lundi, novembre 20, 2006

مرحبا بيكم في أنتر-ناتنا


مرحبا بيكم في القرن الواحد والعشرين في بلادي العزيزة، تونس، أبلد بلاد وأحلى بلاد. نحنا في تونس ، وهذا معروف عند العالم الكلّ، مغرومين ياسر بالأنترنت، وبمجتمع المعرفة، وكيما تعرفو الحاجة اللّي تحبّها الناس لازم سومها يبدا طالع ماكانش تولّي كيف البطاطا وتتخلّط عاري ولابس، وتكثر فيها الجبورة والقعار وأولاد الحوم العربي، وتولّي كلام زايد وسرقة ونطرة وبونية وسكاكن

نظن هذا علاش الجماعة اللي لاهين بالأنترنات في بلادنا الله يخلّيهم، واللّي همّهم الأوّل هو الحفاظ على النظام
العام الرّقمي من العبث والهمجية متاع الأفرد المذكورين سابقا، مازالو شادّين صحيح في الحفاظ على أسعار الإشتراكات في الأنترنت "ذات السعة العالية" أو ما يعرف بالفرنسية بـ
L'internet Haut Débile
في مستوى مشرّف باش هالتكنولوجيا الراقية ما توصلش لأيدي الرّعاع- والرّعاع هي كلمة بالعربية الفصحى تعني حاشاكم الهوكش- وباش تبقى أنترناتنا كيما بلادنا، نظيفة عفيفة تعمل الكيف

أنا ما نحبّش هاك الناس اللّي يبداو يقارنو فينا ببلدان العالم الثالث الشقيقة والصديقة، ويقولو آشبيه المغرب فيه الأنترنات أرخص ونسبة الناس اللي عندهم الأنترنات أكبر منّا والسّعة العالية متاعهم عالية بالحق موش بالبلّوط كيف متاعنا؟... توّة ياخي هوما المغاربة يعرفو خير منّا؟ تي لا، هاذاكا تلقاهم المسهولين على أنترناتهم موش لاهين يخدمو على رواحهم، والله أعلم بالكشي راهم يتكيفو في الزطلة في أوقات العمل والعياذ بالله. قالّك الحكايات هاذي عندهم عاديّة وماهيش عيب. الواحد يطلب اللّطف

هو صحيح، نحنا غلطنا، والإعتراف بالذنب فضيلة- موش خالتي فضيلة- ورخّصنا شويّة هكّا في الأسوام باش نجرّبو وبرّة، آش كانت النتيجة؟ جماعة داخلين للأنترنات من الكباريّة، وجماعة من الجبل الأحمر وجماعة من حي هلال، وبدات الفضايح قدّام الناس وكلام سفاهة، وواحد ما يحشمش عامل مدوّنة فيها تصاور متاع شقوفات بيرّة، والآخر من غادي يبعث في التصاور متاع صاحبتو لأولاد حومتو، وبدات النبزيّات ما بين جماعة الكورة وهلمّ جرّا من الأنشطة الثقافية الوطنية والنبي مولاك وأشطح ربي معاك

هذا علاش لازم، ونأكّد على كلمة لازم، أنهم المسهولين يلقاو حل لمثل هذا التسيّب، ويرجّعولنا أسوام الأنترنات كيما كانت يا خويا، آش لزّنا وآش مدخّلنا لها المداخل؟ خلّيونا نشاتيو مع أولاد المنار والمنزه والمرسى وسيدي بوسعيد، موش خير؟ آش نعمل بيهم أولاد الحي أنا؟ مليون في الشهر يا خويا ظاهرلي سوم معقول، آش بيك؟ راهي 256 كيلو في الثانية، يعني قريب ربع طرناطة من المعلومات، ماهيش شويّة

ما نعرفش إذا كانها صدفة أو حكاية مقصودة ومدروسة، ولكنّي إكتشفت اليوم اللّي أنترناتنا تبدى بـ أنتر وتوفى بـ... ناتنة
...
وبرّى ربّي معاك

14 commentaires:

Anonyme a dit…

inchallh 9rib tasma3 ba5bar 7louwa 3la laswem mta3 l'intenet haute debit, 9allek w 9outlek bech twelli 5DT bark mech kif ma enti te7lem w ana kifek zeda

soapsalesman a dit…

The things you own end up owning you.

And that’s good. Because if your audience owns your network then you are saved.

The customer is always. Right?

Anonyme a dit…

يعطيك الصحة على هال البوست, بالحق حكاية البيرة في المدونات موش معقول

DRAGUNOV a dit…

je penses que notre cher ATI aurait dû calculer le débit de connection en byte et non pas en KB, à quoi ça sert de depenser des kilos alors que nous n'avons que des grammes!!
entre ( ) la connection en Corée du sud est 75 MB / sec à 15 dollars pars moi. wmab3ed makka 3la bo7mar.

walid a dit…

A s7bi chbiha ilmarsa???

Big Trap Boy a dit…

@ Walid:
"A Sahbi" hévi mta3 bouselsla mouch mta3 el Marsa berjouleyya :)))
Non je plaisante, tu sais bien ce que je voulais dire.

darkman a dit…

emzamra a3lik ya big,kon raith merteh; tkoum tejbed fi ouled ejbel la7mer et el kaberia, a3la masma3t kalek etnebzou menha el fazza,barra tawwa laouej emnin techri el birra marchi noir....

Anonyme a dit…

@ darkman: yanjjem ysallakha fil marchi noir kén y9oss kel ghoufa ili fou9 hel wejh el mezyen, ama tkhaf ychokkou fih 7akem :D

Big Trap Boy a dit…

اللي ما يدري يقول سبول
هاهاها
يا ولدي أنا نشري من حومتي وكان لزم نطلب البيرّة فون إيجيبولي للدار
آش هزّني للكباريّة؟

darkman a dit…

yeri tu a entendu parler du marine's house??? haw kalek fih el budweiser wel corona et aswem ma3koula
comme ca meme si il y a plus de ech3irr fi tounes,et consoumi birra importer.
tchousss
http://kassus.turki.fr/index.php?2006/11/21/70-soirees-a-tunis-le-bar-des-marrins-a-l-ambassade-des-usa#co
p.s:ken saretlek machekel fi kabaria kolhom rakkk sahbi et ca va aller ha ha ha

adam a dit…

و الله صحيح آش لز حمة يشطح؛ طمعونا بالادسل؛ كان قعد الواحد رايض بالكونكسيون عادية خير؛ اما توة لحكاية معادش سرفيس خايب؛ لا ولات سرقة كيما في الدومانات لخرة الكل

Big Trap Boy a dit…

@ Darkman:

ما توصّي يتيم على نواح

walid a dit…

@btb
;) ti hak tla3t wild 7ouma méla w makch 7agar! (ch9awlik fillou3'a) :)))
Ama n9olik 7aja: a5tak milhadra ilfér3'a mta3 ADSL ilkoulou babouch boumassa...tina7na ma3andnéch talvza walla ivé3a béhiya min 3a 60 l'taw winti ta7kili 3la ADSL!!!

Anonyme a dit…

tounes....sab3a....altaf....