dimanche, août 05, 2007

رابطة الأبطال الإفريقية على قناة المتخلفين ذهنيا العربية



ما بين البارح واليوم تابعت مقابلات رابطة الأبطال الإفريقية وبالتحديد مقابلتين متاع النجم الساحلي ضد شبيبة القبايل الجزائري واليوم الترجي ضد الأهلي المصري. بالطبيعة المقابلات هاذي تفرجت عليها في القهوة على خاطر مانيش مشارك في باقة ال"إي-آر-تي" وإنشالله عمري ما نعمل عملة من النوع هذا في حياتي

حاسيلو على ضوء هالمقابلات الزوز حبيت نعمل شوية ملاحظات على بعض الأشياء اللي كسرتلي كرايمي. أما قبل هذا حبيت نقول برافو للترجي على الماتش متاع اليوم اللي مزبل فيه الأهلي المصري، هالفريق اللي نفخو فيه المصاروة وزادو المذيعين متاع ال"إي-آر-تي" غلّطوهم في رواحهم حتى قريب باش يقارنوه بريال مدريد و جوفنتس ومانشستر يونايتد. حاسيلو الترجي عمل ماتش هايل وهذا خاصة كيف نعرفو المشاكل اللي تمر بيها الجمعية. هاني سمعت شكري الواعر وزياد التلمساني مرشحين رواحهم لمنصب رئيس الجمعية في بلاصة عزيز زهير والله أعلم صحيح ولاّ غالط. أنا بصراحة يظهرلي لا هذا ولا هذا يصلحو لمنصب رئيس جمعية، بون يمكن جمعية التسمسير في الملاعبية بالنسبة للتلمساني أما ما أكثرش من هذا.

الملاحظة الثانية بالنسبة لماتش الترجي والأهلي هي أنو ستاد رادس تقريبا شطرو فارغ، يعني بخلاف الفيراج الجمهور ما جاش بصفة كبيرة، أما المشكلة فاش التساكر قبل الماتش ما فمّاش والناس اللي مشات تشري ما لقاو كان المارشي نوار يعني السوق السوداء وهنا الواحد يقول سبحانو ما أعظم شانو كيفاش شطر التوانسة ولاّو من كثر ما عندهم فلوس يشريو التساكر ويقعدو في ديارهم يتفرجو في التلفزة، والله حاجة جديدة هاذي

الملاحظة الثالثة تهم مقابلة النجم الساحلي في الجزائر حيث أنو جمهور شبيبة القبائل غلط في الماتش ويستخايل روحو جاي لمظاهرة في الضفة الغربية أو في قطاع غزة، حاسيلو الجمهور ظاهرلي دخّل معاه زوز كماين سومي رومورك حجر وكنتول وياجور وحديد بوستـّة وبدى النبي مولاك بالحجر وين تجي تجي. حاسيلو الحجر هابط من الجهات الكل، وظاهرلي حتى من المذيع والمصوّر متاع الـ"أرتي" بيدهم ضربو بالحجر. المشكلة أنو الحكم كان باش يوقف الماتش أما ظاهرلي خاف على حياتو كيف شاف الجمهور يحجّر في حارس مرمى شبيبة القبايل اللي في بالو مشى يريّض فيهم. حاسيلو والله سخـّفوني ملاعبية ليتوال بالرغم أنا مانحبهمش ياسر، أما بصراحة شيء يعمل العار ويعطي صورة خايبة برشة على الجزائريين ولو موش باهي التعميم. خلاصة القول في المقابلات من النوع هذا الواحد يعرف علاش أحسن اللاعبين اللي خرجتهم الكرة الجزائرية هوما متوسطي ميدان، يعني يلعبو رقم 10، على خاطر الملاعبية اللي يلعبو قراب من خطوط الميدان عندهم حظوظ أكبر برشة باش يلبسو كنتولة جاية من المدارج كيف تبدى اللعبة في الجزائر

أخيرا وهي أكثر حاجة كسرتلي كرايمي، ألا وهي المعلقين الرياضيين متاع قناة الإي-آر-تي، والله شيء يمرّض بالسكرّ. توة قناة شارية حقوق البث بالمليارات ما عندهاش فلوس باش تجيب معلقين رياضيين محترمين؟ ولا هاك المحلل الرياضي التعيس اللي يجي ما بين الأشواط، بالله كيف هو لتوة ما تعلم يربط كرافات ما عندهمش شكون يعلـّمو أو يورّيه؟ باهي آش علينا في المظهر، توة هاذاكا تعليق متاع قناة متخصصة في الرياضة؟ جايبين جماعة متخلفين ذهنيّا، كان التشهدير والتقفيف الفارغ، على طول المقابلة وهوما يتزعبنو ويتغزّلو بالملاعبية تقولش المتنبي يمدح في سيف الدولة، ياخي ماتش كورة هذا وإلاّ أمسية شعريّة؟

حاسيلو هذا إن دلّ على شيء فإنو يدلّ على أنّها فلوس البترودولار وحدها ما تكفيش باش تعمل قناة تلفزية محترمة، وبصراحة كيف يكسرلي كرايمي توفيق العبيدي على قناة سبعة باقي نقول بقلة ليها، ماهي إلاّ مؤسسة عمومية، أما باش الواحد يدفع إشتراك بفلوسو ويتفرج في مسخرة متاع كاراكوز يشد ماتش كورة يكسرلو كرايمو، هذا موش معقول. أنا نتصور لو كان يحطو الماتش من غير تعليق أحسن بياسر

في نفس الإطار حبيت أخيرا نلاحظ حاجة غريبة ولكن من مأتاها لا تستغرب. نحب نفهم علاش المذيع الجزائري كيف علّق على مقابلة الجزائر والنجم جاء بصفة صريحة وعلنية مع الفريق الجزائري، حتى أنو كيف الجمهور يضرب فيهم بالحجر والملاعبية التوانسة مغطين ريوسهم خايفين لا تخطف فيهم حجرة المذيع الجزائري علّق بأنهم لاعبي النجم يستفزو في الجمهور، كيف اللي هو في حاجة للإستفزاز، في حين المذيع التونسي الرخيص القفاف اللي علق على ماتش الترجي والأهلي يعلق وكأنو لاهي بلادو ولا يعرفها، بل بالعكس الراجل جايب ما عندو ويشجع في الأهلي المصري تقولش صرّتو مقصوصة على شط النيل؟؟؟ بالله لواش هالتقفيف الزايد والتبندير الفارغ؟ ياخي الدزيري عندو الحق يشجع فريق بلادو والتونسي لا في قناة ال"أرتي"، وإلاّ هكاكة طبيعة فينا نحنا التوانسة نموتو على هزّان الطحين؟؟


14 commentaires:

Tarek طارق a dit…

ليوم مشيت تفرجت في البارتي بما أنو الستاد قريب من الدار... بالنسبة للتساكر موجودين في ستاد رادس... فما قيشيات مسكرين و أخرين محلولين... أنا كي مشيت قصيت ليوم الصباح شكيت لا يطلع فما مرشي نوار أما ما فماش منها... إلي قصو مارشي نوار متوسطين و بهايم حاشاك... الحقيقة أنا مشيت بش إنبر على الترجي... لكن مبعد الحقيقة لقيت نروحي نشجع فيها لزوز أسباب: أولا الله غالب ما نحملش المصاروة كيف الصفاقسية (بالصدفة الأهلي شرات بوجلبان إلي طلعو عليه اليوم الجمهور غناية تعمل الكيف بالرغم إلي ما لعبش)... و زيد عجبوني الملاعبية اليوم و خاصة الحامي.. حسيتهم يكورو لرواحهم و للجمهور متاع الفيراج إلي ما بطلش من الحس و ذكرني وقتلي حضرت على جمهور الآ سي روما توة أعوام قبل

Marsoise a dit…

Forza Roma, bardetli 3la 9albi ejjam3eya elyoum, ya3tihom essa7a!
Quand aux "reporters", fais comme moi et mon père, on coupe le son et on regarde le match trankil, mouch khir brabbi?:)

Big Trap Boy a dit…

Ayya béhi ki famma tsékir fi Radés au moins 3ala 5ater elli 7kéli 9alli rahou la famma la fi el Parc ou la fi el Menzah.

Sinon 7atta z3ayém ou Boucharouene zéda tbarkallah 3lihom, amma el virage hathéka 3ad ma3rouf dima kamikaze ma 3al bélou :))

Big Trap Boy a dit…

@ Marsawéyya:

Oui wallahi a7sen 7all, ama ena kima 9otlek netfarréj fel 9ahwa mouch fi eddar :)

Anonyme a dit…

@ tarek :-)) mati7milch issfe9siya 3al khatirhom rjel 3lik :-))

Anonyme a dit…

صباح الخير,
أني مانحملش جماعة لاسبيرانس أما إمبارح عداو ماتش هايل و وراو كيفاش أنو الأهلي فريق عادي قادر باش يخسر و يتمرمد أما صحة ليهم و بره عندهم بروباغندا برو أهلي قوية.
بالنسبة لليتوال, الحملة الجديدة إنو كان عدلت في ماتش, يولي مدرب كعبة لا, كان ربحت الفار و القبايل, فإنو مجموعتها تاعبة, موش كيما المجمعة لخرى "الحديدية" أما ميسالش, في تونس نلعبو كونتر المنافس و الجمهور و ساعات الحكم و أغلب الأحيان الصحافة و كي ندخلو لأفريك نزيداهم لحجر و الدبابز.

هيا السلام عليكم.

Monsieur Untel a dit…
Ce commentaire a été supprimé par l'auteur.
Monsieur Untel a dit…

Cette victoire sur Al Ahly nous fera bcp de bien.

Bravo pour ce post ! l'ART qui possède les droits de presque tout le foot mondial (il ne manquerait plus qu'ils rachètent les droits des parties de houmetna) n'est même pas foutus de recruter des journalistes et des commentateurs valables.

Ca ne risque pas de changer 1° car ils sont en situations de "monopole" 2° le téléspectateur arabe moyen n'a que faire d'un commentaire professionnel, ce qu'il demande, lui, c'est de voir 22 têtes de pipe gambader sur un terrain et pousser le ballon dans les filets.

je suis étonné que tu n'ai rien dit à propos de cette catastrophe nationale, arabe et humaine qu'est Issam Chawali (tunisien au passage) !

Ce pseudo commentateur qui parle de tout sauf du match de foot auquel il assiste, qui n'arrête pas de brailler pendant 90 min, qui est à démago, populo tendance nullo (je viens de l'inventer :), incarne le summum de la médiocrité, tout ce qu'un commentateur sportif ne doit pas faire pendant un match de foot. je me demande s'il n'est pas dopé aux amphétamines pour pouvoir geuler sa race 90 min durant ! Le pire c'est qu'il contribue à abaisser une culture footballistique et sportive déja médiocre et les arabes aiment ça !

Legend Of The Fall a dit…

If you are interested for blogging for Lebanon, on August 14th, 2007, plesae visit my blog to see the logo that I make. If you have a better proposition, please contact me ;) Thanx. Long Live Lebanon.

Anonyme a dit…

"le téléspectateur arabe moyen n'a que faire d'un commentaire professionnel, ce qu'il demande, lui, c'est de voir 22 têtes de pipe gambader sur un terrain et pousser le ballon dans les filets"

"Le pire c'est qu'il contribue à abaisser une culture footballistique et sportive déja médiocre et les arabes aiment ça !
"

Sahhit yé mhaff yé gawri yé athka mel3arab elkol, malla takhallof.

AS... a dit…

ihhhhhhhh itwanssa mouch na9sin t7in
hadhi 7kaya 9dima .
d'ailleur je serai etonné si tu me raconte le contraire.
il y a longtemps que je n'ai pas vu l'EST jouer de cette maniere
bravo

Anonyme a dit…

je pense que lorsqu'on est commentateur on se doit de garder la neutralité c'est plutot une qualité et c'est un signe de professionalisme, surtout sur une chaine d'audience arabe.

Big Trap Boy a dit…

@ anonyme:

Si c"était le cas pour tout les animateurs de la chaine je l'aurais compris; ama l'algérien lui comme je t'ai dis a clairement supporté l'équipe de son pays, et je crois mahouch 3ib, ama dans ce cas je crois que la chaine fait un traitement de faveur pour l'équipe du Ahly vu la masse de ses supporters parmi l'audience de ART, il n'y'a qu'à voir les pubs qu'ils diffusent, 90% s'adressent au marché égyptien! Allah ghaléb, des fois on est victime des économies d"échelle, meme au foot! :))

الكاتب a dit…

"يعرف علاش أحسن اللاعبين اللي خرجتهم الكرة الجزائرية هوما متوسطي ميدان، يعني يلعبو رقم 10، على خاطر الملاعبية اللي يلعبو قراب من خطوط الميدان عندهم حظوظ أكبر برشة باش يلبسو كنتولة جاية من المدارج كيف تبدى اللعبة في الجزائر"

وحدك يا بيغ يا ولد خالتي..ماثمّة كان انتِ تضحّكني وتذكّرني في الضمار التونسي

:-)