جـمـهوريّـتـكـم مـبـروكــة

بجاه ربي لا تلومو عليا كان جيت إمخـّر شوية ، الله غالب راني كنت نحتـفل، ماهو تعرفوني نموت عليه الموضوع هذا وسبق باش حكيتلكم عليه في السابق في إطار القراءات الدستورية -اللي إنشالله يسهّل ربي ونلقى الوقت وخاصة وسع البال باش نواصلها: عيد الجمهورية، وما أدراك ما الجمهورية، يوم قيل للباي "باي باي" مع السلامة وتسلّم الشعب مقاليد اللعب.

عاد كيف ما قلتلكم لقيت من الواجب عليا باش نحتفل بهالمناسبة العظيمة، ولّيت البارح خرّجت صدقة شطر علّوش جمهوري لوجه الله، وعملت ربوخ جمهوري في دارنا تحت شعار "نظام، حرية، نظام، عدالة، نظام، نظام" سربيت فيه أولاد الحومة كوكتال "ليدبول" بزايد موز على رحمة الوالدين والشهداء والمناضلين، وكل من تزلعلو صبع من صوابع ساقيه في سنوات الكفاح، وهذا أقل ما إينجم الواحد يعملو باش يشكرهم على النعيم اللي نعيشو فيه اليوم بفضل مجهوداتهم البطولية و روحهم النضالية

يا سيدي مبروكة عليكم جمهوريتكم، إيكمّل عليكم، إنشالله هكّا ديما، كلّ جمهورية وإنتوما فارحين. إنشالله عامرة بالديمقراطية علينا وعليكم، إنشالله بالسـّعد وحقوق الإنسان. وإنشالله يزيد ينوب علينا المولى بالمزيد من أنهار مياه التعددية العذبة ونسائم الشفافية العليلة و ما لذّ وطاب من التداول على السلطة بالطرق السلمية والحضارية، آمين يا رب العالمين، اللهم قد أنعمت فزد. يا ربّي وهاك الصبايا تتهنـّاو عليهم وياخذو كلّ وحدة مواطن حرّ صاحب سيادة وكرامة، الشلغومة متاعو تقولش عليها يد متاع فاليجة من كثر ماهو يمارس في الحريّات العامة، و يدخل بيها محصّـنة مضمّـنة للخلوة الشرعية ويحطّلها الجواب متاعو في صندوق الإقتراع متاعها، ويجيبو ذرية صالحة من حكم ديمقراطي وشرعية سياسية كاملة ومؤسسات تخدم في المواطن وعدّها باش تحطّو في عينيها، اللهم صلي عالنبي... تي قولو آمين يا أولادي... إييه إييه، يعطيها دودة يا وخياني ما أحلاها هالجمهورية

إنشالله مبروكة عليكم جمهوريتكم اللي فرحانين بيها يا سيدي، أما قبل ما ننسى خلّيني نقرالكم هالبيتين من الشعر اللي كتبتهم إحتفاءا بالمناسبة العظيمة متاع مرور خمسين عام على النهار اللي قلنا فيه رانا باش نعملو الجمهورية، ويسامحني أبو القاسم الشابي على تكسير كرايم قصيدتو الشهيرة، بحيث وسوسلي الشيطان باش نعاود نكتبها بما يتماشى مع روح العصر، فقلت على نغمات المزموم

إذا الشعب يوما أراد الحياة...

أظنّ الحياة يومها تـنـتـحـر

فليل الخفـافـيـش لا ينــجـلـي

و قـيـد البـهائــم لا ينـكـســر

وموش لازم نكمل البقية لا نقول كلام ما يتقالش