vendredi, décembre 07, 2007

سـيـّبو المدوّنـات يا حـيـوانات

action note blanche


للأسف ما أتيحتليش الفرصة للتدوين في الفترة اللي فاتت، وكان من نتائج ذلك أنو الفقمة سلّكها وما كلاش على راسو، ولكن الأهم من هذا هو أني ما نجمتش نحكي على موضوع آخر أهم وهو حجب مدونة أخرى من المدونات التونسية وهي مدونة "فري رايس"، بالرغم أني شخصيا ما شفتش فيها ما يدعو لهذه الدرجة من الإرتباك والرعشة المفرط فيها من طرف خونا بو مقص، متفقد اللأفكار وحامي النظام العام من أخطار الكلام وشذوذ الأقلام، ولكن على ما يبدو بومقص أصبح يضرب على ما ياتي، جابد علينا الجلم متاعو واللي يخرج لسانو زوز مليمتر زايدين ينزل عليه.

بالطبيعة هاذا يخلينا نتذكروا ديما أننا مهما كان مستوى المعيشة متاعنا ونسبة نمو إقتصادنا وعدد القناطر والكراهب والجامعات، رغم كل هذا نقعدو، للأسف الشديد جدا جدا، بلاد متخلفة. متخلفة موش على خاطر التخلف هابط علينا بقدرة العالي القهار، أما على خاطر نحنا نمارسو في التخلف، وهذا أشوم برشة، على خاطر ساعات يبدى التخلف مفروض عليك بحكم ظروف قاهرة، كيف الجهل، المجاعة، الحرب، السخط، ما نعرفش أنا، أي بلوة تجيك وإنتي ما عندك عليها لا حول ولا قوة. أما نحنا فالتخلف هارب يجري علينا، يقول سيبوني، قيلوني، عندي ما نعمل في أفغانستان، في التشاد، في الصومال.. ونحنا خالطين في جرتو، بجاه ربي لا تمشي... هو كيف تجي تشوف، في صورة يمشي علينا التخلف بمظاهرو المختلفة والمتخلفة، فما برشة أنواع متاع خدم ما عادش تتوجد وأصحابها ترصيلهم يلوجو في قلم جديد. على كل حال.

كيما شفتو الوخيان المدونين، وبالرغم من أطراح البونية والضرب بالأسطلة اللي ساعات تشد بعضها مابيناتهم، قاموا بمبادرة طيبة على غرار ما عملناه في غرة جويلية لما تحجبت ثلاثة مدونات، ومن بعدها خلطت عليهم مدونة آدم الصالحي، وهي مبادرة يوم التدوينة البيضاء.

أنا شخصيا باش نشارك بالطبيعة في يوم التدوينة البيضاء اللي تقرر لتاريخ 25 ديسمبر الجاري، وبالرغم من أني كيما قلت وقتها ما نتعاملش مع مسألة حجب المدونات بمعزل عن إطارها العام وأبعادها الأخرى. يعني المطالبة برفع الرقابة على المدونات ما تنجمش تكون معزولة على واقعها إلي نعرفوه الكل. لهذا، وبغض النظر عن فاعلية هذه المبادرة اللي تبقى بالأساس رمزية ولكنها ضرورية، فإني من جهتي لا يسعني إلاّ أني نسحسح بالدعاء هالهوكش إلي مازالو شادين العسة على اللي يتكلم واللي يتنفس، وما خذاوش حتى ربع درس من النتائج الكارثية إللي شوية لا هزونا ليها بالتصطيكة البقري متاعهم.

باش ما نطولش ياسر عليا وعليكم، حبيت نساهم من جهتي في الحملة التدوينية البيضاء، وكيما عمللنا مصعب لوجو ممتاز، قلت أنا توة ما قعد كان باش نعملو شعار موحّد كيما كل الحملات المحترمة، من نوع "بكلنا على فرد كلمة" أو "إبتسم إنها تونس" أو "شد مد يا حمد"، وبعد البحث والتمحيص والتدقيق توصلت للقائمة التالية من الشعارات يمكن نختارو منها شعار يكون عنوان للتدوينة البيضاء باش ما تكونش تعبير صامت يمشي في نفس الإتجاه إلّي يحبو عليه جماعة المقص ألا وهو إخماد أي صوت ماعدى الأصوات القبيحة لأنواع الفقمة وما تبعها من الحيوانات البرمائية.. حاسيلو هاي القائمة متاع الشعارات وإنتوما إفرزو معايا حويجة باهية


سيّبو المدونات يا حيوانات

يا بو مقص يا عظمة بلا فص

أعطيونا حرية التعبير ويزيو بلا تجوبير

خلي الناس تتنفس لا يشدّوك وتتعفس

يزيونا بلا ريق الحجب ما عادش يليق

سيب المدونات يرحم بوك وما تخليناش نسبوك

سيبولنا فري راس راكم وليتو جبورة خلاص

مدونات حرّة لا نشكيو بيكم للقورّة

يا عساس يا علوش راني نجيبلك جورج بوش

لا مقص ولا جلم، واللي يحجب يعطيه نم

تدوينة بيضاء باش الجلغة تتحل عريضة

تدوينة بيضاء اخترناها وكان حجبونا بقلة ليها

فري رايس ماهوش ملوّح، وكان تشدّونا الحي يروّح



هاذي بكلها مجرد إقتراحات ونخليكم تفكرو معايا في أحسن شعار يكون مناسب للحركة الإحتجاجية هاذي

هيا أنّستو
:)


26 commentaires:

Anonyme a dit…

Bravo, bravo, yar7am il kirch illi jebittik,
Mais il y a un truc qui m intrigue, comment ton blog n'est pas encore censure?
Ce m9ass dont tu parle il ne connait pas ton blog, ou tu le pay pour te laisser publier.
Moi je trouve ton blog comme le meilleur sur la sene tunisienne, et beaucoups d' amis intello le lisent.
bon je me connecte de l exterieur de la Tunisie mais je suppose que les Tunisiens ont accee?
Esperont que je ne donne pas d'idee a nos amis du jlam. et bonne continuation en esperant un jour que le ta5allof et la tastika puissent s'echapper de notre pay si hospitalier

Regards
TRO

Takkou a dit…

للتدوينة البيضاء باش ما تكونش تعبير صامت يمشي في نفس الإتجاه إلّي يحبو عليه جماعة المقص ألا وهو إخماد أي صوت

C'est exactement ce que je pense et c'est pour cette raison que je dis que je suis contre l'action poster blanc non dans son principe et ses objectifs mais dans sa forme que je trouve qu'elle ne satisferait que les auteurs de la censure.

Anonyme a dit…

أنا مع
لا مقص ولا جلم، واللي يحجب يعطيه نم

Slaim a dit…

momtaz ya BTB, BTB momtaz!

Stupeur a dit…
Ce commentaire a été supprimé par l'auteur.
Stupeur a dit…

bech nzid zwayez cadeau men 3andi

يا بو مقص يعتك نم إفهم روحك واتبرم

يا بومقص عملت الريحة راك قريب تنيك طريحة

ونعتذر على الكلام البذيئ الذى يمكن أن يعكر مزاج بعض القراء

أما راهو موجه للبو مقص سائق ال404 باشي

Anonyme a dit…

A vrai dire,l'equipe de la 404 baché sont des lecteurs assidus de btb,et ils ont pu le censurer,c'est pas a cause de ses propos mais parce qu'ils peuvent réaliser en lisant ses posts qu'il a un esprit,ce qui constitue pour eux un crime impardonnable..Mais la vrai raison qui les empeche de faire ça, a mon avis biensur,c'est leur chef "zenzir ben jabri" qui malgré le danger imminent de ce blog et son effet néfaste sur le PIB de la tunisie,aime bien l'humour de btb,mais j'ai vraiment peur de son adjoint "khenzir el mar3ouch" qui ne distingue pas entre les blogs marrants et les blogs ennuyants...Wait and see.

Anonyme a dit…

c'est un sujet qui n'est pas marrant je sais.. c'est meme tres serieux! mais franchement chi3aratek m'ont tue!! bel 3arbi gtaltni!
j'ai retenue mes rires.. mais ça ne servait a rien!

je suis pas toujours d'accord avec tes idees, je l'avoue, mais j'aime beaucoup le style de tes ecrits, il est typiquement tunisien, et c'est important ça je trouve.

Anonyme a dit…

Je répète ici ce que j'ai toujours conseillé à mes amis blogueurs : d'après mon expérience (ça fait quand même 10 ans que je suis l'Internet tunisien), la raison principale pour qu'un site ou un blog soit censuré est que certains "noms propres" et autres "mots clés" soient explicitement cités.

Le truc est que c'est fait automatiquement. Monsieur Ciseaux ne passe pas sa journée à lire et filtrer nos blogs :-) Le plus probable est que si un "mot clé" est détecté automatiquement (c'est aussi valable pour les emails, et p-e même pour MSN, en passant), il y a une lumière rouge qui s'allume chez l'équipe de M. Ciseaux, et il vont alors vérifier le site ou le blog...

Malheureusement c'est ce qui s'est passé pour Free Race, remarquez que son blog a été coupé quelques jours après qu'il a publié un article qui cite explicitement une personnalité importante!!

En résumé, tant que certaines personnes ne sont pas nommés explicitement, le risque de se faire censurer est minime. Voilè, le secret est révélé.

Zaraf a dit…
Ce commentaire a été supprimé par l'auteur.
Zaraf a dit…

Avec ta permission ya BTB, je voudrais dédier ce morceau à l'Homme aux Ciseaux d'Or

http://rumblejungle.blogspot.com/2007/12/hommage-lhomme-aux-ciseaux-dor.html

Anonyme a dit…

ya BTB isma3 okhtek,si lemkass lézim shkoun yitafih wi ya3tih sakhta tlimmou,donc ni9tarah alik tchouf el chanteur "stormlord" ghnéya"under the boards" and tijralou kima sar lit tofla fil clip;bjeh rabbi tfaraj;rahou hard rock amma béhi!! !!!!!!!!!! bint essayda

Anonyme a dit…

ya bou m9as rahou iji nhar wil m9as idour 3lik ...akhtak ou koun rajil m3a irrjel

yes_in a dit…

9wii el post kil 3ada ...

الفقره الثانية عن التخلف هاما ويمكن ان تكون نظرية فعلية!

مجتهد ، وتفوقت حقا

هذا المترجم هو شيء عظيم لمن ليس لديه لوحة المفاتيح بالعربيه... لكنه
bliiid
(google translate)
Hahahaha

A9wa ka3ba twalli

اللي يحجب يعطيه نم
إفهم روحك واتبرم

9a3ed etlawej fi lo9ma ya fo9ma ?!?

hahaha

haya nistou

samsoum a dit…

@Houssein: Tu as raison, c'est une question de chance. Il y a beaucoup de site qui mentionnent des noms de personnalites importantes mais ils ne sont pas censurables. Donc il y a des taches manuelles qui consistent a visiter tout ces sites et de decider si le nom est dans un contexte acceptable ou non. Et comme ils sont mediocres et paresseux (tant mieux pour nous), ils n'ont pas le temps de tout lire, surtout avec la proliferation des sites webs et des blogs et donc cela devient une question de chance :)

Anonyme a dit…

لا مقص ولا جلم، واللي يحجب يعطيه نم

Ecoute BTB,t as encore rien dit sur BOu5dhir qui est en prison a ce mement.Je pense que c est prioritaire .Ezzabrat

علاش a dit…

أنا نختار هذه
خلي الناس تتنفس لا يشدّوك وتتعفس

Anonyme a dit…

لا مقص ولا جلم، واللي يحجب يعطيه نم

Anonyme a dit…

برجولية مش نرمال

يعطيك الصحة على هالنقشات التحفونين

Anonyme a dit…

هاو شعار حلو ياسر شدّ بيه إيدك
خلّيني ندوّن يا دوني نعلبوك و نعلبوني

بوناب أزرق

Anonyme a dit…

يا بيغ تراب علاش هلوحشية في الخطاب الجماعة ولات خايفة على اروحها وبيعان المقاص ولا ببطاقة التعريف

Anonyme a dit…

free race ya king, boum9ass labis string!

Anonyme a dit…

أقترح ان يكون الشعار سيادة الرقيب،أنت حمار

الكاتب a dit…

الشعارات المقترحة ياسر حلوّة لكنّي نزيد نقترح الشعار التالي:

"لابدّ للمقصّ ان ينكسر وان لم يرض الرقيب فلينتحر
!"

الى ذلك، أوافق بعض المتدخّلين السابقين. الرقيب سيكون سعيدا جدا اذا أضربنا عن الكتابة. فذلك شكل متحضّر جرّب في السابق لكنّه لم يأتي أكله. آقترح بدوري ان ندوّن جميعا لحرّية التعبير في بلادنا بالمدوّنات وبغيرها من المنابر...

علينا ان نبلغ الرقيب ومن سلّطه علينا أنّنا "كبرنا" ولم نعد بحاجة الى وصاية من أحد على عقولنا وضمائرنا وانّ حقّنا في التعبير حقّ مقدّس ونحن عازمون على ممارسته.

فلندوّن جميعا لحرّية التعبير ولنر اذا كانوا سخيفين الى درجة حجب كلّ المدوّنات...

Anonyme a dit…

اهلا
يعطيك الصحة على ه البلوق - ونسدتعاك باش تقرى مقال خوك بسيس واعيطني رايك الحلو كالعادة على خاطر المقال بتاعو غلب علي يحب العائلة تربي الصغار واقتلي العائلة مرفتة طول النهارنعرف اشكون يحب يدبر برتمان في العاصمة باش يتقابل مع مرتو بين نصف نهار ومضيساعة على خاطر في الليل يروحو مهدودين خلي عاد باش يربيو الصغار موش حتى ينجمو يجيبوهم

تلقاه في www.opinion-publique.over-blog.com

Anonyme a dit…

Totalement ému...Super!