mercredi, avril 02, 2008

آخر اللقطات والأخبار من إعلام يعمل العار: مصارعة الأكباش على قناة الأوباش

بعد الفاصل القصير للدفاع عن حقوق المرأة لازمني نعمل توّة فصيّل آخر باش ما ننساوش أصدقاءنا الهوش إلّي بدورهم ما سلموش من تجلّيات التخلّف في إعلامنا المتزلّف، وهو ما لاحظته اليوم الثلاثاء العشيّة على قناتنا الفضائيّة. البرنامج الرياضي الثمانية وسبعين في الأسبوع وإسمه على ما نتذكّر "رياضة وأرقام" شاف أنّه من الصالح بثّ تقرير مطوّل على فعاليّات مسابقة صراع الأكباش من البطحاء الأولمبيّة بالدندان المعروفة أكثر ببطحاء المتوسّط، وهنا إفهموا المتوسّط كيما تحبّو. على كلّ حال، المسابقات من النوع هذا موجودة من قبل في بلادنا ومنظمة وأمورها واضحة، عندهم بطولة وطنيّة وجامعة وطنيّة لصراع الأكباش، وحسب مصادري الموثوقة فإنّه كثيرا ما يحدث أنّ الأكباش الغاضبة على الرزنامة والتحكيم تغنّي "يعطيها باع باع الفيديراسيون"...

عاد قلتلكم المسابقات هاذي موجودة من أوّل الدنيا في تونس بالرغم من أنّها مسابقات تتعارض مع مبادئ إنسانيّة البشر ومع إحترام حقوق الحيوان وغالبا ما تنتهي بتعرّض الأكباش المسكينة لجروح كبيرة وعذاب أزرق، وكثيرا ما يموت كبش مباشرة بعد العركة باش هاك الهوكش إلّي دايرين يتفرّجو يلقاو باش يعدّيو عشيّتهم، بخلاف برشة ناس عملوا من هاللعبة غير الإنسانيّة تجارة مربحة.

المشكل أنّها هالشبه رياضة الدمويّة والهمجيّة كانت ممارستها تصير في ستر ربّ العالمين، وما كانتش التلفزة تشجّع عليها ولا تعمللها في الإشهار ولا تبثّها على قناة فضائيّة تورّي وجه البلاد للعالم المتحضّر وغير المتحضّر. نعرف أننا في عصر قاعد الرعاع ياخذ فيه في ثأرو من الثقافة ومن كلّ مظاهر الرقيّ الحضاري إلّي تميّزت بيها النخبة التونسيّة في وقت من الأوقات، وتغيّرت فيه المثل العليا والقيم متاع المجتمع، لكن ما فيها باس كان نسترو عارنا على البشريّة على الأقل باش الواحد كيف يسافر ويسألوه منين إنتي ما يستعارش ببلادو وأصلو.

على فكرة نفس الظاهرة قاعدة من مدّة تتوسّع وتشمل تعريك الكلاب من أنواع "البيتبول" و"الستاف" و"الروتفايلر"، والمسألة هاذي أخطر، موش فقط على خاطر عرك الكلاب أكثر عنف ودمويّة ومقترن بظاهرة أخرى وهي القمار أو الرهان على مصير "المقابلات"، ولكن زادة على خاطر الكلاب متاع العرك بالحقّ مخطرة وكلب كيما هكّة ينجّم بسهولة يقتل طفل أو حتى كهل، والأشوم من هذا هو أنّها الكلاب هاذي قاعدة تتربّى بالأساس في حوم عربي أو في برطمانات، يعني في بلايص ماهيش متاع تربية كلب، وأصحابها غالبا ما يكونو ناس جهلة وفصايل ما لقاوش هوما بيدهم آشكون يربّيهم، ومن المستبعد أنّم يكونوا قادرين على تربية كيف يكون كلب، وهو إلّي ينجّم يخلّي الكلاب متاعهم أخطر على العباد. إنشالله ما نستنّاوش حتّى لين تصير حوادث مؤلمة باش نتخذو إجراءات في الموضوع هذا كيما صار في فرنسا وين تكرّرت مجموعة حوادث إنجرّ عنها نوع من "فوبيا" الكلاب الكبيرة.

مفيد الهدرة، كيف ماناش قادرين باش نحترمو حقوق بنادم راهو ما فيها باس على الأقل لو كان نحترمو حقوق الحيوانات، على الأقل باش نورّيو للنّاس إلّي نحنا ماناش حيوانات !!

13 commentaires:

Ouss a dit…

Bravo Big Trap... J'ai horreur des combats de moutons, mais surtout t'as bien dit en insistant sur les pitbulls...Faut savoir que cette race est strictement interdite dans certains pays de l'Europe.
En Tunisie, chacun se fait une tête en promenant sa bête...

mandela a dit…

tv7 de5la fi 7it da5la masta 5lasss
wlproglem akoz2 7annabaghl tv ki macchet fi m5a5 la3bed innou 7oreyet etta3bir fil koura awla takoun wnezlou 3acha3b lmet3atech lil 7orriya bdomarr lkoura wettafasil ezeyda wetkambin mta3 rijel a3mel esport...7asilou ezzaweli ily ken mo5ou feregh walla fih romario wzouz kwerr...akahaw 3ada mchet 5altek tounes dhab3a istans5et emissionnet essport kil batata wki ma l9aw 3lech ye7kiw c normal ki y7ottou mosara3t lakbech wsredek wken we7ed y7ell fomou wy9oul 3ib wmayjich w7ram 3likom t3arkou fil hweyech ya hweyech ...y9ouloulek ti ahawka esbanyour yaghtelou fi thiren wcorrida wmatador wdmoumet whamm azra9 jet 3al kbech wwe9fet
hedhy bsara7a yelzemha fatwa kess7a min 3and a7ad chouyou5 bar esso7ofi walla 7atta jfk
big up brada

YOYO a dit…

bourjouleyya yar7am fommek ya trap boy, 9oulelhom brabbi w houma conditionné com les chien de pavlov !!!

Anonyme a dit…

ya3tik saha wallahi haja thachem
3la kanetna brabi malkaou ma y3adou ken lekbech krib yraj3ouna
3lelech

Anonyme a dit…

kama takounou yoube3be3 3aleikoum!

ملاح في الفضاء a dit…

دعوة للإطلاع على مدونتى
من ضمن العناوين المنشوره


السوءه لا تعني الجسد

الحجاب حرام و غير المحجبه أفضل عند الله من المحجبه

معنى ملك اليمين ... إعرف المعنى الحقيقى لأول مرة

الإعتذار عن الأفعال القديمة

هل حقا الربا هو الفائدة على القرض ؟

مشكلة الجنس في الجنة

و هذه هى حقيقة البخارى

متي أسلم ! كي يكون مرتدا ؟

مفاجأه العوره ليست جزء محدد من الجسد

من هم المؤلفة قلوبهم ؟ ... معنى جديد

مفاجأة مذهلة - الحجاب فرضوه فى البدايه على الرجل

هل ندفع مهرا ؟ و ما معنى القوامة ؟

ERAFEL a dit…
Ce commentaire a été supprimé par l'auteur.
ERAFEL a dit…

اوول حاجة ياخويا حمد الله عليك و انا فرحان برشا بالعودة القوية متاعك ايه عندك مدة ماكتبتش 2 بوست في نهار حسيلو انا نشكر قناة 7 و الاكباش و الفقمة متاع الصريح الى نتقوك.
اما حكاية عرك الحيونات تصورها ضاهرة قعدت مربوطة بدول العالم الثالث لانها مزالت تعاني في مشاكل حقوق الانسان و ما لقاتش وقت لحقوق الحيوانات يعني كيما في مصر يعركوا السرادك و يمكن في الخليج يعركو الجمولة .
اما زادا الدول المتقدمة مهاش ناس ملاح لكدرجة حتى هما عندهم خنارهم في هال الامر , البريود الى فاتت على ملتيفزيون الفرنسية عداو دورة لا اراك الله , يجيبو زوز عباد و يحطوهم في قفص حديد و يبداو النبي ملاك بونيا و مشطا و تلاطيخ حسيلو كيما عرك الحوم الصحيح متاعنا و مهوش كيما الكاتش يعني ضرب برسمي و دمومات شرتلا يمكن الفرق الوحيد الى لعباد هما الى ختاروا باش يكلو بعضهم اما الاباش عركوهم و غلطوهم في بعضهم بسيف عليهم .
اما حلوة برشا يعطيها بع بع الفيدراسيو,هههههههههههاا
ربي يتولاك

Anonyme a dit…

ya blid rahou 3ark lakbech fait partie de notre culture, comme celle des corrida, ou des combats de coqs.
alors chouf 7keya o5ra...

onsor a dit…

btb
شفت آش جاوبوك : راهي من عاداتنا و تقاليدنا تفشيخ الكباش كيما ذبحان العلوش في الدار نهار العيد و يشوفوه الصغار و يتفننو فيه الكبار
موضوع الكلاب خطير على خاطر كيما قلت في لحظة ينجم كلب يمشمش وليد و إلا بنية صغيرة ،لكن الحاكم ما تلهاش بالعباد حتى يتلهى بالكلاب

popo a dit…

:(

ze l'ai toujours dis,

ché nous , les animaux, on tue pr manger...le restes du temps,tt va bien dans la zungle
Z'vx dire

Lorske les humains n'interviennent pas

Anonyme a dit…

@u dernier anonyme:
3lech ely i7iss el9aher we dholem yemchi ye3awedh gahrou we 5sartou fi foot we ila fi elkbech we ila ay 7aja o5ra t5alih ye7iss ely howa intasser??
@ onsor:
effectivement ici dans dce pays nordique il y a eu au moin 3 cas dont un mort (un gamin turque de 7 ans)!
je crois ke les gens ki se sentent marginalisés charchent a se retrouver meme fi 3adha mte3 kaleb!!

Neodallo a dit…

Ya3tik bagla ma abladek ya trap ;)
Mazzalt tji nhar ouit9oul taret innaf7a mil blog ta3ref 7sabek.. Aya Blougui ou "ba3 ba3" 3ala toul garjoumtek :P