mardi, juillet 03, 2007

الداعية، والداعية عليه والديه



كنت حكيت في تدوينة سابقة على فضيحة ما أصبح يسمّى بصفقة اليمامة، اللي عاد الحديث عنها في بريطانيا وفي العديد من الأوساط في البلدان الغربية للتأكيد على رفض الممارسات اللاأخلاقية والفساد المالي في ميدان الصفقات الدولية ولو كان فيه منافع إقتصادية للدول الديمقراطية. الغريب في الأمر أننا ما سمعناش رأي شيوخ الإسلام اللي نهار وطولو يخطبوا علينا في القنوات الفضائية على مكارم الأخلاق وفضائل اللحية والفولارة والفتاوى اللي تحرّم علينا في الموسيقى والرقص وتعلّم فينا أدق التفاصيل اللي تهم حياتنا الشخصية.

بالله آشبيها حكاية كيما صفقة اليمامة، فيها تلاعب بالمال العام ملك المواطنين الكلّ ما تهمّش لا عمرو خالد ولا يوسف القرضاوي ولا غيرهم من رجال الدين؟ ولاّ زعمة الدين هذا ما ينطبقش على آل سعود وغيرهم من أمراء البترول؟ رشاوي في صفقة قيمتها 86 مليار دولار يا بوقلب، يعني قد ميزانية بلادنا كاملة لمدة عشرة سنوات تقريبا، ما لقيتولها حتى حديث ولا آية ولا سورة ولا حتى إجتهاد فقهي باش تقولو راهو عيب، راهو حرام، راهو ما يجيش منّو؟ توة الأنقليز اللي هوما المنتفعين من الصفقة قيّمو الدنيا وأقعدوها على طوني بلير، ومنظمة التعاون والتنمية الإقتصادية ولاّت كولني ناكلك مع الحكومة الأنقليزية على ضرورة إتباع مبادئ الشفافية وعدم التعامل مع البلدان الفاسدة بطرق فاسدة، وإنتوما باقي تخرّفو على الرقيا والتداوي بالأعشاب والجن والسحر؟؟ هذا اللي وصّى بيه ربّي؟؟

المسألة هاذي بصراحة مهزلة ما لازمش نسكتو عليها، على خاطر الناس اللي تحب توزّع علينا الدروس هوما في أمسّ الحاجة للدروس، وللأسف العديد من الشباب الفارغ فكريّا ونفسيّا قاعد يتلقّى كيف البوهالي في دروس شيوخ النايلسات ويغرق في الجوانب الشكليّة للدين وللتيارات المتشددة اللي تـزيد تقضيلو على طرف العقل اللي في راسو

أنا نشوف أنهم الخطباء وشيوخ الدين اللي مازالو يرفضو تجديد وتطوير الخطاب الديني بطريقة تجعلو جزء من الحلّ في البلدان العربية ولاّو بفعل الجمود الفكري متاعهم وإنعدام الوعي بالقضايا اللي تعاني منها شعوبهم، كيف إنعدام الحرية وتطور العالم بصفة عامة نحو موديل ليبرالي ديمقراطي منفتح على بعضو ثقافيا وإعلاميا وإقتصاديا، هالعلماء والخطباء والشيوخ صاروا اليوم جزء من المشكلة ولازمهم آشكون يشوفلهم حلّ، على خاطر تخاذل علماء الدين عن التعرض للمهازل السياسية والمالية المكشوفة للعموم في بلدانهم وللمشاكل الأساسية اللي تعاني منها مجتمهاتهم، هذا كلّو قاعد يعطي في شرعية وشعبية للتيارات التكفيرية المتطرفة الداعية للعنف، واللي طبعا تستغل في انعدام المصداقية في الخطاب الديني الرسمي أو الشبه رسمي باش تجنّـد ضحاياها من شباب ضايع وتبعثو كيف الفوشيكة للدنيا الأخرى، هو وأيّ مسكين تعيس الحظ متعدّي بحذاه وهو في طريقو للـ"روندي-فو" الموعود مع السبعين حورية اللي يستنـّاو فيه الفوق

ربي يبقي علينا الستر وبرّا


26 commentaires:

Tarek طارق a dit…

نقطة مهمة.... لكن بالنسبة للأمثلة يظهرلي فما أمثلة أخرى يعبرو أكثر على المشكل.... يعني نقصد الأمثلة متاع الشيوخ إلي سميتهم.. خاصة القرضاوي.... و لهنا مش باش ندافع عليه و لكن بالنسبة لموضوع السعودية نتصور هو ماذابيه يحكي عليه الموضوع لسبب بسيط... لأنو معروف الصراع و العداوة بينو و بين الشيوخ متاع السعودية خاصة منهم القراب للعائلة المالكة يعني السلفيين الوهابيين (بالمناسبة مش الشيوخ إلكل في السعودية يتبعو نفس التيار الفقهي).... و معروف أنو هذوما في المواقع متاعهم يهاجموا بشكل مستمر في القرضاوي لأنو "عصراني".... و الصراع بيناتهم ماهوش شخصي هو حقيقة صراع في المضمون و أحسن طريقة واحد يعرف بيها مضمون الصراع بيناتهم يطلع على مواقع السلفيين و علاش يعتبرو القرضاوي "عصراني".... من المرجح فما زوز أسباب يمنعوه بش يتعرض للموضوع: أولا، لأنو دولة قطر (إلي تملك قناة الجزيرة و هي المنبر الرئيسي متاع القرضاوي من خلال برنامج "الشريعة و الحياة") ماذابيها ما تكبرش العركة بيناتها و بينات السعودية و تعطيها طابع ديني بالرغم إلي القطريين (عن طريق "الجزيرة") هوما أكثر من قاعد يغطي عربيا في الخبر هذاية بسبب الحزازات السياسية بيناتهم.... السبب الثاني إلي ممكن يمنع القرضاوي هو علاقاتو المصرية يعني العلاقات متاعو مع "الاخوان" (بالرغم إلي استقال فعليا من التنظيم و هذاية معروف و صار برشة عرك علني قبل بيناتهم و لكنو مازال محافظ على علاقات قوية معاهم و العلاقة المعقدة هذية برشة يبسطوها في إطار السفسطة) و لأنو "الاخوان" مازال عندهم حضور قوي في السعودية (بالرغم من أنو الصراع بيناتهم و بينات شيوخ السلفية الوهابية قوى بعد أحداث 11 سبتمبر و حتى علاقاتهم بالحكومة السعودية ضعفت خاصة بعد تصريح وزير الداخلية السعودي توة عامين "أنو الاخوان هوما سبب المشاكل الكل")... لكنهم يحبو يحافظو نتصور على شعرة معاوية لسبب أساسي أنو السعودية مصدر هام للأموال بالنسبة ليهم.... أنا ممكن نركز في الموضوع هذاية على أسماء أكثر تأثير في الساحة الإعلامية خاصة في علاقة بالتنظيمات التكفيرية و هوما تحديدا شيوخ السلفية الوهابية السعوديين "هيئة العلماء" كيما معروفين إعلاميا... و هوما إلي يتحكموا في المشهد الإعلامي إلي خارج من القنوات الفضائية إلي تمويلها سعودي.... أنا في الحقيقة ما نراش إلي فما علاش الواحد يعمم المشكل على الشيوخ إلكل.... أنا مانراش إمكانية للإصلاح الديني من خارج المؤسسة الدينية فحسب.... و الحقيقة فما صراع بين الشيوخ المسلمين و الوضعية ماهياش جامدة كيما ربما يظهر إعلاميا... هكة كان وضع التجديد و الاصلاح الديني في التاريخ و المجتمعات إلكل... هذية مسألة تظهرلي حساسة و الواحد يلزم يتعامل فيها بواقعية.... بون يلزمني نكتب أكثر من هكة بش نوضح وجهة النظر متاعي لهنا لكن الحقيقة توة إمخر... انشالله مرة أخرى... أيا الأخ القايد أنستم

Anonyme a dit…

المشكلة اللي تكلمت عليها فيما يخص السكوت المتعمد من قبل الشيوخ و الأئمة على المشاكل الحقيقية في المجتمع العربي و الاسلامي هي مشكلة أكبر من أننا نقدروا نلموا بجوانبها في فقرة أو حتى صفحة. و الموضوع هذا هو غاية في الروعة...اللي ما يخفاش علينا هو أنوا ثمة نوعين من الشيوخ : شيوخ موالين للسلطة و يبرروا في كل تصرفاتها و يشرعولها في كل شيء و لو اضطرروا لتحريف القرآن أو لاستعمال أحاديث "موضوعة" (يعني متفق على ضعفها و خطأها من قبل كل العلماء) و فمة حتى من العلماء هذوما شكون يخترع في اسلام جديدعلى كيفهم كيما الوهابيين اللي يحرموا الحلال و يحللوا بعض ما تم تحريمو خاصة للملوك و الأمراء. كيما فمة أشكون يهتم كان بالجوانب الشكلية للدين و يختزلوا كان في الصلاة و الصوم و اللباس و الجن والمس.... و فمة أشكون أخطر و أدهى و شارك حتى في تحطيم الدول المسلمة و يحب يدعو للرجعية الجاهلية و يحب يردلنا المرا سبب البلية و شيطان لازم نقمعوه و هي ما تمثل كان مصدر للشهوات موش أكثر كيما سي بن لادن اللي من عميل أمريكي يتحولنا فجأة إلى "مجاهد" و "فقيه في الدين" ( و ما نعرفوش وقتاش اتلقى ها العلم و من أي جامعة تخرجلنا) و يحب يقوللنا اللي هو بجهادوا المزعوم ماهوش يخدم في أمريكا و يحضرلها في الأسباب و المسببات باش تلقى شرعية تخوللها تعمل في أفغانستان و العراق شاطح باطح.و الشيء اللي يأكد هذا هو البحوث اللي ما ظهر منها كان القليل و اللي تفضح شراكة عائلة بن لادن اليوم مع عائلة بوش و اللي بن لادن ما حبش يطلعلنا فتوى "تبيح دماء" عايلتو اللي هي من أكبر عملاء لل"كافر الطاغي". و الأسئلة اللي ما حبش يجاوبلنا عليها و هي علاش أمريكا لليوم ترعالوا في المواقع متاعو و علاش "ما نجموش يشدوه"زعمة أقوى مالرادارات؟!...و الخ و النوع الثاني من علماء الدين و الشيوخ اللي هوما مهتمين حقيقة بالوضع في العالم المعاصر و هوما إمَا مقموعين بطريقة جذرية كيما العلامة الكبير تقي الدين النبهاني و اللي أصدر أفكار معاصرة جدا و بنى نظريات عظيمة و اللي ما تقدرشي تلقالو كتاب و لا حتى صفحة منشورة اليوم في الدول المسلمةو اللي عدى عمروا الكل للي مات في سجون السلطة... و فمة من العلماء هذومة اللي مسموح ليهم كان ببعض الرسالات للشعوب العربيةما تضرش اللي هوما في الحكم و اللي تهتم كان بالأخلاق كيما القرضاوي...أما الحاجز الكبير اللي نتفقوا الكلنا عليه هو الإعلام و ربي يفتحلنا الاعلام و نحنا توة نعرفوا الصحيح مالغلط.على خاطر فدينا مالوصاية و التعتيم..

Anonyme a dit…

Yè5i hiyya elmochkla jèt kèn 3la 3oulamè2 éddine w 7ébcét?
Ti énèss elkoll sèkta w bèl3a éssikkina..
Et si quelqun interprête mal la religion alors ce n'est pas de la faute de la religion paske rabbi ma galéch béchhèyy hédha..
Quant à l'audace qui nous pousse à dire ce qu'il faut dire, elle nous manque tous paske si non on aura pas dû choisir un coin virtuel pour dire tous ces bla bla..

Anonyme a dit…

ahla b sadiqy,
maww el klemm elly tqoul fih C est exactement kima el Post mte3 Tintin elly qall chbikom me ta7kiwech fi tel ou tel sujet.
Maww koll we7idd ya7ky 3la sujet we ykhalli d autres par priorité, et cette priorité C lui qui la fixe.

We yomken aussi elli deja errachwa mahy fil islem 7ram 3lik we 3la el goal (ma3neha elly ya3ti welly yekhouha), donc wadhe7 me fihech niqach.

Famma sbabb ekhor elly howwa; tellement AL SAOUD 3awwroulha elly 7add me 3ad y3abberhom wela ya7ky m3ahom le ameriken le 3rabb. Akahaw fetou el 7add mte3 el corruption.

PS: Famma ness ne peut lele pas imaginer ech ma3neha 68 milliar dollar :-)

3amrouch a dit…

ماعندي مانزيد على تحليل طارق الكحلاوي
@طارق الكحلاوي: تحليل جيد،ممتاز

أنيس a dit…

أنا الرسمي يضهرلي إلي كل واحد ما يلوج كان في مصلحتو
تو شكون إموٌل فيهم القنوات الفضائية ؟
أما خير الشعب يتولها بالحكايات الفارغة كيف الفولارة و إلاٌ بتنمية لبلاد ؟
أمٌا خير الشباب إسيب غلو على أماريكا و إسرائيل و إلا على الهموم الداخيلية ؟
كل شيء بحسابو و ما فمٌاش قطوس يصطاد للربي

Monsieur Untel a dit…

@Tarek Kahlaoui.

En particulier je m'attends à un développement approfondi des points suivants :

1°أنا مانراش إمكانية للإصلاح الديني من خارج المؤسسة الدينية فحسب

و الحقيقة فما صراع بين الشيوخ المسلمين و الوضعية 2ماهياش جامدة كيما ربما يظهر إعلامي

Big Trap Boy a dit…

@ tarek kahlaoui:

الأمثلة أو الأسماء ذكرتهم على سبيل الذكر لا الحصر، يعني هاذوكم اللي خطرو على بالي بما أنهم الأكثر شهرة في الإعلام وبالتالي اللي يمكنهم يكونو أكثر تأثير وعندهم القدرة على إيصال أصواتهم، ومهما تكون الحسابات والضغوطات اللي يخضعولها الناس "العصرانيين" كيما قلت، فإنه حسب رأيي ماهوش عذر شرعي ولا مقبول دينيا وأخلاقيا

إذا كان رجل دين يعرف ربي أكثر من غيرو باش يسكت على كلمة الحق على خاطر زوز صوردي متاع السعودية أو على خاطر مجاملات ديبلوماسية ما بين أنظمة الحكم أو حتى للمحافظة على منبر في قناة فضائية، بصراحة أنا نقول بلاش بيه خير، هذا ما عادش راجل دين، هذا شيطان أخرس

على كل حال أنا ما خيّرتش شيخ على شيخ مادام ما سمعت منهم حتى واحد طالب عى الأقل بتكوين لجنة تحقيق مستقلة في قضية صفقة اليمامة، واللي هي على فكرة مجرد مثال يوجد مثله المئات أو الآلاف من المصائب المسكوت عنها في حين يقع التركيز على جوانب أخرى تبدو سطحية وتافهة بالمقارنة

Big Trap Boy a dit…

@ anonyme 1:

مرحبا بيك، أنا بصراحة ما عنديش فكرة على نظريات تقي الدين النبهاني وباش نحاول نطّلع عليها، كان عندكشي مواقع تعرّف بيه وبأفكارو تعمل مزية هات خلّي نقراو

على كل حال إنشالله الأمل مازال موجود في الخروج من التعاسة الفكرية متاع أغلبية الشيوخ اللي يطلعولنا في التلفزة واللي مهما كان مستواهم تاعب أو "متوسط" كيما يقول طارق الكحلاوي، فإنو تأثيرهم في عقول الناس فوق المتوسط برشة

Big Trap Boy a dit…

@ the man who sold the world:

صحيح كلامك ونحنا ما إختلفناش على هذا، أنا بيدي قلت اللي هوما جزء من المشكلة موش هوما وحدهم المشكلة، لكن لازم نتفقو على حاجة أخرى وهي أن تأثير الدين في البلدان العربية وبالتالي رجال الدين هو تأثير كبير برشة على أفكار الناس وأعمالهم وحياتهم، وبالتالي كيف يكونو رجال الدين عندهم خلل كيما اللي حكيت عليه وعجز على التجاوب مع قضايا الواقع فإنها تولّي مشكلة كبيرة وهذاكة علاش حبيت نحكي عليها ولو في هالفضاء الإفتراضي ونتناقشو فيها

من ناحية أخرى أنا راني ما قلتش اللي المشكلة هنا في الدين بيدو بل أكّدت أنها المشكلة في رجال الدين أو على الأقل رجال الدين اللي يعطيو في الدروس والمواعض على القنوات الفضائية على خاطرهم أهملو المشاكل الكبرى وشدّو في السفاسف والأمور الثانوية، وهو من شأنو باش يخلّي الناس تتبعهم في الغفلة على أهم المسائل اللي يلزم يدور حولها الحوار

Big Trap Boy a dit…

@ business man:

صحيح كل واحد حرّ في اللي يحكي عليه، أما هاذم رجال دين وصفتهم تسمحلهم باش يقولولك أعمل هكّا وما تعملش هكّا والناس تتبع في كلامهم في غالب الأحيان، يعني ماهوش مجرد صحفي يكتبلك فكرة في مقال وإنتي تحب تقبلها تحب حتى ما تقراهاش

ظاهرلي رجال الدين والعلماء خاصة عندهم مسؤولية دينية وأخلاقية أكبر من غيرهم، على خاطر اللي يسمح لنفسو بإعطاء الدروس لازم يكون هو بنفسو قدوة في الأمر بكل المعروف والنهي على كل المنكر، موش علينا فرض وعلى بندر بن سلطان سنّة

Sinon, famma tafsir é5er:

يمكن الملايكة اللي تقيد الذنوب ما تعرفش تحسب المبالغ اللي توصل لـ68 مليار دولار، هاذاكا علاش الرشوة في الحالات هاذي ما عادش حرام

:))

Big Trap Boy a dit…

@ ancien combattant:

أنا بيدي ما فهمتش الجملة الأولى وخاصة كلمة "فحسب"، هيّا سي طارق أعطينا توضيحات ما كانش باش نجتمع في مجلس الثورة أنا والمحارب القديم ونعلنوك إرهابي خطير وعدو لثورة الفاتح من جوان

:))

yes_in a dit…

http://www.hobahobaspirit.com/Files/album1/Basta_Lahia.mp3

Ghnaya mahboula sur le sujet des LE7YAA !!
Par le groupe marocain Hoba Hoba Spirit !!!!!!

Paroles :
Rabbitou lahya wellitou ka trabiw fina
Ntouma elli tgoulou chkoune maghribi ou chkoune lla
Hlaktouna bel hadra meykou 3na chouiya
Ou beddlou sa3b sa3br

Wellitou ka tfahmou hta fel moussika
Hadi hram hadi mamnou3 ou hadi hchouma
Hlaktouna baraka meykou 3na chouiya
Ou beddlou sa3b sa3br
Ayayaye i was born in casa
Ifriki mya fel mya
Had reggae hta houa
Ayayaye hamdoullah moulana
Had leblade bladna
On ne l'abandonnera pas

Votre spécialité c'est de falsifier
Trafiquer le passé en nous faisant passer Pour ce qu'on n'est pas
C'est le moment de dire assez
Tout ça c'est dépassé
Tous les jours vous violez notre identité
Tous les jours il faut avoir ce justifier
Vous nous agressez
C'est le moment de dire assez
Tout ça c'est dépassé
Ayayaye i was born in casa
Ifriki mya fel mya
Had reggae hta houa
Ayayaye hamdoullah moulana
Had leblade bladna
On ne l'abandonnera pas

Fkoulchi katdekhlou
Ma nsittou ouallou
Fin ngalssou ach naklou kifach nlebssou
Khalliouna naichou
Khalliouna ntneffsou

Fkoulchi katdekhlou
Ma nsittou ouallou
Fin ngalssou ach naklou kifach nlebssou
Khalliouna naichou
Khalliouna ntneffsou

Ayayaye i was born in casa
Ifriki mya fel mya
Had reggae hta houa
Ayayaye hamdoullah moulana
Had leblade bladna
On ne l'abandonnera pas

###################

Peace
Yes_In

yes_in a dit…

Pour le Lien :
06 Basta Lahia.mp3

Tarek طارق a dit…

أيا يا سي المحارب السابق و الأخ القايد... نقدم المرافعة متاعي في المحاكمة العسكرية إلي عملتوهالي في "محكمة الثورة" (غير الشرعية) و ما خليتونيش نعين حتى محامي.... باهي بالنسبة للجملة لولى كتبتها و أنا مزروب و حاجتي بش نقرى على روحي (و لا حرمت القراية في ظل "ثورة الفاتح" المحنونة).... هذاكة علاش جات مخلبزة... نحب نقول إلي يلزم شيوخ الدين بيدهم هوما إلي يقومو بالتجديد الديني مش كيفما قاعدين بعض "العلمانيين" العرب يعملو... يحاولو هوما بيدهم يوليو شيوخ دين... وقتلي لا عندهم التكوين اللازم (و هوما إلي كانو ولت البارح يرقدو و يصبحو على لينين و ماركس) و لا المصداقية بش يقومو بالتجديد الديني.... كيفما صار في العالم الكل و تاريخ البشرية: التجديد الديني تعمل أساسا و ديما من داخل المؤسسات الدينية... صحيح في المقابل إلي الصغوط إلي جات من برة كان عندها تأثير لكن شيوخ الدين هوما إلي كانلهم الدور الرئيسي.... من ناحية أخرى مش من الواقعية إلي ننتظرو من شيخ دين مصلح بش يولي "ليبرالي"... هذية ماجراتش حتى في البلدان إلي وصلت عز الليرالية... مثلا "شيوخ" البروتستانت (لوثر ثم كالفن) وقتلي عملو "الاصلاح الديني" بين القرنين 16 و 17 و إلي كان عندو تأثير لاحقا على مواقف برشة "شيوخ" كاثوليك (و لثنين ساهمو في تأقلم المسيحية التدريجي تواصل أربعة قرون مع المتطلبات العصرية للرأسمالية الصاعدة في أوروبا) كانو برغم كل شيئ "متزمتين" في نقاط أخرى... و مازالوا.... يعني "شيوخ الدين" يتطوروا مع المجتمعات متاعهم لكن يقعد عندهم الإطار الموضوعي إلي يشتغلو فيه و إلي هو الفكر الديني... و أنا الحقيقة نرى فرق بين مثلا شيخ كيف القرضاوي (إلي يسميه "عصراني" مش أنا يا سي الأخ القايد راهم جماعت شيوخ السعودية... بالحق النقطة هذية مهمة برة أعمل طلة في المواقع كيف "السلفية" أتوة تشوف أش يقصدو بيها... و هي سبة بالنسبة ليهم بالمناسبة) و شيوخ كيف متاع السلفية الوهابية في السعودية من ما يسمى بـ"هيئة العلماء".... الفروق مثلا تتتشاف من الموقف من الديمقراطية: جماعة السعودية يقولك عيني عينك الديمقراطية كفر... القرضاوي يعتبرها حاجة انجمو "ندخلوها في الاسلام"... أنا نرى هذاية موقف إيجابي... بالنسبة لموضوع "الساكت عن الحق شيطان أخرس"... معروف مثلا إلي القرضاوي كي تقارنو بجماعة السعودية ماهوش "شيطان أخرس".... خاصة في قضايا عندها علاقة بمسائل الاحتلال و غيرو.... في الوقت إلي شيوخ السعودية كانوا ديما يتبعو الموقف الرسمي السعودي القرضاوي كان متميز عليهم و من غير ما يطيح في الخطاب التكفيري متاع الجماعة متاع الارهاب متاع القاعدة.... تنجم تشوف الفرق زادة في الفتاوى إلي يعمل فيها في "مجلس الإفتاء" لمسلمي أوروبا... و هي من اكثر الفتاوى إلي جابتلو المشاكل مع جماعة السعودية.... و إذا كان نجيو لتونس... الواحد ينجم يطلع على الدور الكبير إلي قاموا بيه مصلحين مثل الشيخين الفاضل و الطاهر بن عاشور.... و الحقيقة هكامة يلزم يصير الاصلاح الديني مش بالإسقاط لأنو يالإسقاط ما عمرو ما ينجح... و المهم في الاصلاح الديني إلي هو حاجة حساسة و يلزمها برشة صبر خاصة في مجتمعات كيف متاعنا هو الواقعية.. و هذا يعني أنو نبحثو على الطريقة الأسلم إلي ينحج فيها مش أنو "يطبق" و هذاكة هوة.... أيا يا سيدي هذية المرافعة متاعي... و قلتها بالرغم إلي نعرف إلي حكم الإعدام هو إلي يستنى من "محكمة الثورة" متاعكم... و برغم هذاكة بش نستشهد على حبل المشنقة و أنا وفي لمبادئ الثورة و بش نصيح "تحيا ثورة الفاتح من يونيو".... برغم الشامتين و الأعدا

Big Trap Boy a dit…

@ Yes_In:

Merci pour le lien, j'ai déja écouté cette chanson sur je ne sais plus quel blog ama ça fait plaisir de l'écouter à nouveau.

Big Trap Boy a dit…

@ tarek kahlaoui:

لئن كانت المحكمة تستنكر كتابتك لتعاليق وإنتي مزروب في مدونة قائد الثورة المفدّى فإنها رأت الحكم بعدم سماع الدعوى بالنظر إلى تاريخك النضالي ولأنك بو عايلة
:)

باهي، نرجعو للموضوع:

أولا أنا موافقك أنو تجديد الفكر الديني لازمو يجي من رجال الدين، كيما الكورة تجي من الكوارجية، أما زادة ما فيها باس كيف تكون فمّا دعوة وتحريض لرجال الدين على السير في اتجاه التجديد والانفتاح، وأنا كيف نحكي على الليبرالية ما نقصدش أنو القرضاوي باش يدافع على آليات السوق وخوصصة المرافق العمومية، وإلاّ عمرو خالد باش يولّي مستشار في صندوق النقد الدولي، أما على الأقل يكون فمّا وعي بالتحولات العظمى اللي صارت في العالم واللي تخلّي مثلا العقوبات الجسدية من نوع الرجم وقطع اليد والجلد ما تتماشاش مع العيش في عالم معولم منفتح على بعضو من جميع النواحي، زادة لازمهم يكونو واعين بأهمية مسائل الحريات العامة والفردية ويدافعو عليها ويطالبو بالديمقراطية موش بركة ياقفو المتفتحين منهم عند القول بمجرد إمكانية إدخالها في الإسلام

أنا متأكد أنوالقرضاوي أبرك من غيرو وأكثر تجاوبا مع القضايا المطروحة على المسلمسين من الناحية الإجتماعية والسياسية من جماعة الوهابية والسلفية، أما عندو زادة خطوط حمراء ملتزم بيها، وهذا في حد ذاتو غالط حسب رأيي، يعني هو في تقييمي الخاص ينجم يكون عمشة في دار العميان على خاطر لازم إنسان في مكانتو العلمية والإعلامية تحمل مسؤوليتو و يسمّي الأشياء بأسمائها
il faut appeler un chat un chat
كيما يقولو الفرنسيس، وهاني على خاطرك مانيش باش نقول شيطان أخرس، برّا يا سيدي نقولو عفريت وكواك

ظاهرلي الناس الكل والدراسات المختلفة أجمعت على أن الإصلاح السياسي هو من أوكد الضروريات في البلدان الإسلامية والعربية خاصة. الناس الكل إلاّ رجال الدين، تقول ماهمش عايشين في العالم

أخيرا نشكرك على إقتراحك باش نزور المواقع والمنتديات السلفية، ما في باليش بيك تكرهني للدرجة هاذي. علاش يا خويا آش عملتلك تحبّني نولّي ندوّن من الحبس الجديد؟ تي حتى أمي مازالت ما فرحتش بيّا، إستنـّا نعرّس عالأقل

:)))

Tarek طارق a dit…

:))
لا لا المواقع إلي قتلك عليهم قطاطس ناعمة... ياغرت مامي بلدي مش حاجة... يجي منو هو نحرمو "الأخ القايد" من العرس... شكون بش يجيبنا ولي العهد ربي يصونو آمين

بالمناسبة حتى أنا ما نقصدش إلي إنتي تحبهم يليو "ليبراليين" بمعنى أنهم يشدو مسهولين في البنك الدولي.... أما نقصد على المستوى الفكري... و الليبرالية بمعناها الفسلفي مش بمعناها الاقتصادي.... أيا خليني نقص لهنا لا تستينفو و تعطيوني إعدام

Big Trap Boy a dit…

ما تخافش يا سي طارق، المحكمة متفهمة موقفك وحماسك للدفاع على مكاسب الثورة

ليبرالية فكرية بالطبيعة، ولو هوما جماعة الخليج بصفة عامة عندهم المؤهلات بفضل البترودولار باش ينجحو في الليبرالية الاقتصادية أكثر مني ومنك، أما إبكي على المخ الفاسد حاشاك

Anonyme a dit…

comme dans la bogosphere a la telé il y a aussi la possibilité de zapper..
ظاهرلي الناس الكل والدراسات المختلفة أجمعت على أن الإصلاح السياسي هو من أوكد الضروريات في البلدان الإسلامية والعربية خاصة. الناس الكل إلاّ رجال الدين، تقول ماهمش عايشين في العالم
1je suis d accord avec ca mais les islamiste sont ecarté de la politique comment veut tu qu il fassent des reformes
2les politique veullent reformer l islam est ce que tu croit qu ils on raison de le faire?est ce qu ils sont capable de le faire..
3les 3oulama tunisien qui sont selon moi capable de le faire sont enfermé:jugées dangereux!
3les chaines tunisiennes(t7 et c21) sont nuls f2 et raiuno censurée, canalhorizon fermé,nisma et haniball mediocre..
le fait que les gens regarde ces chaines n est pas fait du hasard...
ca repond a un manque celui de media qui nous ressemblent,qui portent notre empreinte comme tunsiens ou maghrebins qui soient cridible pour un telespactateur lambada
les anglai ont eu la chance de pouvoir en parler alors que dans nos media ca reste tabu...pour pouvoir en parler il faut dejas "nithazzou ou nitnafvou"..apres on pourra en parler mais apres tout c est pas a nous d en parler c est pas notre pays et ni meme des chouyaou5 mta3 el fatawi il doit y avoir une justice et qu elle soit la meme pour tous qu elle soit apliqué etc..

Houcine MASTOURI a dit…

أيا السلام عليكم،
أول شي نشكر سي بيق تراب بوه على زيارتو لمدونتنا الرضيعة (موش الوضيعة ) وتعليقو المشجع، ونعبر بالمناسبة اللي ومدونتو هي اللي حللتنا الشاهية للاطلاع
على التيونيسفار ومن بعد زدنا تحلينا وعملنا بلوق (ضحكولو تمد على طولو)

أيا نرجع للموضوع،

نوافق اللي فما مشكلة عند شيوخنا (ولا الشيوخ لخرين) وانا نراها راجعة لسبب مهم برشة : الغرب كيف حضر الاعتداء الكبير والاستراتيجي على العالم الإسلامي خمم في حاجة مهمة برشة ساندوه فيها من بعد الحكام المسلمين (بالحقوالا بالوراثة) :
للسيطرة على المسلمين يجب تفريقهم، وأحسن طريقة لتفريقهم هي القضاء على محور التفاق متاعهم بشكل خطير وذلك بتدخيلها بعضها مابين الشيوخ إلى حد العداء والتكفير، وزيد من بعد استعمل الاعلام لاظهار هذه الاختلافات، تولي من بعد ما عادش تفهم شكون الصحيح وشكون الغالط حتى لين وليت تقرأ فتوة تحرم قراءة القرآن بصوت عالي في الجوامع واستعمال مكبرات الصوت على خاطر الصوت ينجم يدخل أماكن نجسة (العلامة التونسي المختار السلامي، مجلة الهداية في الثمانينات) وهذا أحسن سبب يفسرنا من شيرة الشيوخ نيولوك اللي يحللوا كل شيء، والشيوخ الرجعيين اللي يكفروا الناس الكل،

العالم الاسلامي ما عندوش ريفيرنس Référence كيما المسيحيين اللي رغم تعدد مذاهبهم أمورهم واضحة من الناحية هذي (بون هوما الدين عندهم ولا لايت على الآخر، ما ننجموش نقارنو رواحنا بيهم الحقيقة)

ثما مجلس عالمي لعلماء المسلمين يمكن يكون ريفيرنس مهمة، لكن الاعلام العربي متلفو اللهم الجزيرة الي تركز على رئيسه أكثر منو (القرضاوي).

النقطة الأخرى هي حكاية الأولويات، يقول سي تراب بوه اللي شيخ ما يلزموش يعمل concession ويلزم يقول الحق ولو قصولو خيط الميكرو.

أنا مانيش موافق، الشيخ اللي ينجم يصلح حاجة بسيطة بكلامو وما يسمحولوش باش يحكي في السياسة يلزمو يصلح اللي يقدر عليه ولنا في سيرة الرسول صلى الله عليه وسلم خير مثال :
الرسول ما كانش كاتيقوريك بالمعنى هذا، كان ديما يوزن الأمور ويعمل الحاجة اللي يشوفها أصلح حسب الموقف، بمعنى أنو كان ينظر القدام ومايعملش مغامرات غير محسوبة، لأنو الفايدة في نجاح الهدف البعيد..

أنا نصير الــ0.0001% من الإصلاح، صلح اللي تنجم، وخلي الباقي على ربي، لأنو وجود شيخ يصلح سلوك الناس وما يقدرش يحكي على صفقة اليمامة خير من عدم وجوده أو تعويضه باللي يحللو الحرام،

وإصلاح الأفراد هو خير إصلاح الأوطان، يعني كيق يجي شيخ يحكيلك على العمل المتقن ماتقولش اللي هو زائد على خاطر العمل المتقن يبدى من أبسط الأعمال حتى للحكام...

وشكرا للاستماع الافتراضي..

أنيس a dit…

و الله منيش فاهم هالنضريات الفارغة متع الغرب يهاجم في المسلمين منين تجيبو فيهم
الغرب ما تهمٌوا كان مصالحوا كسسوا مع ليهود مع البوذيين و غيرو ، الدين ما عادش يلعب دور مهم عندهم و حتى عندنا كي تجي تشوف
المهم البترول، الفلوس و قريبا الماء في الإستراتيجية الدولية
دنك مش لازم إتبرر جبن هالشيوخ لأنهم عايشين و يشوفو أيضا لمضلحهم (ما ينجموش يفضحو شكون يمول فيهم مثلا)

Houcine MASTOURI a dit…

Dire que la religion n'a plus de place chez les occidentaux est vraiment trop simpliste, désolé si Anis, si vous suivez un petit peu ce que fait Bush par exemple, et ce qu'a fait avant José Maria Aznar, les propos de Sarko, ce que raccontent le Pape et ce que disent les italiens du Pape actuel et des précédents, de l'histoire de Salmane Rushdy, et pleins d'autres trucs, vous remarquerez que l'Islam est visé.

Je vous invite à faire un tour du côté des chaînes religieuses chrétiennes sur Hot Bird (al hayat notamment) vous verrez ce qu'ils sont en train de faire, écoutez Hassanin Haykel, ou lisez vous trouverez beaucoup d'éléments en faveur de cette piste...

Ils cherchent le pétrole et leurs intérêts, oui, mais même si on oublie tous leurs comportements anti-islamiques (pour des raisons religieuses) ils savent pertinemment que seul un Islam faible leurt permettrait de reigner.

Si on parle de peuple, on sait qu'une grande majorité des américains sont très religieux..

Les médias et les films nous poussent à penser le contraire, mais la vérité est que les gens ne sont pas aussi loin de la religion que nous le pensons.

Ceci dit, je respecte leur différence bien sûr, mais ce que j'ai dit sur la "déboussolisation" du monde islamique entre dans cette guerre cachée ou déclarée contre l'Islam et les musulmans : de nouvelles croisades comme l'a dit Bush le 11/9/2001 (ne me dites pas qu'il était sous le choc).

Un autre fait est digne de méditation : quand on regarde les infos, et à chaque fois qu'il y a du sang qui coule, c 19 fois /20 du sang musulman .. Hazard ou "religion violente" ou quoi ??

Houcine MASTOURI a dit…

Autre chose, j'ai pas dit que tous les savants musulmans sont honnêtes, d'ailleurs j'ai parlé d'un cas bizarroïde. Il y a des corrompus, il y a des honnêtes qui ne peuvent pas tout dire non de peur de prison mais pour ne pas perdre le média et pour avoir l'occasion de corriger même une petite portion des maux du monde musulman, et là je suis d'accord avec eux.

Je ne pense pas que la solution soit de critiquer uniquement les gouvernements. Corriger la société est aussi sinon plus important.

J'ai aimé entre autre dans le blog de BTB cette orientation : critiquer les comportements et les citoyens, car on ayant de bons citoyens nous pourrons peut être un jour corriger les maux de notre société et administration de A à ... (wallahi ken nouslou à P c'est déjà bien pas nécessairement à Z..)

أنيس a dit…

je ne pense réellement pas qu'il s'agisse d'une guerre de religions
moi qui vit en Occident, je peux dire que ce sont plus les musulmans qui ont cette vision que les occidentaux

Ce qui mène les affaires et les relations stratégiques globales ce sont les ressources et le business et tout ce qui permet de les contrôler

Maintenant il ne faut pas généraliser le fait que quelques mabouls prêchent sur Hotbird ou au fin fond du Texas contre les musulmans car il y a aussi beaucoup d'ignorants parmi eux aussi.

Par contre ceux qui détiennent le pouvoir (comme Bush) sont quand même conseillés par des spécialistes en géostratégie et même Bush ne peut pas agir comme bon lui semble car beaucoup d'intérêts -surtout économiques- sont en jeu.

Donc expliquer la guerre en Irak/Afghanistan par des motifs religieux est totalement hors sujet

En fait ce qui se passe au Moyen-Orient est proche du chaos interne (exactement comme lors de la colonisation) ce qui a fourni l'occasion en or aux faucons de la droite américaine de pouvoir s'installer afin de contrôler une zone stratégique en ressources ni plus ni moins

Ils n'avaient pas prévu par contre une guerre civile (qui est une raison supplémentaire de faiblesse et donc besoin de tuteur américain)

Globalement ce qui est la raison de la faiblesse du monde arabo-musulman est plus dû aux luttes internes, au sous-developpement, à la corruption , au despotisme qu'à des raisons type Occident

L'Occident (et ça pourrait être la Chine demain) ne profite que de cette faiblesse pour faire avancer ses pions ni plus ni moins

Houcine MASTOURI a dit…

Je ne suis pas en total désaccord avec toi, je dis seulement que la religion est pour quelque chose dans tout ce qui se passe. C'est pas une question de religion seulement, mais la religion n'est pas complètement hors sujet dans ces conflits..
L'appui à Israel n'est pas seulement une question d'intérêt, car plusieurs pays arabes servent les intérêts américains beaucoup plus qu'Israel.
Et si c'est une question d'intérêts pourquoi tout l'occident l'apuie-t-elle avec tout ce dévouement.
Avez-vous entendu de l'armée secrete de Bush ?
Savez-vous que les chrétiens pensent qu'il est un devoir religieu pour eux d'appuyer Israel, car Jesus ne retournera que qd les juifs dominent la région ?

Bon tout çà n'explique pas la faiblesse du monde musulman, tout à fait d'accord. Le monde musulman souffre de plusieurs graves maladies, et les raisons de la faiblesse sont avant tout internes.