آخر اللقطات والأخبار من إعلام يعمل العار: مصارعة الأكباش على قناة الأوباش

بعد الفاصل القصير للدفاع عن حقوق المرأة لازمني نعمل توّة فصيّل آخر باش ما ننساوش أصدقاءنا الهوش إلّي بدورهم ما سلموش من تجلّيات التخلّف في إعلامنا المتزلّف، وهو ما لاحظته اليوم الثلاثاء العشيّة على قناتنا الفضائيّة. البرنامج الرياضي الثمانية وسبعين في الأسبوع وإسمه على ما نتذكّر "رياضة وأرقام" شاف أنّه من الصالح بثّ تقرير مطوّل على فعاليّات مسابقة صراع الأكباش من البطحاء الأولمبيّة بالدندان المعروفة أكثر ببطحاء المتوسّط، وهنا إفهموا المتوسّط كيما تحبّو. على كلّ حال، المسابقات من النوع هذا موجودة من قبل في بلادنا ومنظمة وأمورها واضحة، عندهم بطولة وطنيّة وجامعة وطنيّة لصراع الأكباش، وحسب مصادري الموثوقة فإنّه كثيرا ما يحدث أنّ الأكباش الغاضبة على الرزنامة والتحكيم تغنّي "يعطيها باع باع الفيديراسيون"...

عاد قلتلكم المسابقات هاذي موجودة من أوّل الدنيا في تونس بالرغم من أنّها مسابقات تتعارض مع مبادئ إنسانيّة البشر ومع إحترام حقوق الحيوان وغالبا ما تنتهي بتعرّض الأكباش المسكينة لجروح كبيرة وعذاب أزرق، وكثيرا ما يموت كبش مباشرة بعد العركة باش هاك الهوكش إلّي دايرين يتفرّجو يلقاو باش يعدّيو عشيّتهم، بخلاف برشة ناس عملوا من هاللعبة غير الإنسانيّة تجارة مربحة.

المشكل أنّها هالشبه رياضة الدمويّة والهمجيّة كانت ممارستها تصير في ستر ربّ العالمين، وما كانتش التلفزة تشجّع عليها ولا تعمللها في الإشهار ولا تبثّها على قناة فضائيّة تورّي وجه البلاد للعالم المتحضّر وغير المتحضّر. نعرف أننا في عصر قاعد الرعاع ياخذ فيه في ثأرو من الثقافة ومن كلّ مظاهر الرقيّ الحضاري إلّي تميّزت بيها النخبة التونسيّة في وقت من الأوقات، وتغيّرت فيه المثل العليا والقيم متاع المجتمع، لكن ما فيها باس كان نسترو عارنا على البشريّة على الأقل باش الواحد كيف يسافر ويسألوه منين إنتي ما يستعارش ببلادو وأصلو.

على فكرة نفس الظاهرة قاعدة من مدّة تتوسّع وتشمل تعريك الكلاب من أنواع "البيتبول" و"الستاف" و"الروتفايلر"، والمسألة هاذي أخطر، موش فقط على خاطر عرك الكلاب أكثر عنف ودمويّة ومقترن بظاهرة أخرى وهي القمار أو الرهان على مصير "المقابلات"، ولكن زادة على خاطر الكلاب متاع العرك بالحقّ مخطرة وكلب كيما هكّة ينجّم بسهولة يقتل طفل أو حتى كهل، والأشوم من هذا هو أنّها الكلاب هاذي قاعدة تتربّى بالأساس في حوم عربي أو في برطمانات، يعني في بلايص ماهيش متاع تربية كلب، وأصحابها غالبا ما يكونو ناس جهلة وفصايل ما لقاوش هوما بيدهم آشكون يربّيهم، ومن المستبعد أنّم يكونوا قادرين على تربية كيف يكون كلب، وهو إلّي ينجّم يخلّي الكلاب متاعهم أخطر على العباد. إنشالله ما نستنّاوش حتّى لين تصير حوادث مؤلمة باش نتخذو إجراءات في الموضوع هذا كيما صار في فرنسا وين تكرّرت مجموعة حوادث إنجرّ عنها نوع من "فوبيا" الكلاب الكبيرة.

مفيد الهدرة، كيف ماناش قادرين باش نحترمو حقوق بنادم راهو ما فيها باس على الأقل لو كان نحترمو حقوق الحيوانات، على الأقل باش نورّيو للنّاس إلّي نحنا ماناش حيوانات !!