mardi, novembre 27, 2007

!! تسـتــانـــس



كتب خونا الباهي أزواو سومنديل أوراغ منذ بضعة أيام قصيدة نسج فيها على منوال الكاتب التونسي علي الدوعاجي تحت عنوان "أبقى ديما ضاحك باشش ما يسالش"، وبصراحة القصيدة كيما كتبها أزواو عجبتني برشة وخلاتني نفكّر باش نواصل على نفس المنوال، فكان المورسو التالي اللي نهديه لعم علي مقابل طيبة قلبو وحسن أخلاقو وزادة الأغنية متاع هادي الجويني إللي بعثهالي بعد ما تمرمدت وأنا نلوّج عليها




إذا إنتي نهيّر تمشي * * * شايخ زاهي وما فيبالكشي
شدّك رافل وطلعت مشرشي * * * وفي بوفردة رصاتلك محشي
أبقى ديما راقد ناعس
... تستانس


إذا قريت مياة سنا * * * وراسك تعبّى وتملى
تحب تخدم قالولك لا * * * أكتافك ماهي ما تفرّحشي؟
أبقى ديما راقد ناعس
... تستانس


وإذا حليت صندوق العجب * * * وما سمعت كان لغة الخشب
لا تكرّز لا تقول الزّ... * * * ماهو الكوموند ما ضاعتشي؟
أبقى ديما راقد ناعس
... تستانس


وكيف تحط باش تاكل لقمة * * * ويطلعلك صحافي فقمة
ما تعملشي منها أزمة * * * هاذاكا آش فمّا في المرشي
وأبقى ديما راقد ناعس
... تستانس


إذا بلادك ماهيش حاجة * * * وما خلطتش على حق دجاجة
قعدلك كان البحر وأمواجه * * * ماهو الحرقة ما خطفتشي؟
أبقى ديما راقد ناعس
... تستانس


إذا تحب تلم ساقيك * * * وتاخو مريّة إلّي تهنّيك
والشيكات تدزّ عليك * * * ماهو الفايدة ما تدفعشي؟
أبقى ديما راقد ناعس
... تستانس


إذا كانك في خدمة حالة * * * وعرفك يطلع سلعة زبالة
موش خير تدوّرها جعالة * * * مادام الخدمة ما توصّلشي؟
وأبقى ديما راقد ناعس
... تستانس


إذا كان إنتي زوّالي * * * وتشوف الناس اللي في العلالي
تحسّ روحك أنـّك بوهالي * * * وربّي قلّك ما تحسدشي؟
أبقى ديما راقد ناعس
وبقدرة ربّي تستانس


وكانك تحب على الحريّة * * * وجيت في بلاصة موشي هي
وقالولك راهو يبطى شويّة * * * فـمـّك ماهو ما تكـسـّرشـي؟
أبقى ديما راقد ناعس
... تستانس


وإذا تسمع بطرنكوشة * * * شدّوها مع ليبي في حوشه
باتت ليلة في بوشوشة * * * من غدوة زعمة تروّحشي؟
أبقى ديما راقد ناعس
... تستانس


وإذا إنتي وليّد نيّة * * * ودارو بيك جماعة خوانجيّـة
جـبدولـك عالسّـلفـيّة * * * ماهي أمـّك ما تنـا...تشي؟
أبقى ديما راقد ناعس
... تستانس


وإذا سألك حدّ عليّا * * * ثـبّـتلي عليه الهويّة
وقلّو "توة كان هونيّة * * * تستناه زعمة يرجعشي؟"
وأعمل روحك راقد ناعس
وقوللهم ماهوش مستانس



19 commentaires:

samsoum a dit…

Chapeau bas Mr BTB. J'ai les larmes aux yeux!! Mouch normaaaaaaaaaal inti :))

Mariouma a dit…

:)
excellent
tu as tout résumé en quelques lignes

Anonyme a dit…

ما عندي ما نقول زايد كل حد و اصله الحاصل بارك الله فيك في ها الملزومة اللي أبدعت فيها. شد الحبل من غادي و هاني من هنا و لا يهمك توة نرجعولهم زمان الجرايد الهزلية و كل مرة نعملو طاروح.

أنيس a dit…

تي هاك طلاعت شاعر زادة :-)))

Anonyme a dit…

صباح الخير
عم علي يعطيه الصحة اللي حفّزك باش تكتب هكة
ما أحلاكم
وما تستانسوش

Takkou a dit…

تحب الرسمي ماينا باع الحسيلو والله يا بتب كان نهار يقولولي خلص باش تقر المدونة تع بتب الاما نبيع جرودي. يجعل نهارك أصفا من الضحكة الي فرهدتني بيها.

Anonyme a dit…

:)) excellent!
La grande forme qui revient! Mercipour ces moments de bonheur en te lisant !

Kibitz a dit…

Bravo !

Gouverneur de Normalland a dit…

برافو يا ب.ت.ب قصيدة رائعة و خلاّقة و ملمة...تستاهل على خاطرها الوسام الذهبي لنورمالاند
محلاه التدوين كبف يكونو "المدونين على فرد كلمة" هههههههه(كما تقول أربيكا)ه

Anonyme a dit…

مايسالش هالعيشة ال*حبة **** يسوقو فينا ولت رحبة
اللي يشري و اللي يبيع**** عينك ميزانك لا تضيع
عقابتها تسرسب اتتبع و تطيع
و اتقلي برا ميسالش

ملزومتكم ما تلزمنيش****لا نحب نعرس لا نربي الريش
آشبيني كبش بلا قرون**** صوفي ززه للصابون
نبات كارف و تبات صخون
و يقلي أصبر ما يسالش

جماعة تنبر.. دق حنك**** لا يشبع لا يطير جوع
واللي راقد ديمة ناعس****و يقلك ماهو تستانس
بلاد نبوره صبحت كوره بين ذكوره
و يقلي أصبر ما يسالش

خليني ساكت لا نقول كلام****ترصيلي مسيزي مشيت حرام
لا عايش نستنى في عنبة****لا طالب دبوزة و عنقود
شدوني لا نعمل حوسه
نسكرلكم هالتوني بلوغ

nasr a dit…

ça me fait penser à ce que chantaient awled el manajem.. "Dizz ennah", ça s'appelle.

Anonyme a dit…

el thoune2i chaguel loool
bara 2ouch3rou rabi m3akoum

Anonyme a dit…

مستانس وخديجة ماتت***بالدنيا ما علاباليشي
ابكي عالخمسين الي فاتت***سيب صالح ما نسربيشي
الخضراء احوالها مالت***دموعي الكل ما تززيشي
رضينا بالهم لين كحالت***طبيبي يدكز ما يداويشي
دمومات الي قبلنا سالت***كسرة لليد ما تبوجيشي
تاكل كف تقعد ساكت***نزيدك الف ما يعنيشي
دون با بيغ راهي تنا*ت***طار الفقمة ما يغنيشي
دوبلوفاي باي فمو ماصت***قلبو معبي ما تدريشي
تن*نا الكل طاير حاطت***كاسي كاسك مايرويشي

Anonyme a dit…

Wallahi tbarkallah 3likom el kol, 3anna chou3ara2 mouch normal, 5ir men hekel 3affata (sem7ouni fil kelma rahou chey a9wa menni) elli 7attinhomlna roumouz leche3r fi Tounes. 3raftouni b1 sur 3ala chkoun na7ki, behi haw bech na3tikom chwaya mel ebde3 mte3ou :
"...rajoulon asla3 9ama yawma athoulèthè2i liyechtèri mochtèn..."
OU AUSSI :
"9erdon ya2koulou banana wa banana ta2koulou 9erdèn"
3an moudir beyt ache3r fi tounes

Anonyme a dit…

kén tkammel hakka ya btb lama ya3mloulek témthal fel l'avenue..
w barra rabbi m3ak!

jalel a dit…

بااله تفرج عل البوبليسيتي متاع الكوكا اللي يوريو فيها التونسي سارق و متخبي في خزانة على ظهرو شكارة و لابس كيوس و بقية الشخصيات الطبيب و العالم و غيرو مظهرهم أوروبي و بعد أشرب القازوز باش تهضم و تو تستانس ما يسالش هو احنا كيفاش تحبهم يشوفونا و قت اللي احنا ما نجوش عباد

Anonyme a dit…

el mochkol elli echa3b ettounsi walla mestèniss!!! w sé3at t9oulchi 3lih yesta7la!!! C'est quoi le solution bliiiid-barcha-boy???

Anonyme a dit…

ya3tek bel 5eer ya system failure, haka t9oul fi mizghuenitou 3ib 3lik irajel koulou i7sess o mache3er tellemnt kthour 3lih el chay walla youch3er, mais bon il est pas pire hawka 3la 1245965 bayet yatle3chi b7aja tousle7

Anonyme a dit…

LOOOOL, hetha ken matla3ch b7aja o5ra
:D