jeudi, décembre 21, 2006

حانوت مسكّر، ولا كرية مشومة

الجماعة المدوّنين قاعدين يحضّرو في عمليّة إحتجاجية عالية المستوى ضدّ ما يسمّى بالرقابة أو السونسير اللّي وقعت على بعض المدوّنات الشقيقة والصديقة، وحسب ما فهمت العملية باش تتم نهار اللإثنين هذا: كلّ مدوّن باش يعمل بوست أبيض للتعبير على إحتجاجو على حجب المدونات اللّي باتت ما صبحت، والدوام لله على كلّ حال.

أنا واحد مالناس باش نتوحّشهم الوخيّان، خاصة سمسوم، والله كان ناس طيّبة والبوليتيك خاطيه، الله غالب دارو بيه أولاد الحرام، وماكم تعرفو، الخلطة بلطة والجرب يعدي، كرّو عليه وصبّو بيه، تي حتّى تحليلو نظيف، ما طلع فيه كان 2 قرامات سياسة وأغلبها عالمية. الله يهدي اللي كان السبب.

عادة قلتلكم المدوّنين اللّي منعو بجلدهم ناوين يخوّضوها ويعملولنا بلبلة وتشويش في الطريق الرقمي العام، عادة قلت إننبّه الجماعة المسهولين على بكري باش يمنعو هالعمليات المنافية للنظام العام، ويزيدو يسكّرو علينا ما تبقّى من مظاهر الشغب على الشبكة العنكبوتية، خلّي نقعد فيها وحدي، راسي راسهم، ماكانش ياخويا يولّي التدوين هذا عمليّة منظّمة، موش اللّي يجي يحكي اللي يخطر في بالو، ويمكن حتى يسرّب أفكار ومعلومات غالطة من شأنها تؤثر على الرأي العام تأثير سلبي وتزرع مشاعر غير وطنية في أذهان الشبيبة.

عادة قلت أنا علاش ما نعملوش في كلّ حومة دار التدوين، كيما دار الشباب، واللّي عندو ما يكتب يتفضّل يكتب جهار في النهار ويعرّف بنفسو وبالمصادر اللّي جاب منها حكاياتو ويصحّح على كلّ بوست في البلدية بالتعريف باللإمضاء باش يتحمّل مسؤولية كلامو، موش خير؟

بصراحة أنا مانيش باش نشارك في حكاية البوست الأبيض، كان تحبّو نعملو المدوّنة البيضاء نمشي معاكم، يعني نفسّخو علينا هالمدوّنات الكلّ على مرّة ونرجعو كيما كنا أحباب الناس الكلّ. كي تجي تشوف هو الرّيق هذا ماهوش متاعنا، وظاهرلي زادة عاملينو اليهود بالعاني باش العرب تاكل بعضها بالتقطيع والترييش. توّة مشكلة هي كان فمّا رقابة؟ ماهو لازم واحد يعسّ زادة، موش سيّب الماء عالبطّيخ. هاني أنا مثلا، كان ما يبداش شكون يعسّ عليّا ندخل بعضي ونطيح مانك، يا خويا آشكون ضامن؟ نهار نشرب كاسين زايدين ونقوم نهزّ ونسبط وحدي من غير ما يفيّقني حدّ، إمّالا باش التونسي للتونسي رحمة؟ ماهو كيف يجيه يفيّقو على روحو، و يقولّو يا فلان راك قاعد تعمل في العيب وما يطلعشي عليك.

أنا مع الرقابة ومع السونسير ياخويا، تي لواش عليكم؟ من أيّامات اللّي كنت نقرا في اللّيسي كان أحسن واحد يعجبني في الإدارة هو النّاظر يعني الـ censeur – عمّك الشادلي الله يذكرو بالخير- لواش اليوم تحبّوني نستغنى على شدولة على خاطر جرد مدوّنة؟ ينعن بوه هالأنترنات اللي باش يعمللنا الدوانة مع شدولة.

يا سي الشادلي، الله لا ينحيك علينا ولا يحرمنا منّك، رانا بلاش بيك... ماعادش توانسة!! وسامحني كان غلطت بكلمة هكّا ولاّ هكّا الليلة، واللّه لا نقصد شيء، ماك تعرفني خوك صاحب محنة ونستهلك كان المحلّي، إحسبني كيف ولدك وإدعي ربّي يهدينا ويهديك، وعلى كلّ حال أنا نفهم فيك.

19 commentaires:

Houssein a dit…

ouild Khaznadar ?

SNAWSI a dit…

Lool, dima hakka inti ? :)

24Faubourg a dit…

yezzi blé 9offa ya BTB !! RAK KATHART A3LA Ma OUASSAOUEK :p

Anonyme a dit…

Premier degré?? Je ne pense pas...

Anonyme a dit…

c'est absolument délicieux...:)

khanouff a dit…

merci :)))))

Amel L. a dit…

Bon eni mizzelt n5ammam fi 7keyet el poste blanc..
ya36ik essa7a ki jbedet hal mas2la..je me demande si ça va servir à grd chose..
on écrit pour nous exprimer et ptr que poster '...' reflète une certaine position..mais wemba3ad?
se taire? est-ce vraiment la solution?
ema kima 9olet fel poste précédant: parfois se taire c'est mieux..klemek m3a elli ma yefhmekech zayed :p

candel a dit…

klemek m3a elli ma yefhmekech zayed, hatha au second degré,

Anonyme a dit…

hédha illi 3a9din fih énnaouara béch y9oudna fil massira... :)
ya wildi 7atta post blanc biddérja yézzi rahou! :D
2°C

Big Trap Boy a dit…

@ Houssein:

ولد ليسي العمران، آشكون ما يعرفش سي الشادلي الكوباكجي الله يذكرو بالخير؟

@ 24Faubourg:

خلّيني نخدم على روحي، علاش هكّا؟
:))

Big Trap Boy a dit…

@ Snawsi:

آشبيه هكّا؟ ما يعجبشي ولاّ ما يعجبشي؟

:))

bribech a dit…

hahahaha walah 3amloul kom kifma le jeu des flèches tranquillisantes... rahom itay7ou feha 3alouch wra 3alouch.... Je penses kil faut porter des brassards noires au lieu d'une page blanche ou chouf yifhmou ou c houf lai.

bribech a dit…

Haka yai BTB akhta rassi ou adhrab...?

walid men rades a dit…

@ BTB
9albi 3lik ya 5ouya!! Kathartelha fil post ha4a. Jma3et el 404 baché 9rib bach yozgtou 3lik (echar barra oub3id).
ana m3a el autocensure!! 3acha man 3arafa 9adrahou !! nes bekri y9oulou, la tda5el yeddek lel mghagher, la tals3ek el 39arb.
@ Sami III
Malla mina 3amaltha lel BTB : Bach y9oudkom fel massira !! Fi belek elli hal kelma thez toul lel "mornaguia" (9 avril sabi9an) ??
3nayna ya jma3a, kol wa7ed y3es 3ala el clavier mta3ou ech yekteb, rahi kelma 3liha malk wou kelma 3liha chitane !! 3lech t7ebbou terziouna fil BTB !!
Allah yba9i 3lina wou 3likom essatr!!

Jo a dit…

Dommage!

Je viens de faire mon post "blanc"... Si j'avais lu ton texte, bien sur que je n'aurais pas été embobiné par cette idée "révolutionnaire" de page blanche!!!
Ce soir je corrige.

le_mecc a dit…

3leh ya big trappa, ti ennes 3a9da fik ennawara !!!
wallahi rabbi yehdik!
sama7ni 3ad, ken inti m3ahom, et bein na7na rahou manech m3ak!!!
du coup, tu te met à l'ecart!!!
rak bahi ya BTB, w 5allik béhi ...

Mourad a dit…

un peu déçu mais bon: si c ton ton choix!!
seule proposition: modif du titre :"karia mchouma wlé hanout msakker"

Big Trap Boy a dit…

@ Mourad:

Je garde ce titre, tu comprendras pourquoi en lisant le prochain post.
;)

Anonyme a dit…

والله يا تراب بوك...نقصد يا تراب بوي..فكرة هايلة هذي متاع القصان...باله يجيشي منو طرح بولوت من غير قصاص ترافل ؟؟؟ تي ماهو يمصاط
لذا قررنا في بلاد نورمالاند باش نقصو كل شي ..الانترنات و الجرائد و الافلام و المسرحيات و الماء و الضو و نكملو لهاك الصغيرات نقصولهم...نقصد نطهروهم في حملة نظافة شاملة...و تحيا النظافة