lundi, mai 05, 2008

نقابة الصحافيين التونسيّين تصدر تقريرها السنوي وتتحدّث على بعض المدوّنات

اليوم تلقيت عبر البريد الإلكتروني نسخة من التقرير السنوي الصادر عن النقابة الوطنيّة للصحافيين التونسيّين والمتعلّق بموضوع حريّة الصحافة في بلادنا. التقرير ظهرلي شامل وجيّد، ويمكنكم تنزيله والإطّلاع عليه عبر الرابط هذا، خاصة وأنّه شمل كلّ القطاعات المكتوبة والسمعيّة البصريّة بتحليل موضوعي وصريح.

اللي أثار تعجّبي هو أنّ التقرير المذكور تعرّض بالذكر لمدوّنتي ومدوّنة "بودورو" كأمثلة للمدوّنات اللي تلاقي متابعة وإهتمام. نقول تعجّبي لأنّي ما نعتبرش نفسي نقوم بعمل صحفي أو ذو علاقة بالصحافة، ولكن كانت لقطة حلوة منهم على كلّ حال.

إنشالله تواصل نقابة الصحافيين على الطريق الصحيح، آشكون يعرف بالكشي يجي اليوم المبارك إلّي نحتفلوا فيه بإنقراض حيوان الفقمة من أعمدة الصحافة الوطنيّة.

ملاحظة: نعتذر على الغياب القصير على المدوّنة لأسباب مهنيّة، وزادة على عدم نشر التدوينة متاع المقامة "الجربوعيّة" إلّي كنت وعدتكم بيها، وذلك عملا بمبدأ "كول وقيس" في التعامل مع الواقع التعيس، وتحاشيا للخروج عن الموضوع في علاقتي مع الجربوع. حاسيلو للحديث بقيّة كيف نتفاضى بيكم


13 commentaires:

Anonyme a dit…

الحمد الله لاباس
والله خفت عليك من عم خليفة
ربي يسترك يا ولدي

titof a dit…

اول مرة راك متفائل يا بيغ
لكن للاسف نقلك النهار الي تحلم بيه مستحيل يجي
مدامنا في عهد التغير منسمعو كان صحافة التنبير
ونصبحة تبع سياسة المنذر ثابت

mandela a dit…

@ btb
أهلا بالمكبوس شنية بدلت الساعة بساعة أخرى ونعلت بليس المتجربع ونقشتلنا شبه بوست على ناجي البغوري
تعرف يا بيغ المفاجأة السعيدة اللي حصلت نهارت السبت بخلاف التقرير الشجاع متاع السنديكا هو الحضور المفاجىء لولد باب الله اللي استقبل استقبال الأبطال
العاقبة ليك

Anonyme a dit…

wallahi kont ne9ra fi erraport, w 3jebni barcha...
et c'est la premiere fois que je lit un rapport d'un syndicat où ya pas des remerciments au chef de l'etat, blablabla..et puis les critiques sont tellement justes..mella bouffée d'oxygène en attendant elwehed yetneffes belgdèèèèè

HNANI a dit…

يا بيغ راهو اليان ماحبش يتحلّي، علي كل حال أنا إنقول انشاء الله تكون مدرسة للجماعة و انا فرحت كيف جبدوك بالخير انت وخيان أخرين مدونين
كل خطوة باهية انباركوها

Anonyme a dit…

هالغيبة فيها إنّّ
ّالحاسيلو هاك المقامة تبقى فلتة من فلتات الإبداع الجربوعستاني و سحبها في وقت قياسي و إختفائك من الفضاء الإلكتروني حتّى برد الحس تصرف جربوعي صرف

Ouss a dit…

Six ans après...je ne regrette point le fait d'avoir quitté Canal 21...
Au moins on m'a payé, alors que d'autres ne savent même pas de quelle couleur est fait leur fric...

الــبوهــــالـــي a dit…

خارج غلى الموضوع

اقترحتك للمشاركة في اللعبه الترفيهية هاذي : ـ http://roufrouf.blogspot.com/2008/05/blog-post.html

الكاتب a dit…

تقرير مهمّ من نقابة الصحفيين اللي الى حدّ الآن مقدّمة مردود " معقول" وتحاول تمشي على الحبل من غير ماتطيح. ان شاء اله يواصلوا هكّه ويزيدوا شيئا فشيئا في جرأة مطالبتهم بحرّية التعبير والإعلام في بلادنا وبتحسين أوضاع الصحافيين

Neodallo a dit…

Saba7 El khir:
Nesma Sari7a Touchre9 hadha Essaba7.. Khalli Le Temps fait le reste :P

Anonyme a dit…

Salut BTB,
Wallah tifja3na 3lik.
A7san ma9olt, koul w 9is wrod balik.

osbéna a dit…

بلكش جد عليكم التقرير: الحكاية فيها إن و أخواتهاوفيها حصيلة لجماعة و إلا لواحد من الناس ونفكرو بعضنا يا جماعة

Anonyme a dit…

واللهي التقرير فيه وعليه. يلزم نسّبو شوية الأمور. أنا نرى انو الصحافة الالكترونية هي الرهان توة. ويلزن النقابة تاخو هالمعطى الجديد بعين الاعتبار. أي انها تطرح المطالب الخصوصية بها النوه الجديد من الصحافة بعين الاعتبار كيما الرقابة المفرطة وطريقة التعامل المالي مع الصحفيين في ها المجال الخ