هيّا بنا نلعب: 7 حقائق على العبدولله

إستجابة لدعوة كل من نادوي صاحبة مطبخ الفيسوار العريق و بنت المرسى، ولو هو مع بعض التأخير إنشالله يسامحوني عليه، باش نشارك في لعبة السبعة حقائق ، يعني حسب ما فهمت لازمني نحكي 7 حكايات على نفسي المتواضعة، وأنا بصراحة ما نحبّش نحكي على روحي بالكلّ، خلّي عادة في المدوّنة، أما ميسالش، الدنيا بكلّها ماخذة بالخاطر. باهي، نبداو في إستعراض السبعة حكايات من حياتي الخاصة اللي "نورمالمون" ما تعنيكمش

1- كيف كنت صغير نقرا في الإبتدائي، كنت ديما نروّح من نفس الثنيّة، وكان فمّا طفل يعرضني في شطر الثنية كل يوم في نفس البلاصة تقريبا، وكنّا كلّ ما نتقابلو نتضاربو، يعني تقريبا كل يوم، بونية وشلابق وتلاطيخ وفي الآخر توفى بالحجر، وكان الطفل هذا أكبر مني شوية، يمكن بعام ولاّ بعامين، وكان مرّة يغلبني مرّة نغلبو، وساعات نشدّو مع أولاد حومتي نفشخوه، حاسيلو سنين ربّي وأحنا نتضاربو حتى لين نسينا علاش، ولاّت صنعة، أما زادة كانت تجربة ثريّة من حيث فنون العرك ونوع من التحدّي اليومي بيني وبين الطفل هذا اللي ما نعرفش حتى إسمو لليوم. وبالمناسبة كان يقرا البوست هذا نحب نطلب منو السماح على نهارة اللي روّح يبكي كيف شديناه أنا وأولاد الحومة، ونقولّو بالله ذكّرني علاش كنّا نتضاربو كل عشيّة تقريبا في نهج محمد أمين؟

2- كنت في الإبتدائي ما نجي كان الأول متاع القسم، أما من نهارة اللي خذيت السيزيام فسدت وتلهيت نتعلّم في البلادة وعملت فيها إنجازات كبيرة، الحمدولله الواحد كمّل قرايتو لاباس وما اتطرّدش على بكري، وبالمناسبة كنت ومازلت أبهم ما خلق ربّي في الرياضيات، دايور نراها حكاية فارغة وما نحبّش نفهمها من أصلو. كيما يقولوها: الكسّابة تكسب والط...ة تحسب

3- أنا عمري ما إحترمت قانون المرور-في تونس بالذات- وعندي كيف ربي واحد، نحرق الضوء، ما نعطيش الأولوية، ندخل في "السونس أنتردي"، نسوق بالعو ساعات، ما هوش مشكل، ومع هذا نعتبر نفسي من أحسن الناس اللي تسوق في تونس، وعمري ما نعرّض روحي ولا غيري للخطر، يعني تنجم تقول عامل لروحي مجلة الطرقات الخاصة بيّا في مخّي واللي لقيتها تتماشى أكثر مع كيّاساتنا، وصدّقوني لاقي بيها راحتي أكثر برشة من هاك الكود اللي تقراو فيه بعشرة آلاف الساعة. مثلا أنا من الناس القلال اللي ديما نعطي الأولوية للمترجلين، إلاّ هاك اللي يبدا هابط يمشي في وسط الكياس بتبوريب، هاذاكة كان نلقى نعفس عليه ونعاودلو "مارش آريار" كيما في لعبة "قران ثافت أوتو". لكن من جهة أخرى تلقاني نبدا خايف برشة كيف يسوق بيّا عبد آخر، ونبدا نعسّ معاه ونمرجلو الكبدة متاعو على أقل غلطة. برّا لوّج علاش؟؟

4- مادامني متذكّر أنا مغروم برشة بألعاب الفيديو، تقولو إنتوما ملاّ شارف عمرو 30 سنة ويلعب؟ أو نوورمااال. مثلا نتحدّى أيّ غشـّير كان ينجّم يربحني في طرح كورة على الـ"برو إيفولوشن سكّر"، والمقصود هنا موش السكر اللي يحلّيو بيه أما الفوتبول بالأمريكية

5- من صغري مارست برشة رياضات ، بديت بالتنس وكنت نلعب مليح بالمقارنة مع عمري، غير الوالد الله يهديه كيف شاف الحكاية بدات تولّي جديّة خاف لا تضيعني على قرايتي وبطّلني منها، باقيها راكم تفرّجتو فيّا في رولان غاروس. من بعدها عملت كاريار قصيرة شوية في كرة السلة وكانت من أحسن سنوات حياتي السنوات اللي عدّيتها على ملاعب الباسكات، اليوم مازلت مغروم ونتبع خاصة البطولة الأمريكية، دايور كيف مشيت لأمريكيا ما ضيّعتش الفرصة باش نمشي نتفرّج في مقابلات أن بي آي، وكنت فرحان برشة كيف خلطت على الأسطورة "سكوتي بيبن" لاعبي المفضل في الموسم قبل الأخير ليه مع فريق بورتلاند قبل الإعتزال. اليوم اللاعب الوحيد اللي مازال يعجبني برشة هو "آلان آيفرسون" الجار السابق لخونا طارق الكحلاوي في فيلادلفيا، أما أكثر رياضة قعدت مغروم بيها ونمارسها هي رياضة رفع دبابز البربر من فوق الطاولة وتفريغها في كرشي، وفمّا زادة رياضات أخرى ما انجمش نقول عليها توّة

6- مازالو كان زوز حاجات، لازمني نختار حاجة باهية. باهي، تعرفو ظاهرلي أني عملت دراستي الجامعية في ميدان الحقوق، أصدقائي في الدنيا أغلبيتهم من رجال القانون زادة، أما بصراحة أكثر نقطة مشتركة بيناتنا هي كعبات البيرة اللي نعملوها مع بعضنا. على فكرة على ما نعرف المحامين هوما أكثر ناس مغرومة بالشراب في تونس، آش خلاّهم هاك العام جاو باش يتبرّعوا بالدم للفلسطينيين ياخي طلع دمّهم بكلّو كحول، ولاّو رجّعوهولهم باش ما ينجّسوش بيه القضية الفلسطينية.

المفيد، بعد ما تحصلت على شهادة الأستاذية بمدّة قصيرة، وقبل ما ندخل لخدمتي الحالية، وقّـفوني مرّة في وسط البلاد باش يعدّيوني على الكمبيوتر ياخي طلع عندي حكم غيابي بـ6 أشهر حبس جاوني هديّة غيابية من عند المحكمة العسكريّة بتهمة عدم تلبية الدعوة للخدمة الوطنية في حين أنا مازلت طالب وعمرهم ما بعثولي إستدعاء. حاسيلو جاب ربّي عملت إعتراض والحكاية تفضّت نهارتها بشويّة معارف، ماكانش راني ضربت 6 شهور في قلبو بتهمة الحصول على شهادة الأستاذية في عهد الجاهلية، حاسيلو من نهارتها الجيش هذا حلفت عليه ما نعفسوش ولا يرى من عندي كيف يكون ملّيم أحمر، كان نعرف نمشي نعدّيه في إسرائيل

7- سابعا وأخيرا، ما بقالي ما نقوللكم كان أني مولود في عام سبعة و سبعين، وعندي كلبة من نوع الراعي الألماني عمرها سبعة أشهرة، وغدوة بالصدفة باش يكون يوم سبعة من الشهر السابع من سنة ألفين وسبعة، وربّي يحييلنا السّبوع الكلّ وعلى راسها السبعة الحيّة، ويخلّيلنا هالرقم المبارك علينا أجمعين، وكيما يقول المثل التونسي المعروف في مجال الكارطة: "كلّ غريبة وغريبتها كان الحيّة وشكبّتها"، أما ما تنساوش اللي في كل الحالات "اللصّ" هو اللي "يهزّ الكلّ"

هيّا أنّستو