أنا متضامن مع الحـريّة

أنا كيما قلت في السابق ضد الخوانجية كتيار سياسي بصفة عامة، وضد الإخوان المسلمين متاع مصر بصفة خاصة والمدونين منهم بصفة أخصّ (والسبب هنا) ، هذا ما يمنعش أنـّي ضد إعتقال أي إنسان عبّر عن رأيو بصفة سلمية. لهذا فأنا متضامن مع المدون المصري عبد المنعم محمود وقبله المدون كريم عامر وكل الناس الموجودة في بوفردة حول العالم عموما، وفي العالم العربي خصوصا وفي شمال إفريقيا بصفة أخصّ، من أجل "جرائم" التعبير والكتابة والتفكير والرأي والإستعمالات الأخرى للعقل والقلم والجلغة. ياخويا سيّبو الناس تتكلّم وتعبّر على رأيها، الناس إتخنقت و روحها طلعت، خلّي الناس تـتـنـفــّس على الأقلّ...موش أحسن وإلاّ نقعدو نقاسيو في الإرهاب والتطرف من بعد؟