إســتـفــتـــــــــــاء

في إطار العمل بـمبادئ الديموقراطية وترسيخ السلوك الحـضاري -مع العلم أنّ كلمة ترسيخ السلوك الحضاري هاذي من أكثر الكلمات اللّي نكرهها واللّي تعبّر على البهامة والتـرهدين في نفس الوقت- قمنا على بركة الله بالمصادقة على مشروع جديد في هالمدوّنة هاذي، اللّي هي منكم وإليكم، وفيكم وعليكم،يتمثّل في إحداث إستفتاء يمكن في إطارو للقرّاء الكرام أنّهم يعبّرو على رأيهم في عمليّة إدماج المدوّنتين الزوز في مدوّنة وحدة، وذلك بدمج المدونة الموسيقية في المدونة هاذي، وبالتالي نشر بعض الأغاني والموسيقى على هذه المدوّنة

أيّها القارؤون أيّتها القارئات، يمكنكم من الآن التصويت على هذا القرار بكل حرّية وشفافيّة وأريـحيّة، أهوكا عندكم صندوق الإقتراع مـحطوط على يدكم اليسار في ركن أعطيني صوتك، شيّخو رواحكم

ومادمنا في فترة إنتخابية أو بالأحرى إستفتائيّة، قلت ما فيها باس نحفّلوها شويّة على المدوّنةـ فاش قام نهار الكلّ وأنا نشكي ونبكي وما عاجبني شيء؟- ولهذا باش نعملو بوست ربوخ وبومزيود الله مصلّي عالنّبي، ولهذا من توّة نقوللكم اللّي عندو فولارة يتحزّم على خاطر من بعد ما يلقاش وترصّيلو متحزّم بكاش كول، هيّا سخّنو الدّرابك هاني جيت،

وإنّا لله وإنّا إليه راجعون

والسلام عليكم ورحمة الله وبركاته