عيني على الإدارة

هيّا سيدي قلنا السلام عليكم ومرحبا بيكم. بالله سامحوني يا جماعة إذا كان ما تلهيتـش بالمدوّنة الأيّامات هاذي، ماكم تعرفو جاي رأس العام والخدمة دزّت، حاسيلو ماعليناش. اليوم وبعد أخذ وردّ مع نفسي المتواضعة قرّرت باش نحكي في موضوع إقترحو عليّا صديق من القرّاء ألا وهو الإدارة التونسيّة، ويبدو أنّو الصديق المذكور يعاني مجموعة من المشاكل النفسيّة يقول أنّ للإدارة التونسية دور كبير فيها. حاسيلو الموضوع مهمّ برشة ويعني كلّ تونسي، أما أنا كنت متردّد باش نحكي فيه بما أنّي ما نحبّش نكون قاضي وطرف في الحكاية. على كل حال أنا كيف العادة باش نتكلم بصفتي الشخصية وكلامي ما يمثّلني كان أنا.

حاسيلو آش باش نقوللكم؟ والله مسكينة الإدارة، دار عليها الزمان وولاّت الناس الكلّ تذمّ فيها وتحبّ تصلّحلها، بعد ما قرّاتكم وداواتكم وخدمتكم خمسين سنة، ولاّت تسمع في الكلام، وحتّى الصحافة اللّي ما تسوى شيء ولاّت تحلّ في فمّها وتقول الإدارة بيها والإدارة عليها، وهلمّ جرّا من هاكة الرسائل البليدة متاع الميزيريا: هاذي باعثة لوزير الشؤون الإجتماعية قالتلك زوجي معاق وطالبة إعانة لتربية أولادها الخمسة (تقولشي هو اللّي قاللها أبدى فرّخ وجيب فريق متاع كرة السلّة إنتي وراجلك المعاق) والآخر قالّك نحبّ رخصة متاع دخاخني والآخر يبكي قالّك المحكمة حكمت لفائدتي والإدارة ما نفّـذتليش، والآخر يشكي من البلديّة كيفاش ما خلاّتوش والولاية كيفاش ما عطاتوش وما غير ذلك من الذمّ المتواصل والبكاء.

أنا بصراحة وبغضّ النظر على الإعتبارات الكلّ نحبّ الإدارة، وكيف الفيلسوف الألماني هيقل، نعتبر العمل في القطاع العام وبالتالي خدمة الصالح العام مهمّة نبيلة كيفها كيف الطبّ أو المحامات، بل وحتّى أكثر على خاطر اللّي يخدم في الوظيفة العمومية بنزاهة ما يصوّرش منها ربع اللّي يصوّرو الطبيب أو المحامي. ولهذا فإنّو العمل في القطاع العام بالنسبة لي أنا هو أقرب حاجة تنجّم تكون للعمل الأخلاقي النبيل في عالم ولاّت فيه المادّة والمصلحة الخاصة هي أساس المعاملات بين البشر.

أما ماكم تعرفو زادة وما يخفاش عليكم اللّي مابين الخير والشرّ ما فمّا كان خطوة يعملها الإنسان باش يهبط من أحسن تقويم إلى أسفل السافلين. وهذا للأسف ما نشاهدوه في حالات متعددة في واقعنا اليومي. والأسباب اللّي تخلّي الموظف يعمل هالقفزة النوعية من كونه يخدم في الصالح العام إلى أنّو يولّي نقمة على البلاد والعباد هي نفس الأسباب اللّي تخلّي البشر يغلط ويتعدّى على غيرو في جميع مجالات الحياة، يعني إمّا الإغراءات أو الحاجة أو قلّة الوعي أو غيرها من مسائل تتعلّق بالجوانب التنظيمية.

برشة ناس ولاّت تشكي من الرشوة، وهي ظاهرة موجودة عندنا كيما في أكثر البلدان تطور وتقدّم، صحيح الدرجات تختلف من بلاد لبلاد، وفمّا ناس تسمّيها جعالة، وناس تسميها قهوة، وناس تقوللها ماكلة، بمعنى فلان ياكل، وفلان وكّل فلان باش سلّكهالو. يعني الموظف مسكين يولّي يعسّ على لسانو، يقول ماشي نفطر موش ماشي ناكل، ترصّيلوشي في حلّ وأربط على كلمة طايشة؟ يا خويا اللّي يشكي من الحكايات هاذي ما عليه كان ما يعطيش الرشاوي، ياخي كان ما جاتش الناس توكّل كيفاش باش الناس الأخرى تاكل؟ المشكلة حسب رأيي هي أنّو المواطن في أغلب الحالات يحب يخالف القانون ويولّي يلوّج على الطرق الملتوية باش يقضي أمورو، والموظف اللّي باش يتعامل معاه هو زادة متربّي في نفس العقليّة، وزيد أمورو الماديّة تاعبة، ويلقى الإغراءات قدّامو، قدّاش منها النزاهة والمصلحة العامة؟ ماهو بشر زادة هو!! صحيح ولاّ غالط؟

نجيو توّة للناس اللّي تتشكّى من البيروقراطية وطول الإجراءات والتعطيل في الإدارات، ومن أرجع غدوة ومازال في كونجي ومازالت ما حضرتش وغيرها من الحكايات اللي تخلّي الإنسان يضيّع برشة وقت وهو يستنّى ولاّ من بلاصة لبلاصة باش يطلّع ورقة. الناس هاذوما حبّيت نقوللهم راهو الدنيا فيها الموت، والسرعة ياسر موش باهية. يمكن عند الناس اللّي تعيش في بلدان متقدّمة تولّي باهية، أما نحنا مستانسين بالمستنّية، و هذا ودونو ما وراناش حاجة كبيرة باش نجريو عليها، يا خويا كي تحضر الورقة تحضر، شويّة صبر! إمّالا آش باش تعملو في نهار الحشر كيف تاقفو تستنّاو في نهار يدوم "خمسين ألف سنة ممّا تعدّون"؟* تراه قولو لا ما يساعدناش وما ناقفوش؟ ما جات كان على الإدارة القباحة وطول اللسان؟ قولولي أما هي الإدارة اللّي خلاّتكم واقفين خمسين ألف سنة تستنّاو في طريقكم؟ ظاهرلي إمّالا ماهوش مشكل كان صبرتو شويّة واستنّيتو جمعتين ولاّ شهرين ولاّ حتّى عامين على تطليع وريقة. آش كان عليه؟

أخيرا حبّيت نقول للنّاس اللّي تحكي عالإدارة بالخايب ما تنساوش اللّي الإدارة راهو ما بينها وبينكم كان الصلاة على النبي، يعني لا تنتخبوها ولا تبدّلوها ولا عندكم عليها مزيّة، الإدارة ماهي إلاّ أداة تستعملها السلطة التنفيذية -يعني الحكومة- باش تنفّـــذ بيها سياسياتها ، كيما النجّار يستعمل المنشار والمطرقة والمسامر وغيرها باش يصنع طاولة ولاّ كرسي، وهذا في بلدان العالم الكلّ، ولهذا حسب رأيي، ننصح اللّي عندو مشكلة يمشي يحكي مع السلطة التنفيذية متاعو ويقوللها علاش وكيفاش، موش يعلّق كلّ شيء على ظهر الإدارة، يعني عبارة على واحد طلع الكرسي متاعو معوّج ياخي سيّب النجّار وقام يسبّ في المملسة ويعارك في المنشار ويلعن في الكاغط الأحرش...

---------

(*) بالنسبة للّي ما يعرفوش، نهار الحشر يعني النهار اللّي يقومو فيه الموتى وياقفو يستنّاو في طريقهم باش يتحاسبو قدّام ربّي ويعرفو كان داخلين للجنّة ولاّ كان طلعتّلهم قرعة وباش يتعدّاو للشّوّاية .