mercredi, mai 21, 2008

يا لاهي بأزمة لبنان شوف حلّ لأزمة والديك

عندما يأتي المساء، بيغ تراب بوي يصبح بيغ الرومنسي ويسبح في عالم الخيال والحبّ والأفكار الورديّة، وهاذاكة علاش الليلة قرّرت باش نحكيلكم على موضوع رومنسي جدّا ألا وهو... ههههه، جدّت عليكم؟

في الحقيقة ما كانش عندي موضوع محدّد باش نحكي عليه اليوم ولكن لفت إنتباهي أنّها قناتنا الناتنة، عفوا حبّيت نقول الوطنيّة، إختارت كموضوع لملف النقاش لسهرة الثلاثاء مسألة الخلاف اللبناني والمساعي العربيّة لتسوية الأوضاع في هذا البلد الشقيق.

بالطبيعة إذا كان قناة سبعة تحبّ تنافس برنامج "بالمكشوف" إلّي يقع بثّه على قناة "حنبعل" في نفس التوقيت، مع كلّ ما يجري من مستجدّات في البطولة متاع الكورة، وبمشاهد انتظرها عشاق كرة القدم طول الموسم من نوع معزّ إدريس يذبّل في عينيه كيف الهجّالة، فإنّ ملف حواري كيما هذا لازمو يكون فعلا يدور حول موضوع في صلب إهتمامات التوانسة ويكون فيه على وجه الخصوص إضافة بالمقارنة مع كلّ ما يذاع ليلا نهارا في القنوات الإخبارية العربية حول ملف لبنان، وبالطبيعة يلزم المتدخّلين والمدعوّين والمنشّط يكونوا في مستوى ينجّم يشد إنتباه المتفرّج ويشرّهو باش يتفرّج.

بالطبيعة ومن غير تشويق أو مفاجآت، كان البرنامج مهزلة، أو على الأقل الدقائق المعدودة إلي شفتها منّو: نفس الرهوط وخاصة الصحفيّين إلّي جابوهم في حوارات سابقة حول مواضيع أخرى وما أعطاو كيف العادة حتى إضافة. أمّا "المنشّط" اللي عوّض هاك الفقمة فإنّه كان أحسن منّو شويّة، ونقصد فعلا شويّة بالكلّ، ولكن مستواه كان تاعب برشة وننصحوا ما عادش يعمل في روحو هالعملة خاطر ماهوش متاعو، زايد، من غير ما يحاول.. (والله لا نقصد باش نحبطلك عزائمك يا شسمك أما والله خاطيك الخدمة متاع التنشيط التلفزي، سبحان الله، حاول تقبل الفكرة هاذي وانقذ نفسك بصنعة أخرى قبل ما يفوت الأوان. لمصلحتك نحكي معاك وراس خويا..)

المهمّ هو أنّي حبيت نقول أنّها لبنان بلاد عزيزة علينا الكلّ، واللي قاعد يصير فيها شيء مؤلم للتوانسة الكلّ، ولكن راهم اللبنانيين ماهمش أعزّ علينا من القفاصة، وكيما يقولوا فيها "الأقربون أولى بالمعروف"، وبالتالي فإنّي نتصوّر أنّو موضوع الأزمة متاع قفصة وأريافها تهمّ التوانسة الكلّ أكثر عشرين مرّة من أزمة لبنان وأحزابها وسوريا وجولانها وإيران وأتباعها، وبالتالي فهي تستحق قبل غيرها بألف مرّة فتح حوارات وملفّات تلفزيّة في القناة الوطنيّة، ولهنا مانيش نقصد في حصص كاراكوزيّة كيما إلّي تعملها هالة الركبي وتحكي فيها على الصناعات التقليديّة والإنجازات الشبابيّة والأغاني والرقصات الفلكلورية. نحكي على ملف متاع نقاش جدّي حول أسباب الأزمة وحول آش صار وكيفاش وعلاش، وخاصّة السبل للخروج من الأزمة هاذي، وبالطبيعة يمكن للأطراف الكلّ، بما فيها الرسميّة والحكوميّة، أنّها تبيّن موقفها وتبرّر للناس الخيارات متاعها في عوض يقعد الحديث والتواصل بالإشاعات والقيل والقال، وعلى كلّ حال راهو حتى شيء ما عاد ينجّم يتخبّى، بل بالعكس، إلّي في بالك خبّيتو يزيد يتنشر أكثر من قبل ويتخلّط الصحيح بالغالط وزيد الماء زيد الدقيق.

أمّا بالنسبة للقناة الفضائيّة المرهّزة متاعنا فإنّي نحبّ نسألهم: زعمة لبنان ناقصة قنوات تلفزيّة باش تحكي فيها على مشاكلها وإلاّ هاك الأربعة بنادريّة متاع ملفّ تونس سبعة باش يلقاولها الحلّ لأزمتها؟ تي هو كلّ حزب وكلّ حومة في لبنان عندها أربعة قنوات فضائيّة، هذا دون "الجزيرة" و"العربيّة" والـ"بي بي سي" وفضائيّات الشرق والغرب إلّي جابت أقوى خبراء الشؤون اللبنانيّة حتى لين عملولنا تخمة إعلاميّة من كلّ ماهو لبناني. يا أخي قيلونا من مشاكل الخلق وأغزرو لمشاكلكم وإنتوما ضاربكم العما والصما والترهدين. توّة معقول منطقة كاملة في بلادنا خايضة توّة ليها قريب خمسة شهور وهالطحانة متاع الإعلام كيف تكون كلمة ما خرّجوهاش؟ لاهين بلبنان *** ***؟

على فكرة مشكلة لبنان ساهلة ياسر حسب رأيي: ماهي الحكاية وما فيها إلّي هوما عندهم الجمهوريّة قاعدة بلاش رئيس، في حين دايرين بيها عشرين بلاد ما فيها من الجمهوريّة كان الرئيس، يقول القايل علاش ما نوحّدوش هالطاقات المتكاملة ونضمّوا الدولة اللبنانيّة لأيّة دولة عربيّة وبذلك يتواجد التوازن المفقود وترجع الأمور لمجراها العادي في إنتظار تعميم البهجة على بقيّة العرب، زعمة موش خير؟

14 commentaires:

titof a dit…

هههههههه
برجولية يا بيغ بوست عالمي
اما لواه تعطي الحلول لازمة لبنان و احنا فاش باش نتفرجو في الصيف
و لواه تحب قفصة تهدى تحبنا معاتش نلقاو تدوينات هههههههه

Sosso a dit…

Brabbi heki hela rokbi lweh rajj3ouha??
Sinon concernant le Liban :
Je pense que le prb libanais n'a rien à voir ac le fait de pas avoir de président, mais le contraire au Liban koll man y7okk rasou ywalli ra2is: erra2is essanyoura, erra2is berri, erra2is 3awn, erra2Is jaajaa, erra2is baba sanfour wenti mechi ...

Takkou a dit…

يا بيغ الحكاية و ما فيها هي انو الوخيان العاملين في تلفزتنا الوطنية يقتداو بالمقولة الشهيرة لحسني البرزان في المسلسل صحّ النوم : إذا أردنا أن نعرف ماذا يوجد في إيطاليا فيجب علينا أن نعرف ماذا يوجد في البرازيل. والمقولة هذي فيها حكمة كبيرة تفطنولها صحافيينا العباقرة...

mandela a dit…

@ البتب
عندك الحق الحكومة نجحت باش تغيب حكاية الباسان مينيي بنجاح كبير على الأقل طوال الزوز الأشهرة اللوالى تي حتى إنتي ما كتبت على الحكاية كان بعد وفاة هشام ووقت إلي الرديف و أم العرايس و المظيلة شاعلة إنتي تحكيلنا على عيد الحب والتمهميش...نسيت

Big Trap Boy a dit…

@ mandela:

إستنى شويّة حتى نحلّها وكالة أنباء أتو نولّي نعطيك الأخبار أوّل بأوّل

Anonyme a dit…

Bon il est vrai que chez nous on a une attraction pour tous ce qui est libanais: nos filles raffolent des stars libanais, nos hommes fantasment sur chanteuses chirurgico-plastiques, nos pseudo artistes rêvent de s'y exilés et même au blogosphère je crois qu'il ya un fervent spécialiste des affaires libanais (Hariri magazine ou je ne sais qui..). Personnelement je commence à cèder à cette libanomania pour une nouveauté que je considère comme un modèle à suivre pour nos pays arab(l)es: c'est le modèle de la "république sans président", par contre je ne pense pas que cette innovation aura le même succès auprès de nos dirigeants que celle de la "République monarchique", inventée, cette fois-ci, par les syriens..

Legend Of The Fall a dit…

@outsider: 9asdek ena "Diana MagaZine".

Anonyme a dit…

@Legend Of The Fall:

طلّعتها يا فالح! ههههههههه

Nakhlet Oued el-Bey a dit…

يرحم بوك يا بيغ و هو هاك المنشط يسردك تقول جاد عليه
توّه هذي تلفزة وطنية متاع بلاد في 2008 يا رسول الله
أما فمّ جرائد فيهم جماعة يرحم بوهم كيما الموقف و مواطنون و الطريق الي يحكيوا على اش صاير في البلاد
يا بيغ تكلم ساعة ساعة عالرجال صحيح النقد أسهل من البناء لكن لازم كل من ناحيته نعاونوا الأحرار

Anonyme a dit…

"nefsi nefsi w la yerham men met"
mouch el mou3alle9 wahdou elli ysardek
ettounsi zeda :
"sakih fil khra ou houa yadhen"

osbéna a dit…

إنت ما تعرفش يا بتب أنو المنشط هو..................طلع يا ب ت ب هو مدير الإذاعة الثقافية وما تقول لحد على خاطر دبر كونتراتو من عند أصحابو متع التلفزة

Anonyme a dit…

7asilou ma ybarredli 3la 9albi kan inti ya big.chaddin kan fi filastin w lobnan w nasin rwa7houm

307 a dit…

يا بيج، أولا يعطيك الصحة إلي مازلت تتفرج على هاكي القناة إلي سميتها وهوة تجي تشوف التلفزة التونسية نحي منها الكورة تولي الشكارة والبحر وساعة ساعة حتى الكورة ما فيها ما ترا !
عندي سؤال : ياخي آش فما في gafsa ؟
شفت كل وسائل الاعلام التونسية أمورنا 5 / 5 قال الراجل ! ما عندنا حتى مشكل
الفرنسيس هوني حاسدينا وما تنساش : تونس بلد يحلو فيه العيش

Unperfectchild a dit…

maw 3andekchi, 3andi