dimanche, janvier 07, 2007

*الــصّـريــح، أو النيــو- صـحـّافيزم



ما قلتلكمشي من المرّة الأخرى راهم ما يحشموش؟ أهوكة هي هي وعملوها، ما صبروش. الشيء أقوى منهم وظاهرلي راضعينو في الحليب...

توّة زعمة قلنا صدّام مات والحكاية متاعو باش تتنحّى أخيرا من الجرايد متاعنا اللّي ولاّت بعـثـيـّة أكثر من جماعة حزب البعث... آش ولاّت الهدرة توّا؟؟ أسمع يالّي ما تسمعش، صدّام مازال في الصفحة الأولى، وعلاش حسب رأيكم؟ على أخبار من نوع جديد: واحد ضرب مرتو بسكّينة في المغرب على خاطرها قالت صدّام يستاهل، والأخرى إنتحرت في الجزائر على خاطر سي صدّام، والأحلى من الكلّ: فتاة سعودية ترفض خطيـبـها على خاطرو يشبه لقاضي صدّام ... آش مازال آخر بجاه ربّي؟ هاذا هكّا والحكاية مازالت سخونة، أما نتصوّر من بعد ما يولّي الخبر قديم وبايت كيفاش باش يلقاو طريقة باش يزيدو يجبدو عليه؟ يولّيشي ثقب الأوزون يزيد يوساع مرّتين بسبب إعدام صدّام؟ وإلاّ روجي لومار يحقّـق الإنتصار بفضل تكتيك صدّام؟ ولاّ في باب بريد القرّاء باش يولّي مواضيع من نوع "حبيبي ظننته صدّام لكنّه طلعلي سعيد الصحّاف"؟ وين ماشين؟ فهّموني؟

وزيد على هذا، في الوقت اللّي البلاد الكلّ عايشة في المهموتة- يعني ما فاهمة شيء- بعد أحداث "العصابة الخطيرة" اللّي قامت عليها القيامة، ما لقاتـش الصريح أحسن من التلاعب بالحدث هذا، بعد ما إستقالت من دورها كوسيلة إعلام، و ولاّت حانوت عطّار أو بالأحرى فحّام، وزادت نشرت صور لضحايا حادث مرور صار في ليبيا عندو قرابة الشهر في الصفحة الأولى متصفّـفين بجنب بعضهم ، فمّاش ما القارئ الجاهل اللّي يمثــل راس مال الجرايد هاذي يغلط ويمشي في بالو الجريدة نشرت صور لجماعة العصابة، وبالأمارة أهوكا واحد منهم حاطط على الجبين عصابة.

ما نتصوّرش ناس منافقين وخبثاء كيما جماعة الجرايد هاذي إختارو الموضوع هذا في الوقت هذا وعلى الصفحة الأولى بالصدفة. حاسيلو إن لم تستح فأفعل ما شئت، أما زادة ما لازمناش نستغربو إذا كان الشباب اللّي عندو مستوى تعليمي متواضع يمشي يرمي روحو في يدين التيّارات المتطرّفة والجهاديّة اللّي تحبّ تبعث الناس للموت في العراق وغيرو، مادام حتّى من الصحافةالشّـبه رسميّة من نوع الصريح والشروق، نهار وطولو تبندر لصدّام والمقاومة والجهاد والشهداء، وتمجّـد في قتل الأمريكان ودكّ المارينز وغيرو من الحكايات اللّي تتباع بيها الجرائد في الأوساط شبه الجاهلة.

هذا يعني بالعربي أنّو الواحد يبدى يعور في عينو بيديه ومن بعد يقول كيفاش ومنين جانا ومن وقتاش عندنا.وأنا نقول بصراحة أنّها الصحافة اللّي تشجّع في الشيء هذا بصفة غير مباشرة لازمها تتحمّل المسؤولية وتتحاسب كيف ما الناس الكلّ تتحاسب، والبلّوط هاذا لازمهم يشوفو غيرو على خاطر نتائجو بدات تظهر، وحسب ما فهمت ماهيش باهية بالكلّ

* Le néo-sahhafisme: Mot inventé par moi-même en référence à l'ex-ministre de l'information Irakien Said Essahhaff, célèbre pour sa franchise inégalée et la transparence de ses informations, et surtout pour sa fameuse "al 3oulouj"!

13 commentaires:

met3addi ou barra a dit…

brabbi 9olli féna cho3ba tekhdem yé 9aoued, yé sabbeb??? cho3bet el 30mrane? Malla 7ala fik... ti mao klem jaraïed kif man9oulou, wenti 3amel menha za3ma za3ma hadra kbira bech etsob biha les blogueurs 3ala roushom.
Malla 7ala fik wallah!

Anonyme a dit…

loool, malla 7ala fi hal jarayed hadhiya. J'etais surpris par le nombre de ces torchons qu'on trouve trouve mainteant a Tunis.
A propos de Essahhaff, c'est pas le meme qui disait que les americains pratiquaient des suicides collectifs a l'aeroport de Bagdad car ils etaient cernes par les forces iraqiennes, alors qu'on pouvait entendre les tirs sur l'hotel d'ou il faisait son interview :-)))

PS: Je reviendrais plus tard,pour lire ta reponse a l'anonyme de passage :-) Sa3ed 3lih brabbi :-))

Big Trap Boy a dit…

@ Met3addi ou barra:

آهه، يالطيف، فقت بيّا؟ آش باش نعمل توّة؟ نسكّرها المدوّنة زعمة؟ كيفاش باش نخدم على روحي توّة؟ والله الساعة كانت الخدمة ماشية قبل ما تفيق بيّا، بالأمارة بعثت شطر المدوّنين يبحثو في بوشوشة... حاسيلو أخطانا من الحديث الفارغ، أما إنشالله ماكش تحكي بجدّك كيف قلت "كلام جرايد" على خاطر هذا يعني نقبلو بالمستوى المنحط متاع الصحافة والإعلام بصفة عامة، ووقتها وين تولّي يا خيبة المسعى بالحقّ

أما صحّـة ليك جيت أنونيم ومانيش باش إنّجّم نصبّ بيك. خسارة

met3addi ou barra a dit…

http://www.dailymotion.com/SeifJr/video/xxjaj_fusillade-en-tunisie-gunbattle

Anonyme a dit…

Yé Extra yé Vaganza, elloum mech 3al jarayed, bel el 3akes, ya3tihoum essaha, yefhmou fil marketing, elloum 3la hal a3bed elli techri fhal jarayed. (louken mé jitech nehtarem fil bhéyem, rani kolt 3alihomù haja khayba)

Big Trap Boy a dit…

@ Téméraire V4,3:

لكن من ناحية أخرى البهامة تصنعها وسائل الإعلام كي تحبّ، وزادة كي تحبّ تساهم في توعية العباد. يعني ما تلومش على المواطن اللّي ما لقاش شكون يفيّقو على روحو على خاطر هاذاكا حدّ الجهيّد

Anonyme a dit…

Je comprends et je compati avec la fille qui a refusé de se marier avec un Type qui ressemble au juge de Saddam ! pas parce que c'est lui qui a comdamné Saddam mais parce qu'il est d'une mocheté !!!
la pauvre c'est une tragédie qu'elle vie !

C'est pour cela qu'a Normalland on pense voter une lois qui comdamnerait tous ceux qui sont moches ! Si ce juge etait a Normalland, il aurait pris perpet !

Le vrai met3addi ou barra a dit…

La personne qui a utilisé mon pseudo pour poster la vidéo est d'une bassesse incroyable!

En général, comme je suis met3addi et barra, je ne commente pas deux fois le même sujet et je ne réponds à aucun commentaire, mais là je suis sidéré de voir que quelqu'un d'autre use de mon pseudo! Malla 7ala!

Nidhal a dit…

ye5i mech mtet3addi w barra ti hak mechi jey ti barra asra7 3ad
ça soule des gens com ça ils collent au cul com pa possible

Anonyme a dit…

تي بالله ملا تزعبين و ترهدين ...و كأنو عندنا حرية الصحافة في تونس باش تكتب الجرايد آش صاير في البلاد:أنا بصراحة نراك انتي منافق و خبيث أكثر من متاع الجرايد...تي ما فمة حتى واحد يتجرأ و ينتقد الحكومة اللي ما حبتش تتنحى من عهد البايات...توى نستناو الإنقلاب العسكري الجاي باش تتبدل هذا إذا ما رديناهاش المملكة التونسية

Big Trap Boy a dit…

لا ظاهرلي المرة الجاية باش يجي واحد مهباط كيفك ما عندوش إسم ويخرجنا من التخلف ويمشي على روحو بتعليقاتو على مدونات الناس، هاذا هو الإصلاح الصحيح ولاّ لوّح

برّا أعمل غلفة بالفيكس وغمّ على راسك وأرقد خير، توة كي يبدا فمّا الجديد نعيّطولك باش تجي تصفق وتاخو كسكروت

:))

Anonyme a dit…

فيبالك الناس الكل كيفك؟ هاك الكلام قولو لروحك على خاطرك مزلت تنتقد في الأوضاع و كينوا ما تعرفش السبب وين؟ هذيكة ميكروفيزياء السياسة اللي تحب تنوم الشعوب و غرست فيهم الخوف حتى من ضلهم. ياخي فمة صحافة عربية؟ تي هاك الجزيرة ما تتجرأشي نهار تقول حاجة في حق السياسة القطرية اللي تدعم في إسرائيل...حتى إنتي اللي زعمة متحرر مالقيود وحالل مدونة ماك إلا العبدو لله. برة ربي معاك على كل حال...تي حتى هوما العرب ما زعام كان في التصفيق اللي بو بلاش و طول اللسان في الفارغ .مالا نحنا باش تميزنا على لخرين:كان بالكلام

Big Trap Boy a dit…

سامحني خويا وإلاّ أختي، أتوة منو هكّا نسكر جلغتي مرة وحدة مادام ما إنجمش أو ما نحبّش نحكي في البوليتيك

هاذيكا أحسن طريقة باش تتحسن الأمور، السكوت والنبوت والي يتحرك يموت