vendredi, juillet 06, 2007

هيّا بنا نلعب: 7 حقائق على العبدولله



إستجابة لدعوة كل من نادوي صاحبة مطبخ الفيسوار العريق و بنت المرسى، ولو هو مع بعض التأخير إنشالله يسامحوني عليه، باش نشارك في لعبة السبعة حقائق ، يعني حسب ما فهمت لازمني نحكي 7 حكايات على نفسي المتواضعة، وأنا بصراحة ما نحبّش نحكي على روحي بالكلّ، خلّي عادة في المدوّنة، أما ميسالش، الدنيا بكلّها ماخذة بالخاطر. باهي، نبداو في إستعراض السبعة حكايات من حياتي الخاصة اللي "نورمالمون" ما تعنيكمش

1- كيف كنت صغير نقرا في الإبتدائي، كنت ديما نروّح من نفس الثنيّة، وكان فمّا طفل يعرضني في شطر الثنية كل يوم في نفس البلاصة تقريبا، وكنّا كلّ ما نتقابلو نتضاربو، يعني تقريبا كل يوم، بونية وشلابق وتلاطيخ وفي الآخر توفى بالحجر، وكان الطفل هذا أكبر مني شوية، يمكن بعام ولاّ بعامين، وكان مرّة يغلبني مرّة نغلبو، وساعات نشدّو مع أولاد حومتي نفشخوه، حاسيلو سنين ربّي وأحنا نتضاربو حتى لين نسينا علاش، ولاّت صنعة، أما زادة كانت تجربة ثريّة من حيث فنون العرك ونوع من التحدّي اليومي بيني وبين الطفل هذا اللي ما نعرفش حتى إسمو لليوم. وبالمناسبة كان يقرا البوست هذا نحب نطلب منو السماح على نهارة اللي روّح يبكي كيف شديناه أنا وأولاد الحومة، ونقولّو بالله ذكّرني علاش كنّا نتضاربو كل عشيّة تقريبا في نهج محمد أمين؟

2- كنت في الإبتدائي ما نجي كان الأول متاع القسم، أما من نهارة اللي خذيت السيزيام فسدت وتلهيت نتعلّم في البلادة وعملت فيها إنجازات كبيرة، الحمدولله الواحد كمّل قرايتو لاباس وما اتطرّدش على بكري، وبالمناسبة كنت ومازلت أبهم ما خلق ربّي في الرياضيات، دايور نراها حكاية فارغة وما نحبّش نفهمها من أصلو. كيما يقولوها: الكسّابة تكسب والط...ة تحسب

3- أنا عمري ما إحترمت قانون المرور-في تونس بالذات- وعندي كيف ربي واحد، نحرق الضوء، ما نعطيش الأولوية، ندخل في "السونس أنتردي"، نسوق بالعو ساعات، ما هوش مشكل، ومع هذا نعتبر نفسي من أحسن الناس اللي تسوق في تونس، وعمري ما نعرّض روحي ولا غيري للخطر، يعني تنجم تقول عامل لروحي مجلة الطرقات الخاصة بيّا في مخّي واللي لقيتها تتماشى أكثر مع كيّاساتنا، وصدّقوني لاقي بيها راحتي أكثر برشة من هاك الكود اللي تقراو فيه بعشرة آلاف الساعة. مثلا أنا من الناس القلال اللي ديما نعطي الأولوية للمترجلين، إلاّ هاك اللي يبدا هابط يمشي في وسط الكياس بتبوريب، هاذاكة كان نلقى نعفس عليه ونعاودلو "مارش آريار" كيما في لعبة "قران ثافت أوتو". لكن من جهة أخرى تلقاني نبدا خايف برشة كيف يسوق بيّا عبد آخر، ونبدا نعسّ معاه ونمرجلو الكبدة متاعو على أقل غلطة. برّا لوّج علاش؟؟

4- مادامني متذكّر أنا مغروم برشة بألعاب الفيديو، تقولو إنتوما ملاّ شارف عمرو 30 سنة ويلعب؟ أو نوورمااال. مثلا نتحدّى أيّ غشـّير كان ينجّم يربحني في طرح كورة على الـ"برو إيفولوشن سكّر"، والمقصود هنا موش السكر اللي يحلّيو بيه أما الفوتبول بالأمريكية

5- من صغري مارست برشة رياضات ، بديت بالتنس وكنت نلعب مليح بالمقارنة مع عمري، غير الوالد الله يهديه كيف شاف الحكاية بدات تولّي جديّة خاف لا تضيعني على قرايتي وبطّلني منها، باقيها راكم تفرّجتو فيّا في رولان غاروس. من بعدها عملت كاريار قصيرة شوية في كرة السلة وكانت من أحسن سنوات حياتي السنوات اللي عدّيتها على ملاعب الباسكات، اليوم مازلت مغروم ونتبع خاصة البطولة الأمريكية، دايور كيف مشيت لأمريكيا ما ضيّعتش الفرصة باش نمشي نتفرّج في مقابلات أن بي آي، وكنت فرحان برشة كيف خلطت على الأسطورة "سكوتي بيبن" لاعبي المفضل في الموسم قبل الأخير ليه مع فريق بورتلاند قبل الإعتزال. اليوم اللاعب الوحيد اللي مازال يعجبني برشة هو "آلان آيفرسون" الجار السابق لخونا طارق الكحلاوي في فيلادلفيا، أما أكثر رياضة قعدت مغروم بيها ونمارسها هي رياضة رفع دبابز البربر من فوق الطاولة وتفريغها في كرشي، وفمّا زادة رياضات أخرى ما انجمش نقول عليها توّة

6- مازالو كان زوز حاجات، لازمني نختار حاجة باهية. باهي، تعرفو ظاهرلي أني عملت دراستي الجامعية في ميدان الحقوق، أصدقائي في الدنيا أغلبيتهم من رجال القانون زادة، أما بصراحة أكثر نقطة مشتركة بيناتنا هي كعبات البيرة اللي نعملوها مع بعضنا. على فكرة على ما نعرف المحامين هوما أكثر ناس مغرومة بالشراب في تونس، آش خلاّهم هاك العام جاو باش يتبرّعوا بالدم للفلسطينيين ياخي طلع دمّهم بكلّو كحول، ولاّو رجّعوهولهم باش ما ينجّسوش بيه القضية الفلسطينية.

المفيد، بعد ما تحصلت على شهادة الأستاذية بمدّة قصيرة، وقبل ما ندخل لخدمتي الحالية، وقّـفوني مرّة في وسط البلاد باش يعدّيوني على الكمبيوتر ياخي طلع عندي حكم غيابي بـ6 أشهر حبس جاوني هديّة غيابية من عند المحكمة العسكريّة بتهمة عدم تلبية الدعوة للخدمة الوطنية في حين أنا مازلت طالب وعمرهم ما بعثولي إستدعاء. حاسيلو جاب ربّي عملت إعتراض والحكاية تفضّت نهارتها بشويّة معارف، ماكانش راني ضربت 6 شهور في قلبو بتهمة الحصول على شهادة الأستاذية في عهد الجاهلية، حاسيلو من نهارتها الجيش هذا حلفت عليه ما نعفسوش ولا يرى من عندي كيف يكون ملّيم أحمر، كان نعرف نمشي نعدّيه في إسرائيل

7- سابعا وأخيرا، ما بقالي ما نقوللكم كان أني مولود في عام سبعة و سبعين، وعندي كلبة من نوع الراعي الألماني عمرها سبعة أشهرة، وغدوة بالصدفة باش يكون يوم سبعة من الشهر السابع من سنة ألفين وسبعة، وربّي يحييلنا السّبوع الكلّ وعلى راسها السبعة الحيّة، ويخلّيلنا هالرقم المبارك علينا أجمعين، وكيما يقول المثل التونسي المعروف في مجال الكارطة: "كلّ غريبة وغريبتها كان الحيّة وشكبّتها"، أما ما تنساوش اللي في كل الحالات "اللصّ" هو اللي "يهزّ الكلّ"

هيّا أنّستو


32 commentaires:

Anonyme a dit…

وأنا بصراحة ما نحبّش نحكي على روحي بالكلّ، خلّي عادة في المدوّنة،

lool c'est pour cela que je ne t'ai pas tagué sur mon blog!!!
je me suis di zayed big trap boy mayhebech erwaye9 hedha bien que enti awel wahed fakaret bech nestad3ih lel e3tiraf el 5atiiiir :p:p
hasilou !! ma fibélich bik emdharbi mel soughra !!!

à propos eni zeda fil primaire konet enji el loula ou ebdit netsatek mel 2eme année secondaire :D FIL MATH zeda ka3ba laaa !!

Anonyme a dit…

heylaaaaaaaaaa el 7 eme revelation !!!
el lass ihez el koll :D
WAHDEK!!

Big Trap Boy a dit…

@ Naufrage:

في إطار رقم سبعة المبارك نسيت باش نقول اللي غدوة لازمني نقوم بكري ونبدا السبعة في الخدمة
:s

توة هاو الفجر ومازلت ساهر

أو نووورمااااااال

Tarek طارق a dit…

هانا نتشاركو في لعب (سابقا) كرة السلة.... يا حسرة على أيامات النجم الرادسي... وقتلي كنا نهزو بطولات ألأصناف الصغرى الكل...

مافيش شك يظهرلي إلي أيفرسون هو أحسن جووار في الإن بي آي السنين لخرة.. ونقول هذا مش على خاطر يلعب في السيفنتي سيكسررز....

و بالتأكيد نتشاركو زادة في الإيمان بأهمية اللص
;)

Anonyme a dit…

Yaaaaaaaaaaa!!! t'as fait tes études primaires à Bichara Al Khoury? kont fi classe si gaha oualla si nacer?

samsoum a dit…

Ayya je me joins au club des basketteurs Si Tarek et Si BTB. Moi j'ai fait écoles et minimes a l'EST rue Said Aboubaker avec l'entraîneur Bouchnek, pas Lotfi bien sur :)) mais Mustapha. En même temps j'ai fait du Khnifri comme toi mais c'était à la salle de Sabbaghine (salle de Boxe de l'EST).
A propos de l'EST, on aurait du organiser demain le 7/7/07 un match de foot contre le CA, une occasion pour se venger du 5/5/85 :))

PS: J'aime bien le fait que tu n'as pas passé le flambeau, comme ca tu arrêtes ce phenomene commencé par les agents du 2eme bureau pour identifier les bloggeurs anonymes :))))))

Hayy a dit…

ahah! ma 3jebtnich fi 7keyet el code we swa9a bel3ou!
ne9sin a7na accidonet.
Et c pas parce que ce n'est pas encore arrivé que ca n'arrivera pas.
Aya 3aych weldi, rod belek 3ala rouhek w rod belek 3ala rwe7 ennes.

Anonyme a dit…

@ BTB : Je commence à voir un peu quel type de personne tu peux être; tu devrais être très loin de l'image (La photo RASTA) sur ton blog!!
@ BTB : L'autre sport que tu pratiques de nos jours - à part el Berber - est facile à connaitre; c'est même très visible sur la photo Rasta !! malla missile sol - air !!!!
@ Tarek Kahlawi : هانا نتشاركو في لعب (سابقا) كرة السلة.... يا حسرة على أيامات النجم الرادسي... وقتلي كنا نهزو بطولات ألأصناف الصغرى الكل
J'ai eu la chère de poule en lisant ces lignes; jétais joueur des sections jeunes à l'Etoile Sportive Radésienne, des poussins jusqu'aux juniors entre 1980 et 1990. je passait mes vacances au stade derière el Baladia, du matin au soir, s'était une belle période de la vie. Je pense que nous n'étions pas dans la même période, je ne connais pas votre nom...
Ya 7asra 3al basket fi Radès, nous étions les meilleures!!
@ BTB : à propos de la magie du chiffre, verifie avec tes parents, s'il se trouve, tu pourrais être Sbou3i aussi !!
A bientôt
Walid from Radès
P.S : Ta play list manque beaucoup de musique Ray. Penses à moi !!

Anonyme a dit…

toujours un grand grand plaisir de te lire cher BTB.....les 7 révélations et surtt la derniere,extraodinaire, étant moi meme une grande fan de la "CHkobba " :p.....tu ma donnée de la joie au coeur avec ton article léger, sarcastique et drole...je te souhaite vrmt bcp de courage et bonne continuation dans le blogging....si ta besoin de cours en math (7aja khfifa pour toi ) tu peux compter sur moi ...lol :))))

Anonyme a dit…

Rabbi ytoub a3lik mil Birra

Nada a dit…

Merdi BTP d'avoir répondu à mon invitation, c'était très marrant surtout l'histoire de la bagarre :-))

Clandestino a dit…
Ce commentaire a été supprimé par l'auteur.
Clandestino a dit…

أنا مانيش سبورتيف و ما فلحتش في حتى نشاط رياضي, أما هاو طلعنا نتشاركو في حاجة...
أنا (من غير تواضع) معلّم في حاجة اسمها جو فيديو , و من أول الالعاب متاع الكنصول حتى للالعاب القوية ...
"باكمان" "سيبار ماريو" "سيزار" "اج أوف امباير " " ميدتاون مادناس " "كول أوف ديوتي " "كونتر سترايك " "جي تي أا " "سيمس " "رايس أوف نايشن " " جينيرالس " و "الريزيدنت ايفيل " و "النيد فور سبيد" .... هاذي الكل علامات مضيئة في التاريخ و نعتز بيها...
و بالمناسبة أنا اكبر منك بعام (ما نيش غشير) أما نتحداك في برتي برو قدام الشهود و أعيان البلوقوسفير ...
في الفرسيون اللي تحبها و الوقت اللي تراه مناسب

24Faubourg a dit…

:) hlow l'eprofil mte3ek!

Anonyme a dit…

Ya BTB
tu a aussi une autre caracteristique propre a toi

tu ne reponds jamais au telephone et tu ne rappelle jamais :p

j'ai une invitation a te faire parvenir ya hamm
:)

fiha chwaya sport zeda
:)

samsoum a dit…

@Stupeur: Et moi qui me demandait pourquoi il ne répondait pas a ses mails:)) Tlaa3 3andou le même pb m3a le telephone ;)

Bouha a dit…

Le garcon que vous frappiez m3a wled el 7ouma !!!!
C'est lui l'anonyme des comments el mass5a !!!
Ayya mela 3ayed lemmelna wled el 7ouma et on reprend le projet mte3 el mtharbiyya bech nrabbiw les racailles kif el ayyem el 5aweli mte3 el makteb.
PS: rabbi yostrek messwe9a bel3ou !

Marsoise a dit…

La Tunisie ne sait pas ce qu'elle a raté, on aurait pu former un double mixte d'enfer toi et moi!
merde, la vie est mal foutue parfois!!
:))

Big Trap Boy a dit…

@ Tarek Kahlaoui & Samsoum:

On devrait organier un tournoi de streetball pour les bloggeurs/basketteurs retraités :)

Tarek, tu vas aux matchs des Sixers? Ils sont fous de laisser Iverson partir à Denver quand même!

Samsoum, t'en fais pas, nos agents ont déja ton CV complet :))

looool

@ Emna:

Je me souviens plus des noms des profs, je me souviens juste de Madame Zayneb :)

Big Trap Boy a dit…

@ Hayy:

يا بنتي ما تخافش، الأعمار بيد ربي، ما تغوّثش عليّا بركة
:))

لا بالحق، أنا نعرف روحي بقدرة ربي لاباس، وزيد نأكدلك برشة عباد تسوق صاحية في الصباح والقايلة وسواقتهم أخطر برشة من سواقتي أنا كيف نبدا عامل كاسين ولاّ زوز ولاّ هي عشرة

على كل حال ربّي يتوب علينا كيما قال سي محمود، علاش لا؟ أما لازم نلقى حاجة ما أحسن كان باش نتوب

@ Walid from Rades:

Oui, en effet je ne ressemble pas du tout à Jimmy Hendrix :D

Sinon hathika elli ta7ki 3liha rani battalt'ha ou ma 3adech endour biha :)
Pour le Raî tu proposes quoi comme titres? Je n'ai pas de nouveautés de ce côté.

@ Nouha:

Merci bcp pour le comment trés gentil. Des cours particuliers? en privé? Ras ras? OK, ama pas de maths bélléhi :D Je risque de m'ennuiyer grave

@ Ma7moud:

Rabbi itoub 3lina men koll mahou khayéb ya khouya. Pour l'instant je classe encore la bière dans la rubrique des 7ajét plus béhia que Khayba, mahou il y'a toujours le pour et le contre :)

@ Nadouille:

De rien lella, merci à toi pour l'invitation. J'ai bien mérité un bon dessert non?

@ Clando:

Dommage que l'internet mté3na yéfli m3a eddébb, sinon rani chadditék fi tor7 PES5 3titek 7wira walla chinka :)) 3andi équipe kassou7i esmha Big Trap United, eb kolha joueurét fsayél mtalla3hom sur mesure wel tenue maktoub 3liha "GUIRRA VIRAGE EL COMMANDO" loool

Big Trap Boy a dit…

@ 24Faubourg:

Enti a7la; i3ayychék

@ Stupeur et Samsoum:

آشنوة الإتهامات الموش صحيحة هاذي؟ أنا جيست نجاوب مع شوية روتار، أما ديما نجاوب
:))

@ Bouha:

Za3ma howwa bidou? Non ma netsawwerch yatla3 rancunier à ce point, en plus l'autre kénet 3andou assez rjouléyya béch iwarri wajhou mouch isébb derrière un pseudonyme
:)

@ A girl from Mars:

Ma chère, toi et moi on peut former ce duo mixte de plusieures façons, mouch lézem sur un court de tennis
:p

Clandestino a dit…

@btp: ahou dars fil conduite
emma houa 3andou hammer winti ech 3andek??
http://youtube.com/watch?v=1JmFVeAEztw

Transit World a dit…

salut BTB ca fait qq temps j'ai pas que j'ai pas surfé sur la blogosphére et la je tombe sur ton post, dima makarr ki elada.
ca fait plaisir de te lire, et de savoir qu'on a le même âge, je me rend vcompte de plus en plus qu'on ai beaucoups de trentenaire à poster ; )

M.o.u.l.i.n a dit…

Une seule objection : ça m'étonnerait que tu me battes à PES :-)

Fais gaffe quand même avec l'alcool et le volant. Tes propos me rappellent un ami avocat pour lequel ça a finalement mal tourné.

ربّي يستر وبرّا

Hayy a dit…

@BTB: "لازم نلقى حاجة ما أحسن كان باش نتوب"
mouch y9oulou -why drink and drive when you can smoke and fly? Jarreb.
c une blague rahou, temchichi tsou9 metkayef

Anonyme a dit…

يا زعماء التدوين نحبو برجولية فصييييل حملة تدوين ضد ترشح الزعبع لانتخابات 2009 زعمة قلوبكم قوية وتعملوها
انتوما ياخذو كلامكم الناس الكل
نستنو فيكم بفارغ الصبر

Nada a dit…

el ghali tlabb 3arr5iss

TUNISIENDOCTOR a dit…

chnoua jme3et el basket rani m3akom emmma ena oueld echeminouuu "CSC" poussin au junior de 1974-1986 disons fil bac wakeft emma el tawa nal3eb fi terrain rades bidhet koll sebt a 13H30 sauf en été ou il fé un soleil de plomb et a 39 ans je gagne encore assez svt avec des cadets et junoiors actuels qui sont des khbozz devant nous les vétérans

Anonyme a dit…

عاش رقم 7 المقدس و المحبوب عاش

شكرا يا معلم بيغ على هالتدوينات التحفونة

منجم نقلك كان يعطيك الصحة و ربي معاك و وحدك يا معلم

خوك ولد الصحرا راعي الإبل

nickname a dit…
Ce commentaire a été supprimé par l'auteur.
nickname a dit…

أكيد رقم 7 فيه حكمه

لأن أنا رقم حظي اليوم بالأبراج 13

;S

دليل قوي

هىهىهى

Anonyme a dit…

si t'as 7 verités le restant c koi hihi koudess msata
non BTB tu sais ke in3ezik et ing'ibech ochhra 3la el net(mnt c fini dolce est de retour) min les blogs que je lis loulin blogik apres le mien et mnt celui de ma soeur
haya ya sidi barra rabi m3ak
et bonne fete a toi