vendredi, juin 06, 2008

مسرحيّة "حي الأكابر" : دوخة ضحك

باش ما نقعدوش ديما في البلاء والمشاكل حبّيت نحكيلكم على مسرحيّة "حي الأكابر" متاع نصر الدين بن مختار إلّي مشيتلها نهار السبت إلّي فات في قاعة الكوليزي. حاسيلو كان تجيكم الفرصة باش تحضرو للمسرحيّة هاذي ما تفلّتوهاش على خاطر بالرسمي دوخة ضحك. بون صحيح فمّا برشة نكت سمعتهم قبل أما تقعد مسرحيّة بليدة برشة وتستاهل الفرجة. هاي بعض المقتطفات:

"قاللك واحد شدّوه سارق بالة قرط حكمو عليه بستّة سنين، وواحد شدّوه سارق مليار تسيّب في نفس الجلسة، عادة هاك إلّي تحكم على القرط قام يبكي كيفاش واحد بمليار يتسيّب وأنا على بالة قرط نتحكم بستّة سنين؟ ياخي قاملو واحد في المحكمة قاللو أسكت يلّي ما تحشمش، ياخي الحاكم ياكل القرط هو؟.." ههههه

حاسيلو ما نجّمتش نتذكّر النكت الكلّ أما نصر الدين برجوليّة بليد. هو على فكرة كيف شفتو قبل العرض ظهرلي صحّتو تاعبة برشة وقلت يا ذنوبي كان يكمّل المسرحيّة أما كيف طلع للركح رجع كيف الجن ما شاء الله عليه. على كلّ حال ربّي يشفيه ويشفي جميع المومنين وحتى الكفّار زادة.

بقى أنّو عندي ملاحظة على قاعة الكوليزي وخاصّة فيما يخصّ أبواب الخروج إلّي حسب ما شفت تفتقد لأبسط مقوّمات السلامة، يعني لا قدّر الله لو كان تصير حريقة نهار من النهارات نأكّدلكم شطر العباد باش تغفّص بعضها وتموت في فمّ الباب، وبالتحديد على هاك الحديد إلّي مسكّرين بيه الثنيّة باش الناس تتعدّى بالواحد بالواحد. بصراحة الواحد يقعد باهت الناس إلّي لاهية بأمور السلامة فاش لاهية بالضبط، وإنشالله ما يستنّاوش لين تخلى باش يفيقو بالحكاية هاذي.

هيّا خويا عطلة أسبوعكم سعيدة ونلقاوكم في ساعة سعيدة.

هيهههييييييييييوووو !

12 commentaires:

Anonyme a dit…

akber mounefa9 houwa nasredin,i3adi nhar kemil whouwa bilbal3a fil la goulette apré yemchi comme koi i7eb idha7ak la3bed whouwa met7alef m3a akber kleb ...

Ouss a dit…

@ Anonyme:
De ce vous avez dit, il semblerait que vous n'aimez point Nassreddine Ben Mokhtar, mais je suis sûr que si vous allez rire devant ses sketches.

titof a dit…

@anonyme
ou moin ki ta7ki 3la nifa9 mat5abach wra anonyme en tt ca ana 3raftk chkoun mel lortk ....kiki mouch do7ktk hadi
ya wassla

Anonyme a dit…

والله حممتلي قلبي ..

جيت للمدونة متاعك باش نشوف الجديد، بعد ماتكرزت من الخبر اللي جابتو الجزيرة، واللي خسرت عليه وسائل الاحباط الحضاري الرسمية جرد بيان.

لا تباركلهم، البلاد محلك سر عندها عشرين سنة واكثر، والمجهود التبهيمي الحقيقة ماهوش هو بيدو، اما عمال يكبر ويزيد في المنهجية متاعو وينقص في الجدوى.

ينقص في الجدوى على خاطر الناس ماعادش جاد عليها، أما فما خطر أكبر، اللي هو كيما قلت تكريهنا في البلاد، احباطنا وتحقير قيم العمل والشرف والاجتهاد، نشر عقلية التواكل والتعميل على السيستام ك و س و ح وط (كتف، سرقة، ..)، وانا نشوف اللي البلاد ماشية في هفهوف على خاطر المواطن في كل مكان ولى ماعادش نافح باش يخدم حتى بالزلاط، ...

حكاية الحوض المنجمي بيدها مأساة أخرى خاطر حتى المواطن كيف يحب يحتج ولى ماعادش عندو مايقول، الاجابات ولات حاضرة، موش عند المسؤول، وانما عند المواطنين الاخرين، اللي ولاو حاضرين قابلين فادين اما يائسين.

اذا اليوم ثما حاجة تستاهل الاحتجاج، راهو الاعلام التونسي، اللي خلاني لسنوات نعتقد انو الله غالب علينا، عنا عقم ابداعي مستفحل مقارنة بالشعوب الاخرى، وجات المدونات باش تثبت العكس.

الاعلام الحر وحدو هو اللي ينجم يصلح البلاد من داخل. ياسيدي ماحاجتناش بالكل، حاجتنا بالدرجة مدير عام ورد لوطى، خلي اعلامنا يولي يفضح المساكن هذوكم بكل حرية كيف يغلطوا تو تشوفو أش يصير..

اليوم هذي حكاية ولات ملحة، لنهاراش باش نقعدو نزينو ؟

بربي شكون مازال يجد عليه، تي اليوم الواحد ولا كيف يشوف حاجة باهية في التلفزة على تونس ديراكت يكذبها بينما هي صحيحة.

هذي تعتبر حاجة خطيرة على خاطر مابقى في شعبنا كان مكرز جابد روحو أو مكرز في الهرج أومكرز راكب على الوضع..

أنا نشوف في الحكاية مخكرة حضاريا علينا في المجتمع اللي نبنيو فيه، واللي ماقعدنا شي مصدقينو باش نقنعو بيه صغارنا باش يحبو البلاد، في وقت اللي حتى تلفزتنا والا اذاعتنا الواحد خواطرو ادور كيف يغلط ويشوفهم والايسمعهم..

حتى الانترنات، ولينا رسميا البلاد الوحيدة في العالم اللي ما عندهاش الحق في الفيديو على الانترنات، كيف اللي يوتييوب والا غيرو ما فيهم كان سبان تونس في وقت اللي فيهم آلاف من الحاجات المفيدة لينا ولصغارنا وتعليمنا وثقافتنا..

الصبر وبره..

brouklou a dit…

بربي خويا اكسترافاقنزا بردلي على قلبي وأعملنا نقشة على هاك الطحان متع قناة المستقلة المسمي روحو الدكتور الهاشمي ونكر في نسبته الى الحامدي من سيدي بوزيد
راهو نفخهوملي بالطحين للحكام الكل خاصة هاليام شادد يطحن لال سعود

Anonyme a dit…

3aychou titof kiki wkif ma9otlek elwasel rabbi ;)

tikaaa a dit…

borjouleya ... ena zeda iodh'horli nasreddine mereg ou franchement choftou chwaya fi Hannaba3l, vraimement mereg barcha ... mais bon kol we7ed ou dhawkou.

je ne connais pas 7keyet el monefeq, mais ca ne change rien a rien ... errajel mleyektou thkila berrasmi...

hetha 7akki ka mouwaten bech na3ti mon avis ou 7akki fi chwaya naqd haddem ... (as'hel mel bannaa')

annestou

Badiaa بديعة a dit…

bsara7a iffashel harrajel..zeyed khatih..7atta ki 9oul nokta "toslo7" ça demande un graaand effort bech we7ed yadh7ak.

Anonyme a dit…

السلام عليكم
والله الدنيا مازال فيها الخير باش الواحد يضحك موش قمة التشائم اما الاخبار اللي دائرة بينا من جميع النواحي ومعاملات الناس واخلاق الناس وتصرفات الناس اللي مفروضة علينا كل يوم في الخدمة والشارع وفي النات وفي التلفزة والراديو تخلي الواحد حزين
وبصراحة نصر الدين ما يعجبنيش

khayati a dit…

A propos de Nasreddine... Quoiqu'il fasse, il est lourdingue et ne me fait pas rire sauf, il faut le reconnaitre, il a un peu de cran (in Hannibal TV) en ces temps de grande frousse généralisée...
Pour la salle du Colisée... L'Etat le sait et s'en moque... On dirait qu'il travaille dans l'intérêt des graveurs de disques et veut tuer les salles de cinéma... 10 milions avec 13 salles de cinéma, c'est révolant... Et on vous dit : n'avez-vous pas vu la Cité de la culture...
Il est vrai que je suis aveugle face à l'incurie de l'Etat de mon pays.

Anonyme a dit…

hihhhhiouwwwwwwwww
abay chbik ya rajel, wella za3ma ca y est bdit ti7tafil bel week end mte3ik deja o maikech sa7i pour dire aussi ke nacer eddin ben mo5tar dhamer, bah je l'aime pas du tout personnellement

Anonyme a dit…

!!!!!!!
???