حكاياتي العائليّة مع الصندوق الوطني للتقاعد و"الدخول في الحيطة" الإجتماعيّة

عندي الوالد طول حياتي وأنا ويّاه كيف الفار والقطّوس، أو يمكن كيف القطّوس والجربوع، أو الكلب والقطوس، حاسيلو باش نختصر الحكاية كيف حاجة تظهرلي أنا باهية نبدى متأكّد بالمسبّق أنّها ماهيش باش تعجبو. الوالد، الله يطوّل في أنفاسو رغم كل شيء، متقاعد من الوظيفة العموميّة، عدّى عمرو في خدمة الصالح العام والدولة والوطن بكلّ تفاني وإخلاص، وبالرغم أنّه كان في بلاصة تغري الإنسان باش يستغلّ النفوذ ويخدّم مخّو باش يضمن مستقبل أولادو (أنا مثلا)، فإنّه قعد إنسان متشبّث برشة بنظافتو وضميرو المهني وفخور بترفّعو على الأمور الماديّة هاذي، وحتى كيف خرج للتقاعد لا عمل مشروع كيما تعمل العباد ولا حتى خذالي رخصة متاع "حانة مطعم" باش نولّي على الأقل نوفّر بعض الدنانير متاع مصروف البلعة. مفيد الهدرة أنّو خرج ما حيلتو إلاّ هاك الشهريّة متاع التقاعد التعيس وبرشة وقت فراغ يستغلّ معظمو في نفخان الكذا وشيء متاعي. حاسيلو آش باش يعمل الواحد، ماهم إلاّ والدين ومن المستحسن أنّهم ما يطيحوش فينا، ولذا تلقاني ديما نوسّع في بالي ونعمل روحي مانيش هنا.

باش ما نطوّلش عليكم بحكاياتي العائليّة ونتعدّى لجوهر الموضوع، الوالد صحّتو تعبت شويّة مؤخّرا، وكيف مشى يعدّي قالولو عندك عرق في القلب مسدود بنسبة كبيرة ولازم عمليّة يدخّلولو فيها درا آش من ماكينة في العرق باش تسرّحهولو، حاسيلو حكاية باش تتكلّف الكلّ في الكلّ حوالي ثلاثة ملاين ونص. يقول القايل موش مشكل بالنسبة لإنسان عندو تغطية إجتماعيّة متاع أعوان الدولة وما أدراك، يوفّرها الصندوق الوطني للتقاعد والحيطة الإجتماعيّة، هاذاكة هاك إلّي طول حياتك وهو يجلّم فيك ويقصّلك في الفلوس من شهريّتك إذا كانك تخدم في القطاع العام.

هيّا سيدي جينا نشوفو في حكاية الـ"سي آن آر بي آس" هاذي، ياخي طلعت من هاك الثلاثة ملاين واش ما يتكفّلولو كان بمليون واحد والباقي يكمّلو من جيبو. يعني زوز ملاين وبرشة صرف تكتّها "كاش"، ما كانش تنجّم تسرّح قلبك وحدك بتلّ مصدّد كيما يسرّحوا المسكوكة، وإلاّ زادة تنجّم تقعد هكّاكة وتستنّى حتى لين في أيّ لحظة تطيح تتبربص وتاكل راسك، ونتصوّر الصندوق يبعثلك وقتها رسالة شكر وإمتنان على خدماتك الجليّة وتضحياتك في سبيل توفير مصاريف زايدة كانت باش تتكبّدها الميزانيّة متاعو. خلاصة الهدرة هالصندوق طلع إسمو الحقيقي "صندوق التقاعد الداخل في الحيطة الإجتماعيّة"، وهو أمر ما نستغربوش بما أنّي عندي حساسيّة ضدّ كلّ أشكال "الصنادق" ونعتبرها بكلّها داخلة في حيطة من الحيوط، سواء كانت إجتماعيّة أو غيرها.

لكن هذا ما يمنعش الواحد باش يتسائل زادة إذا كان الشيء هذا معقول؟ ياخي الراجل باش يعمل عمليّة تجميل وإلاّ باش يركّب صياغة في فمّو حتّى يرجّعولو أقلّ من شطر التكاليف متاع العمليّة؟ وإلّي ما عندوش بجاه ربّي آش يعمل؟ يمشي يساسي وإلاّ يشربها كيف الناس الملاح؟ نتصوّر إجابتكم باش تكون كيما كانت إجابتي، يعني موش معقول، على خاطر إذا كان أعوان الدولة، بعد سنوات من الخدمات الجليلة للوطن، باش نخلّيوهم يموتوا تحت الحيط كيف الكلاب، ما عادش حتى حدّ عندو الحق باش يجي يقول آشبيها الناس تاخذ في الجعالة وتستغلّ في مناصبها، على خاطر يولّي الواحد يحارب من أجل البقاء بكلّ الوسائل مادام صحّة بدنو في الميزان.

بالطبيعة في الحالات هاذي، وكيما في كلّ الحالات، المشكلة باش تجي في آخر المطاف في رأسي أنا، أما الله غالب، آش باش نعمل؟ والدينا كبّرونا وتعبوا علينا، ولو حتّى طلّعونا عيّاق، أما ما فيها باس نهزّوهم باش أولادنا نهار آخر ما يطلعوش معانا كلاب حاشاكم. خليفتي على الله ولا مزيّة لصندوق.