jeudi, avril 24, 2008

بلاغ عاجل إلى السادة المعلّقين على المدوّنة

مدوّنة إكسترافاغانزا،

وزارة التسييق والمسحان

الإدارة العامة للخيشة

بسم الله العالي مولانا وإنشالله يا ربّي ديما معانا،

الموضوع: قرار خطير، أقراه أتو تعرفو آشنوّة

إلى السادة المعلّقين الكرام منهم واللئام، بعد التحيّة والإحترام،

كيما سبق وقلتلكم، فإنّو موضوع المدوّنة هاذي ماهوش الدين والغيبيّات، وراني ما عملتش المدوّنة هاذي باش نتناقش مع حتى حدّ في معتقداتي ولا في معتقداتو، ونعتبر هذا من باب حريّتهم وخاصّة والأهمّ حريّتي الشخصيّة كشخص نعبد حتّى جربوع كيف يظهرلي، وحريّتي التدوينيّة في إختيار المواضيع اللي باش نحكي فيها أو نطرحها على النقاش في المدوّنة.

لهذا، وبعد البحث والتدقيق والتمحيص، فإنّي إنّبّه عليكم الكل، يا معشر المعلّقين، راهو أيّ واحد باش يعمل تعليق خارج على موضوع التدوينة ويكون الهدف منّو طرح مسائل عقائديّة، إسلاميّة أو لادينيّة أو إلحاديّة أو حتّى جربوعيّة، فإنّي باش نستعمل معاه المقص، لا للمساس من حريّتو في التعبير، ولا حماية لمشاعر القرّاء المسلمين منهم والكفّار، ولكن حماية لراحتي الشخصيّة ولمصالحي الأنانيّة والإمبرياليّّة، باش ما يخرجش الحوار على المحاور إلّي نختارها أنا على كيفي في مدوّنتي ويدخل في متاهات سخيفة متاع المسلمين ضدّ الكفار.

كان تحبّو أتو نخصّصلكم تدوينة وحدة، أعملو فيها البطيط وسبّو بعضكم وإجبدو حتى السيوفة، أما ما تجيونيش في كلّ تدوينة حضبة مسلمين وحضبة كفّار وترصّيلي نحزّ ما بيناتكم.

نأكّد أني باش نستعمل المقص بلا هوادة ودون أي توبيخ للضمير إن كان عندي ضمير أصلا، وذلك على حدّ السواء على المتديّنين وغير المتديّنين إلّي باش يخرجو على موضوع التدوينة، ومن أنذر فقد أعذر. وبالتالي فإنّه ما عليكم إلاّ بالسمع والطاعة ويد الله مع الجماعة.

صاحب المدوّنة، مولانا بيغ ولد التراب بوي الأوّل حفظه الله.

9 commentaires:

mandela a dit…

أنا موافق معاك
ونقترح عليك ترويج عريضة في الغرض ندوروا بيها على المدونات والمدونين وكل محترفي الدوانة الإلكترونية داخل وخارج تراب الوطن
big up trap

M16 a dit…
Ce commentaire a été supprimé par un administrateur du blog.
Big Trap Boy a dit…

هذا واحد من الأربعين

أم 16 شوف البوست إلّي بعد هذا

Neodallo a dit…

قصّ يا مقصّ
فمّاش ما تقص علينل شويه بهامتهم و تسكيرة "مخاخهم"
مولانا دوّن و الرّب معاك

HNANI a dit…

يا دكتاتوري يا بيق تراب بوي، هكّة إلي يدخل لدارك تعملو؟ ولا باش تعمل كيف ما قالو ناس بكري: ماتدخّل لدارك كان القمح و الشعير .... الله يهديك هههههههه

Gouverneur de Normalland a dit…

من محافظ البلاد النرمالاندية الى القائم بشؤون مملكة اكسترافقانسا ,صاحب الجلالة, تراب بوي...شكرا على هذا القرار الرائد و الحكيم

لكم منا الوسام الرئاسي للبلاد النورمالاندية و السلام

Haykel AZAK a dit…

BTB tu fais preuve de sagesse, merci pour cette décision. bonne continuation. Mais rak hgartni fel réponse mta3 el mail mte3i elli b3athtlek m3ah devis..barra w rabbi m3ak

eddou3aji a dit…

سمعنا و أطعنا،
مولانا بيغ ولد التراب بوي الأوّل حفظك الله و رعاك، نشكروك على هذه اللّفتة الكريمة للشعب إلّي يجي يفرّكّهم على التّعاليق ...في إطار تعميم البهجة... وإنشالله يا ربّي ديما معانا :)))

Anonyme a dit…

Essensure est un signe de faiblesse!

Mahou kif ma itnajjemch rou7ik, akhtak mil mwadhi3 illi ma tefhemch fiha.

zayed, gou3r! barra rabbi m3ek ou fassakhha!