lundi, octobre 23, 2006

جاء العيد؟ صحّيتو صحّيتو


تي باهي باهي، عيدكم مبروك ...
هاي بدات الـأس- أم- أس أو الرسائل القصيرة جاية في جرّة بعضها ، هاو عيدك مبارك، هاو عيدك مبروك، هاو سنين دايمة، هاو ربي يدخّلك للجنّة ويفتحها في وجهك، كاينّو ربّي باش يدخلني للجنّة على خاطر الميساج متاعو، هاو لاخر قالّي الشركة التونسية للمشروبات الكحولية تهنيك وتقولك تنجّم تستأنف نشاطك الثقافي العادي، وكل واحد آش يكتب وآش يخرّف

ما فمّا كان واحد بركة هز التاليفون وطلبني، يرحم والديه، بالرغم عندي فوق العام ما شفتوش، الحاسيلو زايد مع أولاد الجنوب، ما زالت الناس ترى بالعشرة

أنا بصراحة ما طلبت حدّ خاطر مقينة عليّا النهارين وشهريتي مازلت ما تتصب كان الجمعة الجاية، يعني حتّى البلعة ما فمّاش، ولهذا الفروخ اللّي باش تجيني طامعة في المهبة، نقوللهم من توّة راهو حكاية زايدة، حتى نلقى شكون يعطيني تو نعطيكم


العيد... ملاّ بيعة مقطّعة... هاو حلو ، هاو حوايج، هاي ميساجات... كل عام نفس العادات والطقوس السخيفة ونحنا ماشين

على الأقل ربحنا نهارين كونجي، شبيك راهو تعبنا ياسر في رمضان، من كثر ما تعبنا قعدنا شهر كامل ما خدمنا شيء


ختاما لهذا الميساج البليد نقوللكم كل عام وأحنى حيّين حيّين حييّن حتّى يجي العام اللّي نشربوها فيه، أما حيين بخير ولاّ حيين بشرّ ولاّ حيين بالزرارق، هاذيكا حاجا أخرى ما انّجّمش نضمنهالك

وكيما تقول الغناية: النبي مولاك النبي مولاك وأشطح ربّي معاك

10 commentaires:

Brunette a dit…

g pas ton numéro sinon je t'aurais exprimé mes meilleurs voeux ;)
Personnellement, je crois que la technologie commence à ruiner notre sociabilité: chkoun mizzel yemchi y3ayed 3la 2as7abou ..ti wallina elkoll 2ab3ath hek l'sms elma7noun yestrka7 fi darek 9oddem el'fadha2iyet !

Big Trap Boy a dit…

merci merci merci ya amel.

Ctrés gentil, kayennha weslet

One

YASMINA a dit…

Aya Aïdek Mabrouk!!
J'ai essayé de t'appeler aal faza mais ça ne passe pas, je te rappellerai en fin d'après midi.

Anonyme a dit…

3leh tou9ous sekhifa ya extravaganza??
mouch el bal3a kol jem3a wella kol samedi soir, 3ada sekhifa akhther!!el 3id au moins yji marra fel 3am ylem ennes we el 3aylet elli ma tchoufech b3adh'ha!!
khir mel bal3a!
c'est l'occasion beh ennes t'hanni b3adh'ha we tetsame7...
aya ya extravaganza nchallah 3idek mabrouk we nchallah kol 3am wenti 7ay bkhir!!

Big Trap Boy a dit…

@ Yasmina: na3raf sa7bi rajel, on se parlera plus tard alors? 3idek mabrouk toi aussi;)

@ Lamine: Snin deyma ou rabbi ya7yik lamthélou. Pour ce que j'ai décris comme "3adét wa tou9ous sa5ifa" il faut le comprendre par rapport à ce que j'ai écris dans la même phrase, c'est à dire "7low, 7wéyij ou messagét sms", echkoun jbedd 3ala el 3id en lui même walla 3ala el bal3a?

En tout cas je posterai dans le futur un post spécial pour expliquer pourquoi el bal3a mahich 7aja sa5ifa belkoll, en attendant 3idek mabrouk encore une fois.

One.

Hayy a dit…

Kol 3am wenti hay bkhir ya Si Big

Sansouna a dit…

3idek mabrouk wou n'challah kol 3am wenti 7ay b'khir :-)

bribech a dit…

Walahi rabi yahdik yai BTB karahtni fil SMS, trassat li notlob fil dar un par un mil kharij (credit card bech ta3tini rass tres bientot) :)
Yalah Aidkom mabrouk a tous et a toutes et kol 3am outouma hayin bkhir (mich bil zreri9 inchalah)

Big Trap Boy a dit…

3idkom Mabrouk el koll, enchallah koll 3am wentouma eb 5ir.

??? ???? a dit…

snin déyma... kol 3am wil marché noire howa al 7all...