vendredi, août 11, 2006

صدام حسين و الصحافة بودورو

يبدوأنّ قصّة الحب بين صدام حسين وبعض الصّحف المنحطّة مازالت باش تتواصل إلى ما لا نهاية
ولعلّ السبب في هذا يرجع إلى أنّ الطيور على أشكالها تقع، يعني اللّي الزوز يتلاقاو في الرجعية والتخلّف والإنحطاط، وكيما يقولو الأنقليز
Misery Loves Company
وأكيد أنّو فمّا أسباب أخرى لعلّكم فهمتوها وحدكم، موش لازم لين نقولو هونيّا بير
...
المفيد قصة الحب متواصلة، وصدّام مازال عند بعض الساذجين من الناس، المتأثرين بهذا النوع من الصحافة، مازال يحمل صورة البطل القومي اللّي رفع رأس العرب ودافع عليهم ضدّ "الكفّار" و اليهود
ما نحبّش ندخل في مناقشة طويلة وزايدة على تقييم اللّي عملو صدّام خلال مسيرتو الطويلة، على خاطر الموضوع هذا مفروغ منّو بالنسبة لي و لأيّ إنسان عندو شويّة عقل ومنطق، ومع هذا مازلنا نسمعو ونقراو كل يوم، في ناس تشكر وتمجّد في صدّام، وعلى راسهم بعض الجرايد متاعنا، اللّي مازالت تحكي كاينّها الحرب متاع العراق بدات البارح وصدّام مازال باش يزدم، وقت اللّي هي الحرب هاذي وفات من قبل حتّى ما تبدى
...
على رأس هالجرايد هاذي واللّي غلّبت عليّا جريدة "الشروق" المحترمة اللّي ما زالت تحكيلي على جيش صدّام وعلى محاكمة "الرئيس صدّام"، وعلى نظريّات و مؤامرات وخرافات متاع أفلام الـ
science-fiction
هذا الكلّ باش ما يقولوش راهو صدّام خسر و تهرد وتكبّ سعدو وأيّامو وأيّام العراق معاه
...
يا سيدي باش نحكيلكم شبه نكتة صارتلي ما عندهاش برشة مع واحد تاكسيست، راجل كبير مسكين، قام يحكيلي على العراق وعلى صدّام بعد ما عدّاو الأخبار في الراديو، ونأكّدلكم أنّو الراجل ماهوش يفدلك ومتأكّد ألف في الميا من صحّة كلامو
...
قاللي يا سيدي اللّي السيّد اللّي يحاكمو فيه ما هوش صدّام، هاذاكا واحد من الـ50
sosies
اللّي عاملهم صدّام يشبهولو في العراق باش يتلّف بيهم الجرّة،
أما صدّام الحقيقي، فالسيّد قالّك راهو متخبّيلهم تحت الأرض هو و300.000 جندي، مانيش عارف عاد لا كيفاش ياكلو ولا كيفاش يتنفّسو عندهم أكثر من عام، والخطّة المدروسة والحاضرة من قبل الحرب حسب عمّ الرّاجل هي أنّهم باش يستنّاو الأمريكان حتّى يطمانو ووقتها باش يخرجولهم من تحت الأرض في اللّيل ويذبحوهم الكلّ
...
بصراحة أوّل ردّة فعل جات لبالي هي أنّي نقوللو هبّطني هوني راني ما نحملش الجهل العربي الأصيل، هذا إذا كان ما سبّيتوش
...
أما من بعد لقيت زايد باش نتعاند معاه ولاّ نحاول نفهّمو، وزيد هو راجل كبير آش مازالّو في الدنيا؟ خلّيه ينعم بجهلو حتّى يهز ربّي متاعو. ولّيت قلتلو يا بابا كلامك صحيح وتباركلّه عليك في الثقافة والبوليتيك
...
الحكاية هاذي ما حكيتهاش باش نضحّككم على راجل كبير مسكين، ولكن باش تشوفو قدّاش الناس ساعات تحبّ تعيش في الخيال والأسطورة، خاصّة لمّا تلقى صحافة تنفخلها في وذنيها وتكمّل على ما بيها
...
ظاهرلي في الحلقة الأخيرة من هالكوميدي دراماتيك لازمو صدّام بيدو يجبد نسخة من جريدة الشروق في وسط المحكمة ويبدى يندب فيهم حيار ويقوللهم "فكّو على ...ي ، راهي الحرب وفات و راني خسرت... أمها الكلبة. برّاو إكتبو على حاجة أخرى ينعن ...كم وقيلو ...ي"
...
ظاهرلي وقتها يمكن يبدّلو ساعة بساعة أخرى و يلوّجو على سخافات أخرى يحكيو عليها

14 commentaires:

Hayy a dit…

7atta enti ech mlazek te9ra fi chourouk??
testahel

Naddo_O a dit…

wa7dik ya m3allem!

Anonyme a dit…

Les journaux tunisiens a part el mao9ef sont des torchons donc a éviter comme a dit haifa.
Cependant on sait tous que saddam n'est pas un ange et a fait plusieurs erreurs awwalhom la guerre de irane.Mais comme chaque président arabe il ne devient "watani" que quand il a le dos au mure mais entre les usa et le saddam je choisit saddam
Pour le taxiste il vit encore dans "elwahm" comme beaucoup

Tarek طارق a dit…

Jma3at il chourouk ya3milou fi il siyasa wa mich fi essahafa... kul wa7id, bi ma fih essa7afi, 3andu il 7aqq bich ykun 3andu mawqif siyasi (3jibna walla ma3jibnach bil fallagi)... amma il 3amal essa7afi yilzim fih qawa3id mta3 minimum neutrality wa chwayya ta7lil mu3ammaq wa jiddi... na7na fi su7uf kifma qult 3aliha manajummuch nqarbu rwa7na 7atta bi buldan 3arabiyya okhra kif Masr... hadhi hiyya il muchkla illi biha fayda mich 3arkat saddam... bil munasba saddam m3a il hamm mta3u il kull (qam3, 7rub mich fi blasitha...) kan rajil yi7sib bi tariqa illi jma3at il churouq ma ynijjmuhach... wa huwa 3ala kulli 7al insan yaf3al mich ya7ki akahaww... bi ma3na akhir yudhhurli saddam "zaddami" aqal barcha mil abwaq mta3 il chourouq... Ya si il Big Trap as I already said... keep posting... whether we agree or not that's beyond the issue here... We need some new air anyway... But bich wa7id ma yi3awidch il namudhaj mta3 3am il taxist wa7id ma yilzmuch ykun "zaddami" kifu... 3ala khatir wa7id ynijjim ykun "zaddami" in one sense or another... ayya annistom..

Big Trap Boy a dit…

@Haifa:
والله يا هيفاء لا عمري شريت جريدة مالنّوع هذا
sauf parfois "la presse" le week-end pour voir les annonces.
أما بابا، الله يهديه، كل يوم يجيب في يدّو جريدة، يا الشروق يا الصريح، ويحطّها في بيت الصالة على الطاولة
et donc je suis obligé au moins de lire les titres, et comme mon père est du genre trés susceptible j'évite de lui parler de ça, sinon il va me dire:
بعد ما جبتك وكبّرتك وردّيتك راجل ولّيت جاي تفيّش عليّا بثقافتك ياللّي ما تحشمش؟
Alors j'évite d'ouvrir le débat
خلّيه يعمل اللي يحب
أنا المشاكل مع الناس الكبار ما نحبّهاش
:))

Big Trap Boy a dit…

@ Tout les autres: merci pour vos réactions et vos commentaires.
;)

Big Trap Boy a dit…

Special thanx for Mr Tarek Kahlaoui for being so open minded and enriching the debate, even if we have a few little disagreements and even if he thinks I might be just another "zaddami":))
You are always welcome man!

Anonyme a dit…

Très bon article, félicitations

Les journaux tunisiens ont de l’audience et se vendent bien, même si, des fois, ils racontent vraiment n’importe quoi (l'actualité des gens célèbres, vedettes du cinéma, les stars de la chanson arabe, tops models, sportifs .. se mélange avec les nouvelles - peu précises en général - en provenance d’Irak, de Palestine, du Liban, ..)

C’est bien ça le problème.

الكاتب a dit…

يا بيغ يا خويا يعطيك الصحّة مرّة أخرى في هالموضوع القمقوم
:-)

حبّيت نقول لك انّ الشروق والصريح والصحافة ولابراس والإعلان والحدث (هذيكا عاده ماقال حدّ لحدّ) وغيرهم من الشوالق المحبّرة..هي جزء من منظومة كاملة ومتكاملة تهدف الى التفقير الثقافي لها الشعب المغبون والى ابقائه في حالة الجهل اللي هو فيها...

الشروق اللي تصدر بشكل غير قانوني على فكرة (بعد وفاة مؤسّسها صلاح الدين العامري) واللي يكتبوا فيها بعض البعثيّين الإنتهازيّين هي من أكثر الأطراف المسؤولة عن تكريه التوانسة (خاصّة من الشباب) في حاجة اسمها عرب وعروبة ولغة عربيّة وماتابعه...، نهار كامل وهمّ: هاو تفاصيل خطّة صدّام السريّة في مقاومة الإحتلال، هاو السلاح الفتّاك متاع حزب الله، هاو صاروخ القسّام 15 باش يدكّ تلّ ابيب... وغيره من العناوين الخياليّة اللي خلاّت مولى التاكسي وبرشة توانسة كيفه يصدّقوا اللي يجي ...

وزيد ماريتهم زعام كان في التبعبيع الفارغ والسبّان...نتذكّر كيفاش قبل ما شارون يشربها..كانوا نهار كامل في "شارون الجزّار" ، " شارون السفّاح" ، "مجازر شارون" وهات من هاك اللاوي..، نهار اللي الحكومة قرّرت باش تستضيف شارون لقمّة المعلومات..البلاد خاضت بالمظاهرات والجموع شبعت ماتراك وناس تحاكمت..وناس أخرى شدّت الحبس ..وهمّ ..كلمة لا ..لاحياة لمن تنادي..ولا بالعكس يزيدوا يكذبوا ويكذّبوا ويقولوا :مسيرة اشباح" علىالمسيرة اللي عملتها المعارضة في الباساج.في العاصمة...


حاصله مانزيدش نطوّل عليك الهدرة..ماك تعرّفني فيسع مانتحلّ في الحديث
:-p

..ان شاء الله هذاكه حدّ الباس..وان شاء الله النّاس تتعلّم تقاطع كلّ ماهو سيّء ومضرّ بالصحّة العقلية لمواطنينا الأفاضل..وقل اعملوا وسيرى الله عملكم ورسوله والمؤمنون

:-)

Big Trap Boy a dit…

يا النسر يعيّش خويا
راني نعرفك بلابزي وما تريضش
ماهو قلناها من الأوّل
"موش لازم لين نقولو هونيّا بير"
زيد إنتي هوني على موقع تابع لحزب الدّيك وما يعملش البوليتيك
هاك باش تلزّني نستعمل معاك المقصّ
...
نقعدوشي حلّ حانوت تتسكّر الأخرى؟

Big Trap Boy a dit…

المثل يقوللك كول وقيس
أما إنتي تاكل كي المنشار
في الطلوع والهبوط
زايد مع الهمهاما
"والبلعة مرناق،
والكمية زيتون
ooooooh la galerie
حومة الصابون"
لووول

Legend Of The Fall a dit…

Eeeeeeeeeeh yes. Unfortunately many people are until now considering Saddam Hussein as a hero. He is not and he deserves what happened to him.

Anonyme a dit…

D'abord cher monsieur le "mouwaten" lorsqu'on a le minimum de savoir vivre on ne dit pas d'une personne agée " ech maza'lou fi edenia" c'est un manque de "tarbia". Ceci dit vous n'avez rien compris à l'Irak et à Saddam Hussein : je trouve vos commantaires médiocres, nules et cela ne laisse aucun doute en ce qui concerne votre niveau ( trés trés bas). Bref vous êtes nul.
de le part d'un mowaten tounsi

Big Trap Boy a dit…

Merciiiiii :)))