إنطلاق موسم القراءات الدستوريّة على المدوّنة الفضائية

بسم الله الرحمان الرحيم والصلاة والسلام على النبي الكريم واللعنة على كل شيطان آنونيم وكلّ معلّق لئيم. نستغفر الله ونتوب إليه ونعوذ به من شرّ كل مدوّن حاسد كعلاف وكلّ نبّار خوّاف ومن كلّ إنقطاع في خدمة الأنترنات ذات السعة العالية والفاتورة الغالية والمواقع الخالية إلاّ من الكات كات باشي، على أمل أنّو كيف يجينا ملك الموت يقوللنا ما تكونوش فاشي، هاذي ماكانتش حياتكم الحقيقية ، راكم شاركتو معانا في الكاميرا كاشي.

هيّا عادة إمّالا يا أسيادي يا أولاد بلادي ما نطوّلوش الهداري الزايدة ونتعدّاو للّي بيه الفايدة: ماني كنت وعدتكم باش نبداو في مشروع جديد على المدوّنة، ولكن الله غالب الوقت ما عادش عندي كيما قبل بما أنّها ولاّت عندي مسهوليّات جديدة في الخدمة بعد ما كنت نستنّى فيهم باش يطرّدوني على جيّاني إمّخّر كلّ يوم. حاسيلو ماهوش هذا الموضوع متاعنا، أتوّة كل ما نلقى الفرصة نكتب حاجة باش ما تقعدوش مونك، يعني بالفرنساوي في حالة نقص. باهي إمّالا نمرّو لتقديم المشروع الجديد إلّي إنشالله يعجبكم والأهم من هذا إنشالله يعجبني أنا وأعوذ بالله من كلمة أنا-أتوّة المرّة الجاية نستعمل كلمة أخرى ، مثلا حضرة جنابي- على خاطر الحكاية تنجّم تاخذ شويّة وقت ووسع بال، لكنّي نراها هامّة برشة ويمكن تفيدنا في إطار سياسة إيدي فيدك تفيدني ونفدّدك، والتونسي للتونسي كيما تعرفو مليح هو رحمة، مع الإشارة إلى أنّ كلمة رحمة في بعض الجهات التونسية تعني الصاعقة اللّي تهبط من السماء على العبد تخلّيه فحمة على بلاصتو، وهذا بالمناسبة أمر غريب شويّة في لغتنا الدارجة بالمقارنة مع العربية الفصحى، كيما كلمة العافية زادة اللّي تعني الصحّة، في حين عندنا نحنا تعني الجمر متاع الكانون، يعني اللّي تقوللو يعطيك العافية كاينّك دعيت عليه باش يتشوشت على الكانون

باهيييي، وفاتشي هالمقدّمة متاع وذني؟ آشنوّة هالمشروع يا سي البي تي بي متاع العرب؟ باش تجيبلنا الضوء ولاّ الكيّاس ولاّ المي؟؟ لا هذا ولا ذاك يا سيدي. المشروع الجديد هو أنّنا باش نحاولو نقراو مع بعضنا أهم نصّ يهمّنا الكلّ كتوانسة واللّي للأسف عدد كبير منّا يسمع بيه سمع وعمرو ولا جاء بين يديه. النصّ هذا كيما البعض منكم طلّع وما ربح شيء للأسف، هو الدستور التونسي، دستورنا العزيز حسب ما لاحظت ماهوش معروف عند العموم، لا من حيث سبب وجودو، ولا من حيث أهمّيّتو ولا من حيث محتواه... حاسيلو ما فمّاش إحصائيّات أو دراسات تثبت أو تنفي كلامي هذا لكنّها ملاحظة شخصيّة من خلال المحيط اللي نعيشو فيه بإستثناء الناس اللّي عاملة دراسات في القانون كيف سيادتي الموقّرة.

ما نخبّيش عليكم كنت متردد شويّة بالنسبة للموضوع هذا على خاطر المسائل الدستورية أوّلا تقرب ياسر من المسائل السياسية وتتداخل معاها ساعات، وأنا قلت من الأوّل ما نعملوش البوليتيك على المدوّنة هاذي على الأقلّ، لكن نظن أنّو رغم كل شيء يمكن باش ندرسو على الأقل الحاجات الأساسية في الدستور ونتجنّبو الدخول في الجوانب البوليتيكية المتسببة في تدوير مفتاح الكميونة الفرنسيّة المغطّاة بالباش. نحبّ زادة من توّة نطمّنكم راهو ماهيش باش تكون حصّة متاع دروس خصوصية في القانون الدستوري وتولّي قينية وكلام صعيب وتكسير بطاطا، أما الأكيد هو أنّو فمّا برشة ما يتقال وما يطرح مواضيع للتفكير في الدستور التونسي، والأهمّ هو باش الناس اللي عمرها ما إهتمّت بالأمور هاذي تهتم على الأقلّ ويكون عندها وعي بالمسائل الأساسية

من حينك إمّالا، حضّرولي لوحاتكم وطباشيركم وإستعدّو لإنطلاق موسم القراءات الدستوريّة على المدوّنة الفضائية