vendredi, juin 06, 2008

حكاياتي العائليّة مع الصندوق الوطني للتقاعد و"الدخول في الحيطة" الإجتماعيّة


عندي الوالد طول حياتي وأنا ويّاه كيف الفار والقطّوس، أو يمكن كيف القطّوس والجربوع، أو الكلب والقطوس، حاسيلو باش نختصر الحكاية كيف حاجة تظهرلي أنا باهية نبدى متأكّد بالمسبّق أنّها ماهيش باش تعجبو. الوالد، الله يطوّل في أنفاسو رغم كل شيء، متقاعد من الوظيفة العموميّة، عدّى عمرو في خدمة الصالح العام والدولة والوطن بكلّ تفاني وإخلاص، وبالرغم أنّه كان في بلاصة تغري الإنسان باش يستغلّ النفوذ ويخدّم مخّو باش يضمن مستقبل أولادو (أنا مثلا)، فإنّه قعد إنسان متشبّث برشة بنظافتو وضميرو المهني وفخور بترفّعو على الأمور الماديّة هاذي، وحتى كيف خرج للتقاعد لا عمل مشروع كيما تعمل العباد ولا حتى خذالي رخصة متاع "حانة مطعم" باش نولّي على الأقل نوفّر بعض الدنانير متاع مصروف البلعة. مفيد الهدرة أنّو خرج ما حيلتو إلاّ هاك الشهريّة متاع التقاعد التعيس وبرشة وقت فراغ يستغلّ معظمو في نفخان الكذا وشيء متاعي. حاسيلو آش باش يعمل الواحد، ماهم إلاّ والدين ومن المستحسن أنّهم ما يطيحوش فينا، ولذا تلقاني ديما نوسّع في بالي ونعمل روحي مانيش هنا.

باش ما نطوّلش عليكم بحكاياتي العائليّة ونتعدّى لجوهر الموضوع، الوالد صحّتو تعبت شويّة مؤخّرا، وكيف مشى يعدّي قالولو عندك عرق في القلب مسدود بنسبة كبيرة ولازم عمليّة يدخّلولو فيها درا آش من ماكينة في العرق باش تسرّحهولو، حاسيلو حكاية باش تتكلّف الكلّ في الكلّ حوالي ثلاثة ملاين ونص. يقول القايل موش مشكل بالنسبة لإنسان عندو تغطية إجتماعيّة متاع أعوان الدولة وما أدراك، يوفّرها الصندوق الوطني للتقاعد والحيطة الإجتماعيّة، هاذاكة هاك إلّي طول حياتك وهو يجلّم فيك ويقصّلك في الفلوس من شهريّتك إذا كانك تخدم في القطاع العام.

هيّا سيدي جينا نشوفو في حكاية الـ"سي آن آر بي آس" هاذي، ياخي طلعت من هاك الثلاثة ملاين واش ما يتكفّلولو كان بمليون واحد والباقي يكمّلو من جيبو. يعني زوز ملاين وبرشة صرف تكتّها "كاش"، ما كانش تنجّم تسرّح قلبك وحدك بتلّ مصدّد كيما يسرّحوا المسكوكة، وإلاّ زادة تنجّم تقعد هكّاكة وتستنّى حتى لين في أيّ لحظة تطيح تتبربص وتاكل راسك، ونتصوّر الصندوق يبعثلك وقتها رسالة شكر وإمتنان على خدماتك الجليّة وتضحياتك في سبيل توفير مصاريف زايدة كانت باش تتكبّدها الميزانيّة متاعو. خلاصة الهدرة هالصندوق طلع إسمو الحقيقي "صندوق التقاعد الداخل في الحيطة الإجتماعيّة"، وهو أمر ما نستغربوش بما أنّي عندي حساسيّة ضدّ كلّ أشكال "الصنادق" ونعتبرها بكلّها داخلة في حيطة من الحيوط، سواء كانت إجتماعيّة أو غيرها.

لكن هذا ما يمنعش الواحد باش يتسائل زادة إذا كان الشيء هذا معقول؟ ياخي الراجل باش يعمل عمليّة تجميل وإلاّ باش يركّب صياغة في فمّو حتّى يرجّعولو أقلّ من شطر التكاليف متاع العمليّة؟ وإلّي ما عندوش بجاه ربّي آش يعمل؟ يمشي يساسي وإلاّ يشربها كيف الناس الملاح؟ نتصوّر إجابتكم باش تكون كيما كانت إجابتي، يعني موش معقول، على خاطر إذا كان أعوان الدولة، بعد سنوات من الخدمات الجليلة للوطن، باش نخلّيوهم يموتوا تحت الحيط كيف الكلاب، ما عادش حتى حدّ عندو الحق باش يجي يقول آشبيها الناس تاخذ في الجعالة وتستغلّ في مناصبها، على خاطر يولّي الواحد يحارب من أجل البقاء بكلّ الوسائل مادام صحّة بدنو في الميزان.

بالطبيعة في الحالات هاذي، وكيما في كلّ الحالات، المشكلة باش تجي في آخر المطاف في رأسي أنا، أما الله غالب، آش باش نعمل؟ والدينا كبّرونا وتعبوا علينا، ولو حتّى طلّعونا عيّاق، أما ما فيها باس نهزّوهم باش أولادنا نهار آخر ما يطلعوش معانا كلاب حاشاكم. خليفتي على الله ولا مزيّة لصندوق.

39 commentaires:

Sonya a dit…

شيء يؤسف
ربي يشفيلك الوالد و يخليك
ليه

mandela a dit…

zeyed ya btb kollha marbouta bidaweyer il imbiryaliya lmotwa7cha wimla2et sondou9 enna9d eddouwali wil bank mondiale wlazemna na3mlou 3aridha tandid wa chajb wistinkar wataw trawejhelna errafi9a attari9 ljadid!!!
tamaniyetna bichife2 erapide lilweled wmathebik twaselou ta9diri wi7tirami la lichay2 illa liannou jebelna falta min falatet l3asr kifek.

ulyssen a dit…

bon retablissement a ton pere deja, j'espere que tout se passera bien pour lui, le remboursement depend de la nature de l'operation, et c'est choquant de voir un truc aussi grave remboursé a peine a 30% !! alors faudrais peut etre deboucher la veine aussi a 30% ?!! c'est n'importe quoi !

البرباش a dit…

كثر الهم يضحّك و الله

ربي يفضلك الوالد و إن شاء الله يشفيه و يبقيه بصحتو و عافيتو

ربي معاكم

Ignescence a dit…

Avant tout, prompt rétablissement à votre père et que son pontage soit une réussite :)
Mais, je voulais surtout m'indigner de ce comportement, quoique récurrent, de la CNRPS (Communauté Nationale des Ratés, des Pourris et des Sociopathes. Où s'arrêteront leurs arnaques? Je me demande!

Walid ben omrane a dit…

Inchallah hadhaka 7ad elbas. Rabi yechfih elwaled. Caisse Nocive Rudimentaire Pour Santé.
Bon courage!!!

Anonyme a dit…

From Weld bled

Je ne suis pas sur de votre histoire
Allez SVP voir avec la CNAM - Normalement pour les maladies du coeur, c'est une prise en charge à 100% - J'en suis certain
La procédure approximative est la suivante:
Le médecin trateur rempli un document expliquant la maladie
Vous allez voir La CNAM et vous demandez une prise en charge
Aprés environs 1 mois vous recevrez inchallah une réponse favorable
Vous choisissez une clinique conventionéé...... wa INCHALLAH LABAS
SVP si ça marche avec vous REEDITEZ votre post - La tunisie fait un travail impressionnat pour les maladies chroniques, et nous devons etre reconnaissant à notre pay

Bel Malwene a dit…

نشاله لاباس الوالد يا بيغ ...
حتى أنا تعديت بنفس التجربة تو عندها 9 ولا 10 شهور ... الوالد عمل عملية متاع بونتاج على 5 عروق فالقلب و معاهم كاروتيد الي هو العرق الي يهز الدم للمخ وما لندراك !!! حاسيلو باش ما نطولش عليك العملية تكلفت تقريب 8 ملاين (بما في دلك الحشو الغوي متاع كلينيك الاك) حكـّيناهم من أجنابنا العايلة الكل ... وبعد مفاوضات كبيرة مع "الحيطة الإجتما دراشنية" (سي آن آر بي آس) قالولنا باش يرجعولو 100 فال 100 من المصريف ... و هنا الحمدوالله يا ربي لتو نستناو بعد تقريب عام ... ضهرلي باش يرجعوهوملنا نهارت الي يوليو ال 8 ملاين ماعاش يجيبو خبزة ... يا ولدي طيش عليك !!! كدبة كبيرة هدي لوغة السيكيريتي سوسيال في بلد الإمتياز و التميز

Clandestino a dit…

انشالله لاباس الوالد

اما كيما قالك ولد البلاد
امراض القلب فيها بريز ان شارج من الكنام و بصفة كليّة
عاود ارجعلهم و هزلهم الدوسي الطبي متاع الوالد
انا زادة فمة شكون في العايلة عمل نفس العملية المدة اللي فاتت (في مصحة خاصة)و ما دفعش حتى مليم

m0ntassar a dit…

nchalla ma 3andou saw el weled ya big

Anonyme a dit…

From Weld Beld
To Belmalwene
El hamdo lillah pour votre pére
la prise en charge pour les maladies du coeur et plusiseurs autres maladies chroniques EST INTEGRALE

Si la CNAM n'a pas encore remboursé, c'est que probablement votre dossier n'est pas complet (plus une grande dose de bureaucratie à la Tunisienne)

Toutefois, il faut reconnaitre que notre pays fait le maximum, selon nos moyens, pour les maladis chronique

Je vous jure, quand j'étais étudiant aux USA, j'au eu une appendicite aigue, l'hopital a refusé de m'opérer avant que je paye la toalité de l'operation....

Vive la Tunisie, c'est en montrant les points positifs de notre pays que nous pouvons combattre les points négatifs, et dieu sait combien ils sont nombreux

Ignescence a dit…

1 mois pour avoir une réponse de la CNAM et vous trouvez que c'est un exploit. On parle de pontage si vous n'êtes pas au courant et parfois c'est une opération plus qu'urgente!
Mais, MERDE! qu'ils se manient les derrières pour évoluer et pour accélérer les procédures! On demande juste à ce qu'on nous prolonge notre galère quelques années que de mourir tout de suite et ils osent nous demander de patienter pour ça!
La prochaine fois, il faudra faire une demande à la CNAM pour mettre sa femme en ceinte sinon ils pourront vous refuser les soins et les frais d'accouchement à rembourser!
Je me demande pourquoi ils me prélèvent tous les mois 70Dt sur mon salaire? l'assurance groupe m'en prélève moins et m'offre plus!

Big Trap Boy a dit…

@ Weld Bled et Clando:

التعويض الكامل هاذاكة بالنسبة للعمليّات إلّي يركّبو فيها روسور عادي في العرق، أما في الحالة متاعو بلاصة العرق جويّدة وجاية في تقاطع متاع عروق، يعني لازمو روسور أمريكان أغلى من الآخر بزوز كيلو، وبالتالي الكنام ما ترجّع كان مليون على خاطر تحسبلو على حساب الروسور متاع أمورتيسور الكاترال اللي في 40% من الحالات إلّي يركّبوه يعاودو يمرضو، وزيد على هذا فمّا تصويرة قبل العمليّة هاذي بقريب 700 دينار ما يستعرفوش بيها وما يرجّعو منها حتى فرنك

يا ولدي قاعدين يشجّعو في التسريح بالتلّ، هاني قلتلك

Big Trap Boy a dit…

à tout les autres: un grand merci et inchallah rabbi i5allilkom wéldikom entouma zéda :)

Anonyme a dit…

from Weld Bled
to Ingnescence,

Billehi ne deformez pas mes paroles (Une specialité à la Tunisienne): J'ai bien dit APRES ENVIRONS UN MOIS, pour la prise en charge, c'est à dire vous NE PAYEZ RIEN -
En cas d'urgence, votre médecin traiteur pourrait demanader une commission d'urgence
Et notez qu'un pontage n'est pas si urgent que vous le pensez, ça se programme

Et finalement, notez qu'en cas de retard de reception de prise en charge pour les opérations du coeur, les cliniques acceptent de les faire avec une garantie (chéque? ou traite)

BazBouz a dit…

ya 5ouya rabbi yechfilek el waled mta3ek w rabbi m3ak . hedhi 7kaya mouch lyoum wella lbare7 fibelna beha , allah ghaleb haka el 7aaal. On vis avec come on peut .

Anonyme a dit…
Ce commentaire a été supprimé par un administrateur du blog.
Big Trap Boy a dit…

خلّينا في الموضوع يا سي رمضان، أهوكا فمّا بوست ولاّ زوز على موضوع قفصة حط فيهم تعليقك الجديد

شكرا

Ignescence a dit…

@Weld Bled: Je n'ai pas déformé tes paroles mais j'ai donné mon avis tout cours sur les procédures de prise en charge. en cas de phlébite, le pontage devient une urgence. Moi je dénonce cette bureaucratie là où on n'en n'a pas besoin.
Pour un entraineur d'équipe de foot qui n'ira plus jamais en coupe du monde, on crie au scandale dans les journaux quand on accumule une semaine de procédure alors que pour une question de vie et de mort qui a été déjà payé des taxes et des impôts qu'ils nous impose, un mois et on trouve ça normal!

أرابيـكا a dit…

ان شاء الله هاكا حد الباس في المال ولا في الرجال يا بيغ ...بقلة ليهم الفلوس ...بره صبّر روحك بشوية دعاء خير خيرلك

Big Trap Boy a dit…

@ أرابيكا:

هاو قاللك حتى دعاء الخير ما عادش يقضي في البلاد، خاصّة مع إرتفاع أسوام البترول
par contre
دعاء الشر قالّك ماشية معاه بالضبط، تطلع دعوة الشر مضمونة الوصول للسماء السابعة وإذا بيها السخطة نزلت على راس مولاها تزغرط
هههه
ربّي يستر وبرّة

24Faubourg a dit…

inchallah lebes el oueled ya big, allah ghaleb, el 7amdellah enti tekhdem w lebes. khliftek 3la rabi

Amel a dit…

Salut BTB
bon rétablissement à ton papa. Normalement ( en fin s'il y a une normalité en Tunisie) la CNAM devrait rembourser 100% de cette opération bien sûr si son médecin, son chirurgien, sa clinique, ect sont conventionnés voir ce lien chapitre 3: http://www.cnam.nat.tn/index.php?option=com_content&task=view&id=16&Itemid=19. Pourquoi ils ne veulent rembourser qu'une partie? C'est quoi leurs arguments, ils lui ont demandé de consulter leurs spécialistes ou pas?!!!
Et je ne sais pas si tu es au courant mais dès mois de juillet les retraités devront cotiser 4% pour la CNAM voir ce lien http://www.cnam.nat.tn/index.php?option=com_content&task=view&id=1&Itemid=2.

Malla aoubach!!!

Tarek Kahlaoui a dit…

إنشالله لاباس.... المهم العملية تتعدى انشالله كيفما يلزم و صحة والدك بخير...

كيفما قال "ولد بلاد" فمة دول بما فيها أمريكا التغطية الصحية الاجتماعية (متاع "الصنادق" العمومية مش التأمين الخاص) مش موجودة أصلا.... هذا طبعا ما يعنيش الامتناع على نقد الوضع الراهن على أسس معقولة...

و إنت زادة "الصندوق" إلي عاملو متاع "الزهاز" ماو ميسالش كي تجبد منو حويجة ساعة ساعة
:)

Amel a dit…

Je vois que t'as déjà expliqué pour la CNAM.
Malla aoubach au carré!!!
Déjà le fait qu'ils imposent un médecin conventionné c'est incompréhensible!!! Où bien ils imposent à tous les médecins par une loi d'être conventionné ou bien qu'ils nous lâchent avec ça. Mon oncle a fait une opération lourde (en urgence) et a envoyé sa demande à la CNAM mais ils ont refusé de le rembourser parce que son médecin n'était pas conventionné. Mais bon à l'époque des faits on n'était pas aux courants de ces contraintes, puisque nous le sommes depuis très peu depuis février je pense.

Suite à la participation de mon oncle à émission télévisé sur la CNAM (à la con il faut dire) où il a raconté son histoire, ils lui ont remboursé la totalité de la somme des opérations qu'il a subi!!! Peut-être que tu devrais faire un tapage dans ton blog sur les conneries de la CNAM, comme ça t'aura gain de cause ;)

Bibi a dit…

@ weld bled, moi aussi, j'ai eu une appendicite aigue quand j'étais une étudiante à tunis et la clinique ibn sina a refusé de m'opérer un dimanche avant d'avoir une avance alors que toutes les banques étaient fermées..
Vive la Tunisie comme tu dis..

v4vendetta a dit…

Et on revient à la cause des jeunes pour leur refus du mariage dans ton ancien post à ce sujet.
Moi par exemple j'ai casqué 9500 dinar de ma poche (bien sur grace à un crédit) pour sauver ma mere d'un cancer.
En effet, le traitement coute 10000 dianar. Lorsque j'ai pris en charge ma mère dans la cnss et envoyer un dossier à la cnam, la comission m'a répondu "favorablement" pour 150 dinar, car ils (un ensemble de medecins dite spécialistes) ont jugé que les deux traitements qui coutent la peau des fesses ne sont pas nécessaires pour le traitement!
Donc sur un traitement qui coute 10000 dinar ils m'ont remboursés que 150 dinar soit 1.5%. Je me demande bien c koi l'utilité de cette cnam.
Ahawka fi ekher el aam, on dit voila on a eu 99.99% de dossiers favorables..

TA77AN BTB a dit…

salut inchalah bouk lebes elli howa bouna elkoll..

chokri a dit…

j'espère bon rétablissement à ton père mais il ne faut pas confondre CNRPS et CNAM, parceque c'est cette dernière qui est chargée de la couverture maladie des assurés sociaux et non pas la CNRPS

Anonyme a dit…

bonjour,
inchallah lébéss el waléd
walahi ça fait un mong time wéna je regarde de temps en temps ha site éttahfoun
je suis résident à paris at hani ntab3 fi akhbar tounes a travers ce site eli 3gibni barcha
je me suis inscrit spécialement bech nkolék nchallah lébées et rabii yéchfih

Anonyme a dit…

Nchallah el wéléd labèèss willézém lézem, béch tek'bsou el 3béd zéda b'téll!
Vous avez philosophé sur l'abbréviation de la CNRPS, à moi alors la.. "Ki'Namm"

gabsi a dit…

enchalla bouk labess.il y a des cliniques conventionnées avec la CNAM POUR LES MALADIES CARDIO-VASCULAIRES ET TU NE PAIES RIEN.ZERO MILLIME.BONNE CHANCE.

tikaaa a dit…

nchallah lebes ya BTB... amma ca me fait penser a un truc avec les asssurances... pour ce qui en est des remboursement des lunettes de vue ... je me souviens qu'on m'a conseille' bech nesfed kad ma ennajjem ou nekhou des lunettes mta3 400 walla500 de toutes facons l'assurance trajja3 90 walla 85 fel 100... bon ena manich saloppard barcha, j'ai juste achete' mta3 260, yekhi el bayye3 khallaheli b'210 akahaw ou kayyedli 260 fel warka mta3 el assurance ce qui fait que rajj3ouli akther melli dfa3t ... finalement ... ena et je suis sur barcha kifi... 7cheweh lel 7akem que ce soit expres walla cappucin... ca me fait de la peine de voir que famma 3bed 7achiettou lel assurance men b'hemet el 7akem ... walla 3lech ma ia3mlouch des tarifs pour ce genre de trucs. ou encore une fois, je m'excuse ya twensa khater grath'kom fi 30 walla 40 dinars plus des lunettes blech (ou famma chkoun kalli barra zid khouth mreyet chams hekkeka.. amma ena dhamiri ma sma7lich)

ou nchalla lebes lennes el kol

alopex a dit…

تراب قبل كلّ شيء تمنياتي بالشفاء العاجل لبوك المهم العملية تتعدّى بخير سينون نصيحتي للأخرين أعملوا كيفي اخدموا مع المشغل متاعي أتو ما يخلصلكم حتّى دورو في نظام التأمين على المرض وهكّة حتّى حدّ لا يكون مكرّز لا من سنربس لا من سنسس لا من كنام

samsoum a dit…

نشالله لاباس يا خويا. آش بش تعمل في هالسيستام متاع العوج و القهرة
علي لاقل جاب رجل نفعو و خليهم يشيخوا بالزوز كيلو اللي وفروهم للصندوق :)
ربي يخليوهلك

yes_in a dit…

inchallah labes !

wallahi chay youja3 el 9alb ...
kont au moins n9oul tounes socialiste chwayya w au moins famma des bien sociales ... tla3 chay !

mais ca reste mieux que les Etats Unis, l'autre fois une fille s'est évanoui par le soleil pour 1500$ ... et Il faut payer votre propre assurance pour être remboursé ... et ce n'est pas sure aussi ...

nchallah fi tounes 3alla9al la3bad yo9o3dou 3baad w y3awnou la3baad ...

Anonyme a dit…

Bled mafia mtaa n´jaara bkollha snaadik

eagleeyez a dit…

BTB, si tu veux on fait une collect, moch e7ssan wala sad9a, na7na n7ebouk we ne7tarmouk yasser, we bouk eli jabek men solbek ntmanwlou le3mor el kolou we ychouf welidatek.

Kol wa7ed yejoud beli 3andou, ton blog a beaucoup donnée a chacun de nous, et c'est ton droit d'avoir notre aide en contre partie.

Big Trap Boy a dit…

@ eagleeyez:

شكرا يا صديقي

الله يعزّك ويبارك فيك

ولكن الحمد لله العمليّة تمّت لاباس اليوم والفلوس ماهيش مشكل

الله خير كان خوك البيغ باش يحير في زوز كيلو عاد نمشي نعمل كوردة خير
:)

خلّي كيف نجي نعرّس لمّولي 30 ولاّ 40 كيلو باهين باش نخلّص بيهم البلعة، ماك تعرف الأحباب برشة

هههه

على كلّ كلمتك الطيبة كانت أحسن من فلوس الدنيا