الداعية، والداعية عليه والديه

كنت حكيت في تدوينة سابقة على فضيحة ما أصبح يسمّى بصفقة اليمامة، اللي عاد الحديث عنها في بريطانيا وفي العديد من الأوساط في البلدان الغربية للتأكيد على رفض الممارسات اللاأخلاقية والفساد المالي في ميدان الصفقات الدولية ولو كان فيه منافع إقتصادية للدول الديمقراطية. الغريب في الأمر أننا ما سمعناش رأي شيوخ الإسلام اللي نهار وطولو يخطبوا علينا في القنوات الفضائية على مكارم الأخلاق وفضائل اللحية والفولارة والفتاوى اللي تحرّم علينا في الموسيقى والرقص وتعلّم فينا أدق التفاصيل اللي تهم حياتنا الشخصية.

بالله آشبيها حكاية كيما صفقة اليمامة، فيها تلاعب بالمال العام ملك المواطنين الكلّ ما تهمّش لا عمرو خالد ولا يوسف القرضاوي ولا غيرهم من رجال الدين؟ ولاّ زعمة الدين هذا ما ينطبقش على آل سعود وغيرهم من أمراء البترول؟ رشاوي في صفقة قيمتها 86 مليار دولار يا بوقلب، يعني قد ميزانية بلادنا كاملة لمدة عشرة سنوات تقريبا، ما لقيتولها حتى حديث ولا آية ولا سورة ولا حتى إجتهاد فقهي باش تقولو راهو عيب، راهو حرام، راهو ما يجيش منّو؟ توة الأنقليز اللي هوما المنتفعين من الصفقة قيّمو الدنيا وأقعدوها على طوني بلير، ومنظمة التعاون والتنمية الإقتصادية ولاّت كولني ناكلك مع الحكومة الأنقليزية على ضرورة إتباع مبادئ الشفافية وعدم التعامل مع البلدان الفاسدة بطرق فاسدة، وإنتوما باقي تخرّفو على الرقيا والتداوي بالأعشاب والجن والسحر؟؟ هذا اللي وصّى بيه ربّي؟؟

المسألة هاذي بصراحة مهزلة ما لازمش نسكتو عليها، على خاطر الناس اللي تحب توزّع علينا الدروس هوما في أمسّ الحاجة للدروس، وللأسف العديد من الشباب الفارغ فكريّا ونفسيّا قاعد يتلقّى كيف البوهالي في دروس شيوخ النايلسات ويغرق في الجوانب الشكليّة للدين وللتيارات المتشددة اللي تـزيد تقضيلو على طرف العقل اللي في راسو

أنا نشوف أنهم الخطباء وشيوخ الدين اللي مازالو يرفضو تجديد وتطوير الخطاب الديني بطريقة تجعلو جزء من الحلّ في البلدان العربية ولاّو بفعل الجمود الفكري متاعهم وإنعدام الوعي بالقضايا اللي تعاني منها شعوبهم، كيف إنعدام الحرية وتطور العالم بصفة عامة نحو موديل ليبرالي ديمقراطي منفتح على بعضو ثقافيا وإعلاميا وإقتصاديا، هالعلماء والخطباء والشيوخ صاروا اليوم جزء من المشكلة ولازمهم آشكون يشوفلهم حلّ، على خاطر تخاذل علماء الدين عن التعرض للمهازل السياسية والمالية المكشوفة للعموم في بلدانهم وللمشاكل الأساسية اللي تعاني منها مجتمهاتهم، هذا كلّو قاعد يعطي في شرعية وشعبية للتيارات التكفيرية المتطرفة الداعية للعنف، واللي طبعا تستغل في انعدام المصداقية في الخطاب الديني الرسمي أو الشبه رسمي باش تجنّـد ضحاياها من شباب ضايع وتبعثو كيف الفوشيكة للدنيا الأخرى، هو وأيّ مسكين تعيس الحظ متعدّي بحذاه وهو في طريقو للـ"روندي-فو" الموعود مع السبعين حورية اللي يستنـّاو فيه الفوق

ربي يبقي علينا الستر وبرّا