Happy Birthday ExTraVagaNzA! عام من التدوين

اليوم 17 جويلية من عام 2007 تحتفل المدونة متاعي بعيد ميلادها الأول، عام كامل من التدوين عملت فيه شخصيّا جوّ وكانت تجربة جديدة ومفيدة وخاصة ممتعة. عام كامل من البلادة والضحك والغزول والعصب والقينية والقلق والفرحة والنجاح والفشل.

في عام من التدوين، وبعد 295 تدوينة و حوالي 80 ألف زيارة للمدونة إنّجّم نقول كانت الحصيلة إيجابية بصفة عامة

هالعام من التدوين كان لي بالأساس فرصة باش نتعرّف على جوانب أخرى من ذاتي، وخاصة باش ناقف على الغياب الشبه كلّي للحوار في عدد كبير من المواضيع في حياتنا اليومية، سواء لغياب الفرصة أو لقلة الوقت أو للإختلاف اللإهتمامات، وهنا يمكن تكون أهمية التدوين، خاصة في بلاد كيف بلادنا اللي تنجم تعدّي فيها 5 سنين على بعضهم تستنّى باش تقرى مقال تعمل عليه كيف في الصحافة وما تلقى شيء

في عام من التدوين سبّيت برشة عباد وسمّعت برشة ناس ما يكرهو، قلت يمكن كليمة حلوّة ولاّ زوز، فكّرت، ناقشت، إختلفت، تعلّمت، قريت، كتبت، صلّحت، وعاودت فكّرت، وهذا في حد ذاتو حاجة باهية

عام من التدوين كانت فيه فترات متاع نفحة وكيف متاع كتابة، وفترات أخرى يطير فيها الكيف والواحد يقول هالمعبوكة والمحنة الزايدة الواحد عاملها لروحو؟ وباش نكون صريح معاكم التدوين هذا خذالي وقت ثمين كنت انجم نستغلّو في حاجات أخرى، خاصة وأني بكل تواضع إنسان مهم برشة والبلاد بلاش بيا تاقف، حاسيلو باش تعرفو قدّاش باهي معاكم
:)

تجربتي مع التدوين كانت أيضا فرصة باش نتعرّف على عدد من الشخصيات المتميزة على جميع النواحي، سواء بالملاحة أو بالركاكة، بالثقافة أو بالبهامة، بالتواضع أو بالتفشليم، بالأخلاق العالية أو بقلة الحياء.

خلال العام اللي تعدّى جاتني رسائل إلكترونية على كل لون يا كريمة من عدد كبير من القراء الكرام، ناس بعثولي تشجيعاتهم، ناس بعثولي إقتراحاتهم، ناس بعثولي تشكّياتهم من بعض المصالح الرسمية، فمّا حتى شكون بعثلي عروض شغل. نسيت باش نقول أنو عدد كبير من القراء الذكور بعثـلي يستدعى في على كعبات بيرة، بحيث كان جيت نستجيب للدعوات الكريمة هاذي راني ولّيت ألكوولييك نبلع كل يوم، وهذا يخليني نفكر باش نحسّن في صورتي عند القراء خلال العام الجاي من التدوين.

حاسيلو لكل من بعثلي بريد إلكتروني أو خلّى تعليق على المدونة نحب نشكركم برشة على تشجيعكم وبصراحة عندكم فضل كبير في إستمرار نفحة الكتيبة وبالتالي إستمرار المدونة

وفي نفس الإطار حبيت نقول زادة إلّي التدوين هذا ينجم يكون طريقة ناجحة وفعّالة للتبزنيس والتعرف على أشخاص من الجنس الآخر، وننصح كل من هو في حاجة أكيدة باش يتعرف على بنيّة باش يعمل مدونة، أما ما لازموش يتقوعر ياسر إذا كان يحب يوصل لحاجة على خاطر البنات بصفة عامة ما يحبوش التقوعير. أنا شخصيّا إخترت باش ما ندخلش في الباب هذا عموما على خاطر التبزنيس على الأنترنيت ما يعنيليش حاجة كبيرة، دايور فمّا عدد من البنيّات اللي بعثولي يبزنسو، في بالهم باش يستغلوني جنسيا، لكن أنا والحمد لله حافظت على شرفي وكنت ولد عايلة.
:)

ظاهرلي في هالعام اللي تعدّى عملنا مع بعضنا جو تحفون، ضحكنا من كثرة الهم، وضحكنا على رواحنا وعلى الناس اللي تحب تضحك علينا، حكينا في مواضيع ما عندها حتى علاقة ببعضها، وساعات كثر علينا الدمّار حتى لين قمنا نندبو فيهم حيار

حاسيلو من غير ما نطوّلوها بالخطابات الفارغة، اليوم عيد ميلاد المدونة، إنشالله الجمهور فرحان بالجمعية والشعب يشطح وربي معاه. أنا ظاهرلي بعد العام هذا نستاهل باش ناخذ عطلة مفتوحة من التدوين على خاطر الفترة الجاية عندي فيها برشة برشة برشة برشة إلتزامات سواء على المستوى الشخصي أو المهني، بحيث نكذب عليكم كان نقوللكم أني إنجم نعمل كل شيء في نفس الوقت و كيما يلزم.

بقية عطلة ممتعة للناس الكل، هيّا توة سيب عليكم من الأنترنات، أخرجو أسهرو، أبلعوه، أعملو شوية رياضة، تعرّفو على أشخاص من الجنس الآخر، مارسو معاهم الرذيلة وإلاّ حتى عرّسو بيهم، المفيد أعملوا حاجة تصلح وسيب عليكم من الأنترنات متاع وذني

هيّا نخلّيكم توة، وفي إنتظار عودة إنشالله عن قريب باش نغمّض عينيّا ونستخايل ماريلين مونروو تغنّي لي أنا في عوض كينيدي الله يرحمو ويبشبش الطوبة من تحت نافوخو