jeudi, juin 21, 2007

ســبّــهم، لا تلوم عليهم ولا تعاتبهم




أهلا ومرحبا، هيّا سيدي هاني رجعت، ما تقولوش يتعزز ولاّ حاجة. الكونكسيون متاعي قصّوهالي أولاد الحرام توّة عندها نهارين مانيش عارف لواش، كان على الفلوس ضربوها على قلوبهم -يرّاهم مشومين-، يمكن من السخانة، تي حاسيلو ما عليناش، أتو نرجع نحكي على البيعة المقطعة متاع الأنترنات هاذي المرة الجاية.

اليوم كيف رجعتلي الكونكسيون عملت طلّة على التونيـ-صفار، قلت نلقاهشي اخضار ولاّ حتّى احمار (إحمار يعني ولاّ أحمر موش بمعنى "البهيم" حاشاكم)، وإلاّ تطلعشي فاتتني حملة من الحملات متاعنا الهايلة في هالنهارين اللي عدّيتهم في العزلة الرقمية. أكاهو عاد من حينك نلقاها الدنيا كلات بعضها والبلوقو-صفير كلا على راسو كيف العادة من عند اللّي يسوا وخاصة من عند اللي ما يسواش. المرّة هاذي الصحافة التونسية في اللعبة والجماعة طلعوا يعبدو في الشيطان. أما يطلع منكم يا سيدي، وأنا نقول هاكا نادية آشبيها ديما تحكي درا كيفاش ياخي طلعت منهم هي زادة

بون، باش نحكيو بالجديّات شويّة، أنا ما نلومش على الصحفي المعاق ولا على الجريدة المتخلفة اللي كتبوا المقال ونشروه أما بصراحة باش نلوم على "الزملاء" المدونين اللي وصّلوا رواحهم للحالة هاذي. توّة قدّاش من واحد يجي يعفس فيكم ويسمّعكم الكلام وإنتوما باقي جايبينها ديبلوماسية وثقافة وحوار الحضارات مع ناس هوكش ما تفهم كان بالسطاكة. حتى المرّة الأخرى كيف قلت خلّي نشدّ واحد من هالأوباش نربّيه وإنّحّيلو والديه، الناس الكلّ ولاّتـلي حمام سلام ولاّ هي سفراء النوايا الحسنة، في صلّي عالنبي، في سيّب علينا، في حسيبو مولاه... نقعدشي نستنـّا في نهار القيامة أنا باش نخلص مع العباد؟ ماهو حسيـبو مولاه في الآخرة وأنا نتحاسب معاه في الدنيا، وين المشكل؟

المفيد والمغزى من الحكاية، إذا كان تحبّو يبدا فمّا مغزى بالطبيعة ما كانش موش لازم، هو أنّها برشة مفاهيم لازم الواحد يراجعها ويعمللها "إيفالياسيون"، يعني تقييم، ومنها حكاية أنّك تكون إنسان مسالم ودوبك دوب روحك وقت اللي إنتي عايش مع عباد أقرب للذيوبة أو حتى للثعالب على خاطر ريحتها أنتن من الذيب. توّة واحد لا يعرفك لا عمرو حكى معاك يجيك نهار يقولّك "صباح الخير، إنتي راك تعبد في الشيطان"، بجاه ربّي آش عندك ما تفهّمو وإلاّ تحكي معاه؟ ماك كبّلو قهوة على راسو فمّاش ما يفيق، ولاّ أعطيه دماغ باهي على خشمو ولاّ كان ما نجّمتش مشطة في محاشمو وديما تمشي، آشنوّة المانع؟ ياخويا كيف قدّر عليك ربّي وطلعت الله غالب عليك، ياخويا ماك على الأقـلّ شبّعو سبّ وبزاق على وجهو، إي نعم، سبّ جدّ والديه والبريمة في العرق الأول متاع تراب بوه، يكذب عليك اللي يقوللك موش باهي ولاّ عيب، يا ولدي راك في تونس تعيش، فيق على روحك

أنا شخصيّا قاعد نطرح في السؤال على روحي عندي مدّة وما لقيت حتى جواب مقنع، السؤال هو علاش العنف ماهوش باهي؟؟ بالطبيعة العنف ماهوش باهي بالنسبة للناس اللي ما عندهاش جهد باش تستعملو، يعني كيف يقول المثل: اللي ما خلطش على العنب يقول مرّ، ولاّ حاجة هكّا، أما بالنسبة للناس العاديّة ما لقيت حتى مانع باش كيف إنسان يتعدّى عليك أنّك تشدّ تخبّطو كيف القرنيطة، موش باش تربّيه وإلاّ باش ما يعاودش صنعتو، أما "جيست" باش تفرهد على روحك وتفشّ غيضك فيه، وخاصة وهو الأهمّ، باش يتحقق العدل اللي هو من الأشياء اللي الناس الكلّ تحبّها. العنف عندو دور كبير في تسيير العالم وإستمرار البشرية: شوفو أمريكا مثلا، لو كان ما جاتش تستعمل في العنف زعمة تقعد بلاد متطورة وقويّة كيما هكّا؟ العنف ظاهرة صحيّة يا ناس، أضرب وربّي معاك، إمّالا وينك؟ تي هو البشر يتولد بالعنف، تلقاه عمرو مازال ما بداش في الدنيا وهو يرفس في كرش أمّو، ومن بعد عاد كي باش يهبط من كرشها، ما هو مسكينة يحلّ فيها فاتاريّة ويخلّي دموماتها شرتـلـّة

أنا نحب نرجعوا لمفاهيمنا التقليدية اللي نسيناها في جرّة الغرب اللي يحبـّنا نطلعوا يرحم عمّي تحت شعار السلم والتحضّر، نحبّ نرجعوا لمفاهيم بدينا نفقدوها للأسف في مجتمعنا، كيف البونية والمشطة والمقصّ، إيه نعم، المقص اللي يجيب واحد مفروش، يا حسرة عليه، آشكون مازال يعرف يعطي مقصّ ولاّ شلبوق على قاعدة بالله؟ يزّيونا بلا ريق متاع حقوق الإنسان و"فيناس" زايدة، ياخي الإنسان ما ياكلش المشطة؟ ياكل ويزيد ياكل. أضرب العزى خلّي يتربّى، ذوّقو بالعصا، باللي يجي في يديك أعطيه ما تخمّمش ياسر. يا سيدي أنا ماني زعيم في المبادرات التدوينية، تحبّوشي الصحفي هذا نعملولو نهيـّر نبعثولو فيه مجموعة باهية من المدونين الضرّابجيّة الهايلين يهبطولو للجريدة متاعو يشدّو يفشّخوه بالضرب حتى لين يحلف يدّو ما عادش يحطّها على ستيلو؟ شنوة المشكل؟

لا؟ ما تحبّوش؟ باهي ياخويا، سيّب علينا من الضرب، يا خويا سبّوه، هذا أضعف الإيمان بصراحة، تي هو جورج وصوف وما أدراك يقولها ويغنّي فيها: "سبّهم، لا تلوم عليهم ولا تعاتبهم، سبّهم"، زعمة نحنا المدونين باش نفهمولها أكثر من سلطان الطرب؟ اليوم البلوقوصفير لازمها تلعب دورها التاريخي باش أولادنا في المستقبل ما يطلعوش على هالحالة هاذي، يقبلوا السب والصطاكة ويقيّدوها على الحضارة والثقافة. وأنا نقولهالكم ويشهد عليّا ربّي والتاريخ، يا إلا كان ما تسمعوش كلامي ولا كلام جورج وصوف يالاّ ما تقعدو طول حياتكم هكّاكة، اللي يجي يعطيكم الكلاط وإنتوما تتفرّجوا.

أخي القارئ، أختي القارئة، نقولها بكل فخر ونعتـزّ بها أمام الجميع: يحيا الكف، يحيا الداودي، يحيا الخنيفري والسلام عليكم ورحمة الله وبركاته، واللي ما عندو شاهد كذّاب:





ملاحظة: لم يقع الإعتداء بالعنف على أي من القرّاء أو الشخصيات المذكورة خلال تصوير هذه التدوينة


27 commentaires:

3amrouch a dit…

em3ak a 100%.
sinon je suis candidat pour faire parti de l'equipe de bloggeur"tharabba" 3andi barcha ma3titch dawdi el we7ed et ca me manque.....serieux

Big Trap Boy a dit…

:))

Ayya béhi, hétha wé7ed mel arb3in !

:p

Anonyme a dit…

aaaaaaaaaaaaaaah ye 7assra 3al bounya we echahema attounisiya we el mochta.

chahhitouny fi 3arka fil 7ouma.
yessir el iqtira7 7loww, bellehy 7ottouny 3al lista khater yeddi bdet tdawwed!

ama haw bech nibda nsakhen fil 7ouma, taw nchidd awwel we7id min jme3it (fokkou 3lina) we nqollou chnowwa ra2yek fel blog ??
ken qally "chai pas", wella "fazet qnannouwett" 7assilou taw tism3ou si wkhayna ghodwa yekteb fi jaridtou "boudoura-news" ce titre:

CHEB TOUNISSY MIN JAM3IYAT "I-LOVE-THE-KHNIFRY" YA3TADY BEL BOUNYA 3ALA MAJHOUL LEE LICHAY2 ILLA LIKAWNIHY LE YOU7IBBOU AL BLOGOSPHERE.

wannistou ye jme3a , mechy nitrena ...

Naddo_O a dit…

amaaan! ana na7ki endra kifech ? :))

ya9wa 3lik rabbi 7assilou! ayya ark7ou 3lina 9allou bounya, trassilichi n7ez w nekilha fi blassetkom ? :P

Anonyme a dit…

BTB inti abled kaalous sme3t bih fi 7ieti;barra rabbi m3aak.té le meilleur
Anis

Téméraire a dit…

Chnouxa BTB, walit 3amel mokat3a lil qiyam el gharbiya we thoub et baddalha bel qiyam el 3roubia (précision mouch 3rbia).

T'hassil fina yé hallouf.

Mka3bara Zay el Batata a dit…

3leh el 3onf wel bouniya??? lweh hakka? ena min mousenidi el tmatem 7kok ( bou rtal)...we ad3ou jami3 ikhweni lel tawajjouh tadswit ila a9rab 3attar...( we law ennou 7okka hrissa t7ell fiha chwaya bech ki tadhrab we7ed 3la wejhou tetsarreb chwaya hrissa fi 3inou we tkoun dharabt 3asfourin eb 7ajra)...Peace!

nasr a dit…

التلاطيخ..
و برّا كّاكة، برّا كّاكة

Anonyme a dit…

tu hayy enness el koll tal3et mcharjya
we moch light , charge mte3 50 dinars .

Anonyme a dit…

أنا شريت مرة الجريدة هذي وبديت نقرأ في الافتتاحية متعهاـصدقوا أو لا تصدقواـ قبل من كمل رجعت نثبت في تاريخ الإصدار لأن اول فكرة جاتنمي هو الي أنا أقرأ جريدة في عام80 لكن كان من الخاطىء أن بعض المدونيبن يقومو يبررو سلوكهم أو أنهم ليسو من عبدة الشيطان .لأنهم كانو من عبدته أم لا فهذا شأن خاص بهم وليس من حق أحد محاسبتهم عن عباداتهم

Anonyme a dit…

ya citoyen, wallahi ken 93adet seket khir 9llou horriet 3ebeda welle hia chism sakhtetha,.. taoua e7na sellecneha fil horriet lkol msalli3annibi ou 9a3det ken oue7da bark..echken 3lih...fok 3lina menha khalli ettaier 3lina el 3in..ou kime i9oul BTB barra rabbi m3ak..!
Anis

Anonyme a dit…

une blogosphere à l'image de notre beau pays!!!

acht7ou w rabbi m3akom!!

Anonyme a dit…

winkoum ya nabara :D ???
BtB TLA3 bandi ou 3anif

Anonyme a dit…

N7éb kén ta3mlou mziaa ta3tiouna lien vers l’article pour pouvoir juger.

Anonyme a dit…

Je trouve ton texte très fort, je dirai même d'avant garde sur plusieurs aspects. Tu réhabilites le dialectal mieux que personne ne l'a fait jusqu'a présent. Tu réussi à donner au satire un rôle dont peux sont capable de le lui faire jouer… si je continu je ne vais plus m’arrêter mais soit certain que tes texte seront un jour étudiés dans des universités. Amitié

Anonyme a dit…

ياخويا برجولية..شابو ليك هاو الرسمي موش قالو موائد مربعة ولا هي موائد مستديرة
انا ديما نقول الزلاط ثم الزلاط ثم الزلاط
الله غالب هكة سيدي بنادم يفهم
تي هوما حتى الهوايش يتعاملو هكة شوف القطاطس ما يعرفو كان التخبيش وياخذو حقوقهم كاملة بالعراك
اييييييييييه يا حسرة على زمان كيف كان الخنيفري خدام كان الي يخرج على السكة ياكل الي كتبلوا حتى يعدي حياتو شادد الريقلة
برا خويا ربي معاك وديما حط في بالك اللطيخ ثم اللطيخ ثم اللطيخ الله غالب فما هوايش يلزمها هكة
لا تباركلهم اش يحبوا الرخص والجبن
انا كاريمون دي راني من انصار العنف ويلعن بو الحضارة خليني طارزون خير من هالقوم
سالي خويا وربي يسترك في الدارين

Anonyme a dit…

walahi heya mouch 7keyet 3onf wala mouch 3onf, ama ça exprime la haine "mte3 echa3b" 3al wadh3 el mna*** donc tellement mti9rin t9oul nched nharres dinom we7ed. Chapeau t'as résumé la situation avec ton blog
de toute façon la violence reste (malheureusment) souvent l'unique moyen d'exprimer le dégout envers un système encore plus violent

Anonyme a dit…

la première règle du fight club c'est qu'il faut pas en parler ;)

Anonyme a dit…

boycottez les journaux papier toilette

Anonyme a dit…

karek tnadhmelna journée

"les bloggueurs tunisiens contre la presse tunisienne"

:-)

Anonyme a dit…

Blog très intéressant.
Je veux simplement te demander pourquoi en Tunisie on transcrit le mot INTERNET comme ça انترنات au lieu de انترنت tout simplement pcq si l’on veut le transcrire d’après le tunisien ce serait ceci INTERNAT.

Anonyme a dit…

bon af7amtni bel ghnaya w 7abbit en9ollek :" kan jé fale7 rahou min el bare7" welli ma te9der 3lih ebza9 3lih wel "7alfa ma ettib kan berrzam" el 7assil hani m3akom la tensouni kif ma t9oul el ghnaya onsor akhaka dhariban aw madhrouban
ma dam femma el birra tous pour un et tous fi 2albou..mais we9t elli eyjed el jedd ma tel9a 7atta 7ad
w enzel rabbi blek

Anonyme a dit…

Ya BTB, berjoulia
Ama enti makaar kbir
3 jour wena nakra fil post
Tayara
Ema dima themma kassa arbi
Kayenni bik dima tkhalli fil ithara
Ahna dima wrak
Spécialement filbounia
Biensur, bounia culturelle
A +++

Anonyme a dit…

Salut,
Je ne sais pas où es-ce que l'article dont vous parlez a paru, moi je l'ai lu sur AlQods Al Arabi de AbdelBari Atouane, franchement çà m'a choqué le fait qu'un tel journal publie un article aussi nul sur une minorité de jeunes rigolos qui ne cherchent en réalité qu'un moyen pour vivre leur animalité.

Quelle importance ce fait revêt-il ?? Et combien d'adeptes de ce "culte" existent-ils dans notre pays pôur que ce prestigieux journal s'en occupe dans ces jours de grave crise palestinienne ...

Ama houma les palestiniens dhohrou génétiquement arabes : madhroubine 3la tioss rouss'hom..

BTB, je crois que frapper les palestiniens qui font ces conneries n'ajoute rien à la donne, mais je suis partant pour une campagne de "corrections bezzollate" à nos chers jounalistes ...

خليّل a dit…

برجلة بعدك انتي زايد يصير على رجال توا ولاو معادش يعرفوا الضرب
يعرفوا كان السب و سب الجلالة أما العرك هاذا مايدوروش بيه جملة
جماعة نناتي و بباتي و الياغرط
قولهم ايجا اتعارك يقلك توا نشكي بيك
تفيه رجال توا و لاو نساهم خير منهم

Anonyme a dit…

el 3onf mouch behi 5atrou stérile. Destructif mouch constructif. Pourquoi construire est la question a laquelle il faut répondre.

Anonyme a dit…

@anonyme

yekhi el Qods el 3arai jaridet rochdi 3olouen ?

wena me fibelich !