف اللي عنده معرفة كيف اللي ما عندوش اما الاختيار صعيب المعارف الكل يتكاملو و اللي تعرفو خير ماللي ما تعرفوش حاصيلو مسرورة لمعرفتك
سمايلي فرحان
سمايلي بيزو

Anonyme a dit…

chay Ya3mel elkif !!elwe7ed yabda ya9ralek ya big w houwa cheiiiiiiiiiiii5!!ya3tik alf sa7a

bribech a dit…

Il ne faut pas oublier fama ma3rfa min ma3rfa... fama illi twassil ou fama illi iness i9ouloulha :"ina3n din illi 3arafni bik..." :)
Wahdik yai BIG